کریستینا کیتسۊسە سەرۆک شارەوانیەو جنېۋی، جە پارتو سۆسیالیستی، کە جە خولو یووەم و هۊرچنیەی ئەنجومەنو شارەوانی جنێۋینە بیە بە یووەم، ئاماڎەکاری پەی خولی دووەمی مکەرۆ، خولو دووەمو هۊرچنیەیە دلېینەییەکا جە ١٣و نیسانی ملاڕاوە. پارتە چەپەکۍ شارەکەی چېرو چەترێوە هامبەشینە بەشداری هۊرچنیەی مکەرا.

کریستینا کیتسۆسە، کاندیدەو پارتو سۆسیالیستی، سەرۆکەو ئیساتۍ شارەوانی جنێۋی کە پېسە کاندیدۍ تەماشە مکریۆ، سەرو ئا پرسەیە و چڼین پرسیارۍ تەرۍ چنی ئاژانسوو هەواڵوو فوراتی (ANF)ی قسێش کەرڎۍ.

کریستینا یاڎش ئاوردۆ کە جنێۋ شارێوە فرە کولتورییا و زیاتەر جە ١٩٠نەتەوای جیاوازی چا مژیوا، چی ماوەنە  وینەرۍ پێچەوانەبیەیۆ هەرەمو ئەرەنیشتا بیەیمۍ و ئەر ئی گلېرگە هەڵای کارامەن، ئانە جە سەیەو کۆچبەراوەن پەی سویسرای و جنێۋی. ئاماژەش بە گرفتو هەرمانکەردەی کەرڎ جە فرێوە جە کەرتەکانە بە ۋېیەرنای تەمەنو هاموڵاتیا و واتش: "پۊکەی ئێمە بەدیلێوە یەکلا کەرەوەما نییا پەی چارەسەری گرفتەکا. یان ئێمە بە خاستەری شێوە کۆچبەرا قبوڵ مکەرمۍ و بەشدارێشا مکەرمۍ، یان سیاسەتو بنەیانەی مجمېراوە. چی وڵاتەنە کۆچبەرا مافو تەمامەتیشا جە دەنگداینە هەن پۊکەی پېسە هەنگامەی یووەمی پەنەوازا ئی پېکئامایا ئاگاڎار بکەرمېوە و پنەشا واچمۍ، 'شمە مافو دەنگدایتا هەن و متاودۍ نوێنەرەکاو ۋێتا هۊرچندۍ'. پەی نموونەی پێکئامای کوردی یۊن جە پېکئامایە چالاک و سیاسیەکا. بنەماو ئینەیچ جە ئەوەکۊشای تاریخی گەلو کوردیوە سەرچەمە گێرۆ. "پۊکەی گەلو کوردیچ متاوۆ جە جنێۋ و ناوچەکا تەرو جەهانینە چالاکیە کۆمەڵایەتی و سیاسیەکاش ڕاوەبەر بکەرۆ."

کریستینا کیتسۆسە ئاماژەش پانەی دا کە جنێۋ شارێوە جەهانییا و یاگۍ ئیمزاکەردەی ڕێککەوتننامە جەهانییەکان و واتش: "ئێمە ئینایمۍ قۆناغێوەنە کە هەمەچەشنی ڕووبەڕوو هرووژمی بیێنێوە، ڕێز جە مافە مېیاننەتەوەییەکا نمەگیریۆ و پاشێلۍ مکریا. گفتوگۆ یۆن جە پیمەرە بنەڕەتییەکا مافو مرۆڤی، هامکاری، ئازادی، دادپەروەری، مافو چارەو ۋێنویستەی گەلان، فرە گرنگا، و مشۊم ئی مژاریە بە دەنگی بەرز بەربڕمۍ. ئینۍ مافو چارەو ۋێنویستەی گەلا مسۆگەر مکەرا. شارەوانی جنێۋی وەڵتەرۍ شۊنیرەلوایش پەی چڼین سیاونویسا تایبەت بە ڕووەدایەکا کوردەسانی کەردەن کە جە لایەنو ئەنداماو ئەنجومەنەکەیماوە پێشکەش کریان. مەرامی سەرەکی شۊنیرەلوایەکا چی مژارەنە هوروژنایشا سەرو ئاستو کانتۆن و فیدراڵی، چونکی پەیوەندییەکۍ جبەریما جە بنەڕەتەنە چی ئاستەنە دیاری مکریا. هەرپاسە جە پارتو سۆسیالیستینە جە ئاستی فیدراڵینە هەمڕۍ فرێما هەنۍ که جە نزیکۆ چنی پرسو کوردی پەیوەندیشا هەن."

'پەشتیوانی جە دۆزو ڕەواو گەلو کوردی مکەرو'

سەبارەت بە هەوڵ و داواکارییەکا گەلو کوردی جە جنێۋ پەی ئازادیی ڕابەر ئاپۆی، کریستینا کیتسوسە ئەرەیاۋناش: "من ۋێم بەشداری بڕۍ چا ۋێنیشاندایامە کەردەن کە بە مەبەسو ئازادیی ئېژا ئۆجالانی لوان ڕاوە. گەرەکما جەخت چانەی بکەرووە کە من پەشتیوانی جە دۆزو ڕەواو گەلو کوردی مکەر و مشۊم مافە بنەڕەتییەکاش پارېزیا ئێمە مزانمۍ کە ماوێوە فرە بۍ حیچ زانیاریێوە جە بارەو تەندروسی ئېژا عەبدوڵا ئۆجالانی و ئاژەو زینانیاوە ۋەردەسەنە نەبۍ. هەرپاسە موینمۍ کە بانگەوازەکێش پەی ئاشتی و پێشنیارەکێش جە ئاستی مېیاننەتەوەیینە پەشتگۊش وزیا و ئی ئاژە ساڵانە بەردەوامیش هەن. داواکاری ئازادیی و ڕێزگېرتەی جە مافە بنەڕەتیەکا بەردەوام واوەی باوە. هەرپاسە موینمۍ جمېیەرو جوانا مېیاننەتەوەیی جە جنێڤ پی مەرامۆ جە مېڎانو نەتەوە یۊگێرتەکانە کوۍ باوە. سەرەڕاو گرڎو ئی کۊششا، دیسان دەسەڵاتدارا بەردەوامێنۍ جە قەراردای غەڵەتی و فرەو وەختی قەراری هەڕەمەکی مڎا. سەرەراو ئانەیچ، جەنگەکە هەر بەردەواما. ئێمە پېسە ڕاوەبەرایەتی شارەوانی هەمیشە پاڵپەشتی ئی داواکاریا مکەرمۍ. ئېژا ئۆجالان وەڵتەر داواو چارەسەرێوە دێموکراتیکی و ئاشتیانەیش پەی پرسو کوردی کەردەن بەڵام حیچ جوابێوەش نەڎریانۆ و فاڕیایۍ جە هەڵوێسو حکومەتینە ڕووەش نەڎان، حەرپاسە نمەزانمۍ جوابو دمایین بانگەوازییەکەی مڎریۆوە. ئاوەزیەتو دەسەڵاتداری جە تورکیانە کاریگەری نەرێنیش سەرو مافەکا مرۆڤی و گرڎو پارێزنەرا مافەکا مرۆڤی بەتایبەت ژەنا، ڕۆنامەنوویسا، ڕۆشنۋیرا، نوویسەرا هەن. بێگومان حەجکەسۍ پاڵپەشتی چی جەنگیە بکەرۆ باجەکەیش مڎۆ."

کریستینا کیتسوسە جە دما دماینە سەبارەت بە خولو دووەمو هۊرچنیەکا واتش: "خولی دووەمو هۊرچنیەکا جە ١٣و نیسانو ٢٠٢٥ملۊڕاوە. ئێمە پېسە چوار کاندیدا چنی هەمکارەکاما جە پارتو سۆسیالیستی، جۆێل جە پارتو سەوزی، ئەلفۆنسۆ گۆمێز و مارجۆری دی شاستونای ئینایمۍ هامپەیمانینە. پەی ئێمە فرە گرنگا کە هەژموونو چەپی جە ئیدارەو شارەوانی جنێڤینە ڕاگېرمۍ. پۊکەی بەردەوامی و فرەینەو هەژموونو چەپی پەی ئێمە پرسێوە فرە گرنگا.

ژەنا گەلو کوردی بیۍ بە ۋەنێوە پەی گرڎ لێوە

جە دماینە گەرەکما واچو که گەلو کوردی بەرز نرخن و پەشتیوانی ۋێم پەی گەلو کوردی ئەرەیاۋنو، گەلو کوردی پەی مافو چارەو ۋێنویستەی، ئازادی و دادپەروەری هەوڵدای و ئازاڎیی فرەش نیشانەدان. هەرپاسە ژەنا کوردی نیشانەشا دا کە ئازاڎیی چێشا و بیۍ بە ۋەنێوە پەی گرڎ کەسێ، وەڵتەر جە چالاکیە جیاوازەکانە بەردەوام واتەنم کە مشۊم عەبدوڵا ئۆجالان ئازاد بکریۆ و چارەسەرێوە یەکسان و هەمیشەیی پەی گەلو کوردی دیاری بکریۆ."