١٥ ساڵۍ چێوەڵتەر شاروو كەركووكینە ڕۊنامەنویسی ئازا و گەنج سۊرانوو مامە حەمەی، بە دەسوو چەکدارە نەشناسیایاو (پەدەکە)ی گەشمەرڎە كریا، وەلۍ تا ئیساتۍ تاوانبارۍ هەقەتینۍ ئا هەرمانە تیرۊرستییۍ بەنادیاری مەنێنیوە و سزا نەدریێنۍ، سۊرانوو مامە حەمەی دماو گەشمەرڎەکەرڎەیش بۊنەو یارای و زیندەیی قەڵەمەکەیشۊ ناسنامۍ "گەشمەرڎەو قەڵەمی"یش پەنە بەخشیا.

سۊرانوو مامە حەمەی ساڵەو ١٩٨٧ شاروو کەرکووکینە پەیدا بییەن، ڕۊنامەنویسێوە سەربەوۍ گۊڤاروو لڤینی بۍ و ماوەو یەرۍ ساڵا چا گۊڤارەنە هەرمانەش کەرڎە، کە جە ٢١ تەمووزوو ٢٠٠٨ وەرڎەموو یانەو وێشانە تیرۊر کریا، کەیسوو سۊرانوو مامە حەمەی ئیساتۍ بەکریاوەیی مەنەنۊ و سەرەڕاو وەشکەرڎەی لوجنەو لێکۊڵیایۊ، تاوانبارۍ و سەبەبوو کوشتەکەیش ھەڵای تەمام ڕۊشنۍ نییەنۍ.

 دووۍ مانگۍ وەڵۍ کوشتەیسنە، سۊران ھەڕەشۍ کوشتەیش وەنە کریێبۍ، کوشتەکەیش شۊنەو چند وتارێوەرە ئاما کە ڕۊنامە و گۊڤارەکانە وەڵێش کەرڎیبێنیوە، پێسە وتاروو پەرسەو بەرکەوتەی خانمەو یوەمەو کورڎسانی جە ڕۊنامەو ھاوڵاتی-ینە کە دلێشنە داواو بەرکەوتەی خێزانوو مەسعوود بارزانی-یش کەرڎەبۍ، چەنی ڕاپۊرتێوە سەرووچۊوەتلیای وەرپەرسە حکومییاو شاروو کەرکووکی چەنی لەشورەشاو شارەکەی بڕۍ کەسێچ گۊڤارەکەی بە سەبەبوو تیرۊرکەرڎەی نامەبریای لەیەک مداوە، ئانەیچ بۊنەو وەڵاکەرڎەیۊ وتارەکەو سۊرانوو مامە حەمەیۊ.

سۊرانوو مامە حەمەی نویستەیەکیش زیاتەر دژوو خیانەتی و گەندەڵیی دەسەڵاتی کوردی بێنۍ. یۊ جە نویستەیەکاشنە باسوو ئانەیە کەرۊ، کە خیانەت دلۍ دەسەڵاتی کوردینە بییەن بە فەلسەفە و فاکتەرێوەن پەی مەنەیۊیشا دەسەڵاتنە، پەی نموونەی ماچۊ:"ئانۍ ئارۊ وێشا بە سیاسی و ساعیب خەباتوو کورڎایەتیی ئا ھەرێمەیە مزانا، ورڎی وێشا بیێنۍ، کە ئایا تەنیا ڕۊۍ خەبات و سەروەرییشا ھەن پەی بزاڤی ڕزگاریوازوو دۊزوو کورڎا تاریخنە، جگە جە کوردکوشتەی و خیانەتی نەتەوەیی و ییەی بە کۊیلە و جاسووسوو وەڵاتە هامسایا و جیھانی".

 وێرەگاو هیزی هۊڵوو پەیمانگاو عیلمینە جە شاروو کەرکووکینە، بە ئامادەبییەی کەسوکاروو گەشمەرڎەو قەڵەمی و چالاکا و ڕۊنامەوانا، جە ١٥مین ساڵڕۊو تیرۊرکەرڎەیشنە وێرەگانەدیدارێوە ئەدەبی و ڕۊنامەوانی تایبەت بە بەرهەمە شیعری و ڕۊنامەوانییەکاو گەشمەرڎەو قەڵەمی (سۊرانوو مامە حەمە)ی لوا ڕاوە، کە دلێشنە هەریۊ جە (لەتیف فاتیح فەرەج)ی نویسەر و ڕۊنامەوان (هەڵمەت هۊشیار) وانایۊشا پەی بەرهەمەکاو سۊرانوو مامە حەمەی کەرڎی.

یاگۍ باسینە دیدارەکە بە دەسوەڵێوستەی گۊڤاروو نوگرەسەلمانی ڕێک وزیابۍ، کە گۊڤارێوە تایبەتە بە جینۊسایدی و ئەنفالین، هەرپاسە سۊرانوو مامە حەمەی دەسەو نویسەرا و دەسەو ئەرەمەرزنا ئا گۊڤارەیە بۍ.

پەدەکە ئەمرەش کەرڎینە بە وستەیرەی و شارتەیۊ ئی کەیسی

 سەبارەت بە مەڕاسیموو یاڎوو ئا گەشمەرڎەو قەڵەمییە، گەرڎە مامە حەمە واڵۍ گەشمەرڎەو قەڵەمی پەی ئاژانسوو هەواڵوو فوراتی واتش: "ئێمە پێسە بنەیانەو گەشمەرڎەی ماوەو ١٥ ساڵان چەمەڕوانێنمۍ جە دەزگا ئەمنییەکاو شاروو کەرکووکی، کە بکەراو ئی کەیسەیە بدا دەسوو دادگایۊ، ئا لوجنەیچە پەی کۊڵیایۊ جە گەشمەرڎەکەرڎەی سۊرانوو مامەحەمەی وەش کریا، تا ئیساتۍ ئەنجامەکەشا پەی لایەنێوە نەئەرەیاونان، سەبەبەکەیچش ئانەن کە حزبوو دەسەڵاتی کوردی ئەمرەو وستەیرەی ئی کەیسەیشە بەرەکەرڎینە".

 پەدەکە بەرڎەواما جە تیرۊرکەرڎەی و سەرکوتکەرڎەی ڕۊنامەنویسا

 هەرپاسە واڵەکۍ سۊرانوو مامە حەمەی سەبارەت پا لایەنا، کە دەسسشا بییەن تیرۊکەرڎەی براکەیشنە، پەی ئاژانسوو هەواڵوو فوراتی واتش: "مزانمۍ کە حزبێوە کوردیی باڵادەسوو هەرێموو کورڎسانی(پەدەکە) وەرپەرسا جە تیرۊرکەرڎەی سۊرانوو مامە حەمەینە، ئا حزبە تا ئیساتێچ بەرڎەواما جە تیرۊرکەرڎەی ڕۊنامەوانا و چەوسنایۊ خەڵکینە کە ئازادیی ڕابەروستەی وەرتەسک کەرۊوە،  چالاکۍ و ڕۊنامەوانۍ کەرۊ زیندان، وینمۍ ئارۊ ئا حزبە کە ١٠ ساڵۍ چێوەڵتەر سۊرانش تیرۊر کەرد ئارۊ سزاو ٤ ساڵا زیندانیش ملوو ڕۊنامەنویس شێروان شێروانیرە سەپنا،  ئینەیچ پەیاموو ئانەین کە ئی حزبە(پەدەکە) بەرڎەوامی مدۊ بە سەرکوتکەرڎەی ڕۊنامەوانا، وەلۍ یاگۍ وەشحاڵینە، کە ڕۊنامەنویسۍ ئازایانەتەر ئینۍ یاونای پەیاموو خەڵکینە".

دەسەڵات مەتاوۊ وێش خاس کەرۊ پەوکای ڕۊنامەنویسی تیرۊر کەرۊ

لێوە تەرۊ، لەتیف فاتیح فەرەج نویسەر و ڕۊنامەوان، سەبارەت بە بەرڎەوامیی تیرۊرکەرڎەی ڕۊنامەوانا لاو دەسەڵاتیوە پەی ئاژانسوو هەواڵوو فوراتی واتش: "ڕۊنامەنویس چەمدارا ملوو دەسەڵاتی و دەس وزۊ دلۍ زەخمەکاو هەریەری دەسەڵاتەکەی (جابەجاکەرڎەی، یاسانیایرەی و دادوەری) پەنەشا ماچۊ، کە دەسەڵات چکۊوە گول و کەمتەرخەما و داواو چاکسازیشا وەنە کەرۊ، هەریەری دەسەڵاتەکۍ تەرۍ گەرەکشا نییا چاکسازی کەرا، دەسەڵات مەتاوۊ وێش خاس کەرۊ، پەوکای مۍ ڕۊنامەنویسۍ تیرۊر کەرۊ و دەزگاکاو ئەرەیاونای وزۊرە و هجووم کەرۊ سەروو ناوەندەکاو ئەرەیاونای".

س.ز