شاروو کەرکووکینە، ماوەو دووۍ حەفتانە پەی جاری دووەمی جە ڕاو چەکڎارە نەشناسیاواوە بە سواریی ماتۊڕۍ هجووم کریۊ سەروو ئەفسەراو پۊلیسوو شارەکەی، یاگۍ واتەینە ڕووەدای تەقەکەرڎەی وەنەو هێزە ئەمنییەکا و هاموەڵاتاو شاروو کەرکووکی ڕۊبەڕۊ زیاد کەرۊ، ماوەو دووۍ حەفتانە ئینە دووەم جارا ئەفسەراو پۊلیسی کریا ئامانج، کە شەوەو یەرەشەممەو حەفتەی وەڵینی بە هەمان شێوە ماتۊڕسوارێوە تەقەش وەنەو یانەو عەمید غەریبی ڕاوەبەروو پۊلیسوو نەوجەواناو کەرکووکی کرد و پاسەوانێوەش کوشیا.

ئارۊ جومعەیچ نزیکوو خەسەخانەی گردینوو کەرکووکینە دووۍ کەسۍ بە ماتۊڕێوە تەقەشا وەنەو هێزەکاو  پۊلیسوو فریاکەوتەی کەرکووکی کەرد و ئەفسەرێوە بە نامۍ عەلی شەهاب ئەحمەدی، کە پلۍ مولازموو یەکیش هەنە برینڎار بی.

بە قسۍ پۊلیسوو کەرکووکی، "ماتۊڕێوە کە دووۍ کەسێش سەرۊ بیێنۍ چوڕجەمسا پێتەنرە و جادەو ئەتڵەسیوە ئامینۍ، چا وەختەنە مەفرەزێوە پۊلیسوو فریاکەوتەی ئەرەمردناشا پەی ئەوەکۊڵیایۊ، سەرنشینوو ماتۊڕەکۍ تەقەش وەنەو هێزەکەو پۊلیسوو فریاکەوتەی کەرڎەن و ئەفسەرێوە بە دووۍ فیشەکۍ برینڎار بییەن".

س.ز