كۊنفڕانسوو لۊزانینە باره‌و نه‌ریتوو كۊشیای ژەناو كوردیوە قسەوباس كریا
دووه‌مین ڕۊو كۊنفڕانسوو لۊزانینە، ته‌وه‌روو "١٠٠همین ساڵەو په‌یماننامه‌و لۊزان- ورسەنگنای كۊلۊنیالیزمی جە ڕوانگه‌و ژەناو كوردیوە"، قسەوباسش باره‌وه كریا.
كۊنفڕانسوو لۊزانی كه ڕۊو ٢٢ ته‌مووزی به دروشموو "هەڵوێستوو گەلوو کوردستانی جە ١٠٠همین ساڵڕۊو پەیماننامەو لۊزانینە" ده‌سش پەنە كەرد، ئارۊ جە دووه‌م ڕۊشنە به پانێلێوە به ناموونیشانوو "١٠٠همین ساڵەو په‌یماننامه‌و لۊزانی- ورسەنگنای كۊلۊنیالیزمی جە ڕوانگه‌و ژەناو كوردی‌وه" به‌رده‌واما.
جه پانێلەکێنە کە كورده عومه‌رۍ و سه‌حه‌ر ئایدارۍ بەرڎە ڕاوە، مونه‌ووه‌ر عه‌زیزئۊغڵو، زانكۊو برێمن و نه‌رمین عوسمانە، وه‌رپرسەو ڕێكوزیایەکاو ژەنا سلێمانینە پێسە وتارواچا به‌شدارۍ بێنۍ.
سه‌حه‌ر ئایدارە سه‌ره‌تاو پانێله‌كه‌ینە واتش: كۊشیای وێڕ‌اوه‌به‌ریی ژەناو كوردی تاریخین و یاوان ئا ئاسته، كه سەرمەشقایه‌تی پەی كۊشیای ژەنا جیهاننە کەرا. هاموەخت باسوو چەنەکەوتەیۊکاو په‌یماننامه‌و لۊزانیش کەرد و واتش: گه‌لوو كوردی ده‌ربه‌ده‌ر و كۊچبه‌ر كریا، زوان و كولتوورش قه‌ده‌غه كریا، تاویایۊی كولتوورییش ملەرە سەپییا، ژەناو كوردی كۊكوشۍ كریۍ. ژەنی به درێژایی تاریخی ڕووبه‌ڕووۍ ئا سیاسه‌تا کریێوە.
لاو وێچشۊ مونه‌ووه‌رعه‌زیز ئۊغلۊوە یادش ئارڎۊ، كه ١٠٠ ساڵۍ چێوەڵتەر كوردستان بە په‌یماننامه‌و لۊزانی پارچه كریا، وەلێم گه‌لوو كوردستانی هیچ وەخت ئا په‌یمانێشا به ڕه‌وا نه‌زانێنە و قبوڵشا نه‌كەرڎێنە، واتیچش: ژەناو كوردی به فه‌لسه‌فه و پارادیگماو "ژەنی، ژیوای، ئازادی"ی ڕابه‌روو گه‌لوو كوردی، عه‌بدوڵا ئۊجالانی دژوو په‌یماننامه‌و لۊزانی و كۊکوشكەرڎەی ژەنا، ده‌سشا به كۊشیای كەرد.
هه‌رپاسە نه‌رمین عوسمانە، یوە جە وتارواچەکا پانێله‌كێنە باسوو كاریگه‌رییه‌كاو په‌یماننامه‌و لۊزانی به‌تایبه‌تی سه‌روو ژەناوە كوردستان و وەرکەوتوو دلێڕاسەینە كەرد و نموونێوەش تاریخەنە ئارڎۊ و باسوو نه‌ریتوو كۊشیای ژەناو كوردیش کەرد و ئاماژه‌ش به گرنگیی كۊشیای ژەناو كوردی جە په‌ره‌پەنەدای و وەڵێوەبەرڎەی كولتووری و زوانی و گلێرگەی كوردییش كەرد.
س.ز
