کەنەکە: فرە گرنگا گلێرگەو جەهانی دەمودەس پەی پاڵپەشتی جە ئیدارەو خۆسەری دیموکراتی سەرنیشت و ۋەرکۊتوو سوریای و هەر پاسە پارێزنای ئی مۆدێلەو سوریێوە دیموکراتیکی و گشگیری چی کاتە گرنگەنە هەنگام بنیۆ.
کۆنسەو ڕاوبەری کۆنگرەو نەتەوەیی کوردەسانی (کەنەکە) سەبارەت بە ئاژەو سوریای و سەرنیشت و ۋەرکۊتوو سوریای ئەرەیاۋنێوەش وەڵاکەردۆ: و چنەشەنە رووە جە راو گرڎیی جەهانی و گلېرگەی مېیاننەتەوەیی مکەرۆو ماچۆ؛" سوریا ئیساتۍ ۋەردەمو چوارڕیانێوە تاریخینە مردان و وڕنای ڕژێمو دیکتاتۆری بەعسی بەشار ئەسەد دەرفەتێوە ناوازە پەی پێناسەکەردەیۆ ئاینڎەو "نەتەوە"ی ڕەخسنۆنە. ئیساتۍ، زیاڎ جە جارانی، پەنەوازیێوە دەمودەسی هەن پەی وەشکەردەی سوریایۍ تازەی- واتە سوریێوە کە ئشناسنامە نەتەوەیی و ئایینی و کولتوورییە فرەچەشنەکا ۋێش گێرۆ باوشی و جە هەمان کاتەنە دیموکراسی و دادپەروەری و یەکسانی پەی گرڎو مەردمیش فەراهەم و قەوەت بکەرۆ".
هەر جە ئەرەیاۋناکەو کەنەکەینە ئانە یاڎ وزیانۆ کە جە ساڵۊو ٢٠١٢یۆ ڕاوەبەری خۆسەریی سەرنیشتی و ۋەرکۊتوو سوریای هەرمانە پەی سوریایۍ دیموکراتی مکەرۆ. ماچۆ؛" چی ناوچەنە، ژەنا، گرووپە ئەتنیکییە جیاوازەکا و پێکئاما ئاینیەکا پەی وەرەنگاربیەیۆ دۆڵەتو ئیسلامی (داعش)ی و گروپە جیهادییەکا تەری یۆشا گێرت و مۆدێلێوە ۋێڕاوەبەریشا ئەرەمەرزنا کە نوێنەرایەتی دەنگو گرڎ لێوە مکەرۆ. ئی مۆدێلە دیموکراسییە،کە جە ڕاو هەوڵە هامبەشەکا کورد، عەرەب، ئەرمەنی، ئاشووری، تورکمان، چەرکەس، سوننە، شیعە، عەلەوی، مەسیحی، دروزی، ئێزدی و سوورییەکا تەری پێکئامان - ڕووبەڕوو هرووژمی سەرەمڕەی جە لایەنو دۆڵەتو تورکیای بیەنۆ. دەسدرێژییەکۍ تورکیای، چانیشایچ هرووژمی ئاسمانی و کۆکەردەیۆ میلیشیا جیهادییە پرۆکسییەکاش، مەترسیێوە گۊرەش پەی سەرو وەڵێکۊتەیەکا ئیدارەو خۆسەری دیموکراتی سەرنیشت و ۋەرکۊتوو سوریای و پەی ئایندەو سوریای بە گرڎی و ئاسایشو ۋەرکۊتوو مېیامینی ۋەرفراوەنتەر، وەش مکەرۆ".
هەر جە ئەرەیاۋناکەینە کەنەکە ئاماژەش پانەی دان کە جە کاتێنە لایەنە جۆراوجۆرەکۍ جە دلێینەو سوریای و جە گرڎو دنیێنە پەی یاوای بە چارەسەریێوە سیاسی پەی ئا وڵاتەیە پۊوەگلیۍ جەنگی خجڵۍ هەوڵداینۍ، دۊڵەتو تورکیای جەنگو ۋێش جە دژو ئیدارەو خۆسەری دیموکراتی سەرنیشتی و ۋەرکۊتوو سوریای چڕتەرکەردەنۆ، چونکی گەرەکشا نیا ئارامی یان پێوەرە ژیۋای جە سوریانە بلۆ وەڵۍ. هەر پۊکەی، دماو وڕای ڕژێمو سوریای، سوپاو تورکیای بە هەماهەنگی چنی میلیشیاڤپڕۆکسییەکا ۋێش، هرووژمشا کەردەن سەرو شارو مەنبەجی فرە ئەتنیکیی جە سەرنیشتوو ۋەرکۊتوو سوریای".
کەنەکە جە درێژەنە سەرنجش وست سەرو ئاژەو ژەناو واتش؛" گوزارشتەکۍ بڕفانای ژەنا کوردی، دلێشانە ئەنداماو یەکینەکاو پارێزنای ژەنا (یەپەژە) جە لایەنو پڕۆکسییەکا سەر بە تورکیایۆ جە ناوچەو شەهبای، پەنەوازیۍ دەمودەسی پەی دەسوەردای مېیاننەتەوەیی وزا ڕووە. فرێوە چا ژەنا بێسەروشۆنۍ کریێنۍ، هامکات هاموڵاتیۍ مەدەنیۍ کوردێچ بە بەردەوامی وەرەن ڕوو بڕفانای و ئەشکەنجەی و بێسەروشۊنکەردەی باوە جە لایەنو میلیشیا پڕۆکسییەکا تورکیایۆ. پەنەوازا نەتەوە یۆگێرتەکۍ دەمودەس ئەوەکۊڵیای چا کردەوە نامرۆڤانا بکەرا".
جە دما دمایی ئەرەیاۋناکەینە کەنەکە بە چن داواکاریێوە داوا جە گلێرگەی مېیان دەوڵەتی، نەتەوە یۆگێرتەکا، ئەمریکای و یۆبیەی ئەوروپای- مکەرۆ کە ڕاوجای یەکلاکەرەوە گێرانە ۋەر:
یووەم؛ هەنگامەی خێرا بنیا پەی مردنای هرووژمە سەروازییەکا تورکیای و میلیشیا پڕۆکسییەکا سەر بە تورکیای.
دووەم. دڎانیایپۊرەی بە ئیدارەو خۆسەری دیموکراتی سەرنیشتی و ۋەرکۊتو سوریای.
سێیەم. یاونای هامکاری مرۆیی خێرای بە مەبەسو هامکاریکەردەی چنی ئەرەمەرزیاکا ئیدارەو خۆسەری دیموکراتی سەرنیشت و ۋەرکۊتوو سوریای بە مەبەسو چارەسەرکەردەی پەنەوازیە جۆراوجۆرەکا ئاوارەکا.
