تورهالی ئەرەیاۋناش که بە ئەرەمەرزنای کۆماری، ئا قەولۍ به گەلو کوردی دریۍ، به خێرایی هەڵاو دیمۍ بیۍ پەی نکۆڵی، پاکتاوکاری و واتش: "واتشا ئێمە جە ئەرەمەرزنای کۆمارینە پېوەرە بێڼمۍ، بەڵام دماتەر نکۆڵی جە گەلەکەیما کریا. ئەرەپڕای شێخ سەعیدی و هەڤاڵاش ئەرەپڕایۍ ئاسایی نەبۍ، بەڵکم ئەوەکۊشایۍ بۍ پەی پارېزنای گەلەکەیما، بە جە قەنارەدای ئاڎیشا، کۆمکوژی تاریخی و شناسنامەو گەلێوە بۍ، ئارۊیچ هەڵای قەبرەکێشا نادیارێنۍ. ئا ئەوەکۊشایەی کە ١٠٠ساڵۍ چێوەڵی دەسش پنەکەرڎ و بەدیلێوە کە دریا قەت جە یاڎما نەکەردەن.

پۊکەی مشۊم جە ١٠٠ـەمین ساڵوەگەرو ئاڎیشانە کەسانێوە کە رێبازو ئاڎیشاشا هۊرگېرتەن دەورو یۆیرە گلېرۍ باوە."

یاڎئاردەیۆ ئاڎیشا ئەرکی تاریخی ئێمەن

تورهالی ئەرەیاۋناش مشۊم گەلو کوردی، ئێزدی، عەلەوی بە گرڎو جیاوازییەکاشاوە، جوانا، ژەنا و گۊرە و گولانە چی ڕووە تاریخیەنە جە دەورو یۆی کوۍ باوە و واتش: "ئانەی ١٠٠ ساڵۍ چێوەڵی ڕووەشدا تەنیا دلېنەبەردەی مڎرامانی بۍ، جە هەمان کاتەنە بەشێوێوە سیستماتیک نکۆڵی کەردەی و پاکتاوکاری بۍ جە ۋەرا ۋەر بەگەلەکەیما، ۋەننگەکېما وزیێرە، سەرمەشقەکېما جە قەنارە دریۍ، زوانەکەما قەڎەغەکریا. ئارۆ، یاڎئاردەیۆ نامۍ شێخ سەعیدی خاوەنداری کەردەیا جە زوانی قەڎەغەکریای و مافە دەسسەرەرەگیریایەکاما. پا بۆنۆ بەشداریکەردەی جە مەراسیمو یاڎکەردەیۆ کۆڵنی و برۆکسەلینە ئەرکێوە تاریخیا."

گلېرۊبیەکەی جە ٢٩و حوزەیرانینە شارو کۆڵنینە جە تەلارەو هیومارکێتینە ملۊڕاوە.