کۆمیتەو پەروەردەو کەژەکەی بە ئەرەیاۋنېوە هجومەکۍ سەروو مامۆسا مزگینی-ش فارقین و ئامەڎینە شەرمەسار کەرڎۍ و داواش جە گرڎوو رۆشنۋیرا کوردی کەرڎ کە خۊتانکەرڎەی جە زوان و کولتوروو ۋېشا کەرا.
کۆمیتەو پەروەردەیی جەمەو ژەناو کوردسانی (کەژەکە)ی سەبارەڎ بە هجومەکا سەروو مامۆسا و زوانی کوردی مزگین یاڵچینی جە فارقین و ئامەڎینە ئەرەیاۋنېوەش وەڵاکەرڎۆ.
ئەرەیاۋناکەی پی جۆرەنە:
"کۆماروو تورکیای بە سیاسەت و نکوڵی، دلېنەبەرڎەی و تاونایۊ کولتوری سەروو کوردا سەڎېوەش پەڕکەرڎۆ. سیستمێوە سەروو بنەماو شۆڤینیزمی، بەسەروازگەکەرڎەی و یەک ئاڵا، یەک نەتەوە، یەک زوان، یەک ئشناسنامە و تاکڕەوی پېسە خانەی صەرەتانی ئارۊ دەوڵەتوو تورکی گلېرگەکەش هەم جە روو ویرکەرڎەیۊ، هزری، کولتوری و ژیۋایۊ بڕیەنشەرە جە گرڎوو پێکئاما سروشتییەکا و نەوەشیېوە کوشندەش وەش کەرڎەن. گەلوو کوردی بە زوان و کولتوری تاریخی ١٢ هەزار ساڵەیش بە هۆشمەنڎی و ئەقڵیەتی دەسەڵاڎداری فاشیستی و دیکتاتۆری ئەردۆغانی پېسە وەرمش پۊوە ۋینۍ، ئا بیەیە بیەن بە ڕاو ژیۋای و بیەی کۆمەڵایەتی، جە سەڎ ساڵەو کۆماری دەوڵەتوو تورکینە دمایش پنە بارۊو دلېشەنەبەرۊ و نازۊش. بەڵام ئانەی بیەیش نییا جەهانوو مرۆڤایەتی دەوڵەتوو تورکین جە روو مافەکا مرۆڤی، جە ڕوو ئازاڎیی ژەنۍ، بە ڕسمی ئشناسا و ئشناسنامە و زوانی کوردی و حەرپاسە نەبیەی سیستمێوە دیموکراتیکی و سروشتیتەرین مافەکا زوانی و کولتورین. سیاسەتوو تاونایۊی کولتوری و نکۆڵیکەرانەو دەوڵەتوو تورکی ئیجارەیچ دڎان نەگېرتەی وېرە ۋەران ۋەر بە مامۆساو زوانی کوردی جە مەنتیقەو فارقین و ئامەڎیی مزگین یاڵچن بە هجومېوە و بە ئامانجوو کوشتەی، ئاشکراش کەرڎ.
دەوڵەتوو تورکی پېسە هەنگامېوە تازۍ و گرنگۍ پۍ ئانەی ڕووەی فاشیستانۍ ۋېش چەرمۍ کەرۊوە و دۆسیەکا تاوانەی قورسە دژوو گەلوو کوردی چانیشا کوشتەی، گېرتەی، فاڕای دیموگرافیای جە ڕاو چۆڵکەرڎەی دەگا و شارەکا کورداوە، زینڎانی کەردەی هەزاران کەسا جە زارۊڵا و پیرۍ بېگوناحۍ بە شێۋېوە ناداڎپەروەرانە و حەرپاسە پەردەپۆشکەرڎەیی کردەوە نایاساییەکا تەریچش، جە ٢٦و کانونوو دووەم و ٢٠١١ی لوجنەو باڵاو پەروەردەو تورکیای (یە ئۆ کە)ی پۍ ۋېش بەش و زوانی و وێژەو کوردیش پەسەنڎ کەرڎ. یۊ چا مامۆسایا مزگین یاڵچن وەختۍ سەروو ئەرکەکەیشۊ بۍ، نامۍ شارە کوردیەکا فێروو ۋەنەرەکاش کەرۍ و بەمەڵامەتشۊ رووبەڕوو هجومی شۆڤێنیستی و دژە دیموکراتیکی بیۆ. حەرپاسە بڕۍ جە زانشتگەکا سەرنیشتوو کوردسانینە بەشەکۍ کوردۆلۆژی کریېبێنێوە و چا کۆلێژانە ساڵانە سەڎان کەسۍ پېسە مامۆساو کوردی ۋەنای تەمامنېنۍ، بەڵام چا سەڎان بەرشیەو زانشتگەی سەرەڕاو ئانەی داواکاری پۍ ۋەنای کوردی فرەن، بەڵام مەمەرزیارە؛ ئانېچ کە مەرزیارە، پېسە مامۆسا مزگینی چا وەختەنە خجڵۍ جابەجېکەرڎەو ئەرکەکەیشانۍ رووبەڕوو هجومی باوە. حەرپاسە ئا رێکوزیا و جەمۍ تایبەت بە پەروەردەی جە مانگەو شوباتینە بۆنەو ڕۊو جەهانی زوانی ئەڎایوە سەبارەڎ بە گرنگی زوان و ئەڎۍ چالاکیشا کەرڎەبۍ، جە تەرەف و داڎگاو باڵایوە سزا پۍ خەباتکار و مامۆسایا کوردی بڕیاوە. ڕووانە تەنیا ۋەروو ئانەی کوردا، یان بە کوردی قسېش کەرڎېنە و بە کوردی گۆرانیېش واتېنۍ، زارۊڵېوە، گەنجێوە و ژەنێوە کوشیا. ئا ئەقڵیەتەو سیاسەتوو نکوڵی و تاونایۊ کولتوری سەرەڕاو ئانەی سەڎېوەش ۋیەرنان، ۋەروو ئانەی ئا ئامانجەی پلانەش پۍ نیابېرە نەیاونانش بە سەرکەوتەی و گەلوو کوردی جە ڕاو جمیەروو ڕابەر ئاپۆیۊ زانا و خۊتان جوڵە و کۊشیای بیەن و بە مدرامانی بێهامتا ئا سیاسەت و هجومەشە پوچ کەرڎەنۊ، دەوڵەتوو تورکی ئا توڕەییەشە جە پاو شکس و سیاسەتوو نکوڵی و تاونایۊ کولتورین.ۋەروو ئا مدرامان و کۊشیایەو گەلوو کوردی، دەوڵەتوو تورکی بە ئاشکرا نیشانەش مڎۊ کە سیاسەتوو قڕکەرڎەی و تاونایۊ کولتوری سەروو گەلەکەیما و ئەرەمەرزیا دیموکراتیکەکاما چنڎە بە دژواری بەردەوام بۊ، ئانڎەیچ خۊتانکەرڎەی جە ئشناسنامە و بیەو گەلەکەیما تا بەدەسئارڎەو مافی سروشتی ۋېما کۊشیایما بە گوڕتەر و بەقوەتتەر بۆ.
ئێمە پېسە کۆمیتەو پەروەردەیی کەژەکەی سیاسەتوو نکوڵیکارانە و قڕکەرانەو سەپیا سەروو ۋەنەرا، مامۆسایا، خەباتکارا و رێکوزیاکا زوانی کوردی، کە جە هەمان وەختەنە هجومېوەن پۍ سەروو بیەی و بەهاکا گلېرگەی، کولتور و زوانی کوردی، شەرمەسار کەرمۍ. حەرپۊکەی ئا هجومۍ کە سەڎېوەن مافوو ۋەنای و نۋیستەی بە زوانوو ۋېش پۍ گەلوو کوردی قبوڵ مەکەرۊ، هەڵای وەرگەو فێرکەرڎەی نامۍ راسەقینەو ئا شارا چنەشەنە مژیوا مەگېرۊ، پەنەوازەن تەماموو گلېرگەکەیما بە تایبەتی ژەناو-ئەڎایا، جە ۋەران ۋەروو ئا هجوما تاونایۊ- قڕکارینە بێدەنگۍ نەبا و گوڕ بە کۊشیایشا بڎا. بە زانابیەی ئانەی کە "کەرڎەی ئامانج و سزادای حەر رێکوزیا و مامۆسایۍ کوردی، پەلاماردای و سزادای گرڎوو بەها و مافە کۆمەڵایەتیەکان"، مشۊم ئێمە پېسە گەلوو کوردی و ژەنا کوردی جە گرڎ وەختۍ زیاتەر خۊتانکەرڎەی جە زوانەکەیشا ، ئشناسنامە و کولتوری ۋېشا کەرا، گرڎ ڕووۍ گرڎ کوردێوە بە کوردی قسۍ کەرا، بە کوردی بنۋیسا، بە کوردی ۋیرکەراوە و جە گرڎوو کایە و بوارەکا ژیۋاینە خۊتانکەرڎەی جە بیە و ئشناسنامەی کەرا کە شکۆمەنڎی ئینسانیا. بەتایبەتی گرڎوو مامۆسایا ژەنۍ، خەباتکارا و رێکوزیا و ناوەنڎەکا زوانی، وێژە و رۆشنۋیرا کوردی، خۊتانکەردەی جە مافوو بیەی گلېرگەکەیشا کەرا، پەی مسۆگەرکەرڎەی پەروەردەی بە زوانی ئەڎایی جە تورکیا و دمایی ئارڎەی بە ڕاگیریەکا، پېسە ئەرکێوە نیشتمانیی، بیەی و سروشتی بێ مردای چالاکی دیموکراتیکی بەقوەت کەرا، بە قەرار و پاگیریوە خۊتانکەرڎەی جە زوانی و کولتوری ۋېشا کەرا".
