ئەبوبەکر هەڵدەنی سیاسەتمەداری دیاروو پانیشتوو کورڎسانی و پەرلەمانتاری وەڵینوو کورڎسانی، کە هەمان وەختنە ئەنداموو کۊنگرەیی نەتەوەیی کورڎسانی (کەنەکە)ین، لە چەمپەنەکەوتەێوە تایبەتنە بارەو ساڵڕۊو سەڎ ساڵەی پەیمانەو لۊزانیوە، پەی ئاژانسوو هەواڵوو فورات(ANF)ی دوا.

 یەکڕیزیی لایەن کورڎسانییەکا گەورەتەرین جوابوو ئیمزاکەراو لۊزانین

 ئەبوبەکر هەڵدەنی ئەنداموو کەنەکەی و سیاسەتمەداری دیاروو پانیشتوو کورڎسانی، سەبارەت بە سەڎ ساڵەو پەیمانەو لۊزانی، پەی ئاژانسوو هەواڵوو فوراتی(ANF)ی واتش: "ڕێککەوتەینامەو لۊزانی بەرەش وەرڎەموو جینۊسایدی و سڕیەیۊ و نکۊڵیکەرڎەی جە کوردی کەرڎۊ، جە یادوو سەڎ ساڵەو ڕێککەوتەینامەو لۊزانینە ئەرک گنۊ سەروو لایەنە دلێییەکاو کورڎسانی و زلهێزەکاو جیهان و وەڵاتاو هەرێمی، کە یوەمشا ئەرکەکە سەروو سەرجەموو هێز و لایەنەکاو کورڎسانین، جە سەڎ ساڵی ویەرڎەنە پەی دلۍ وێما چند دەرفەتێوە بەرۍ کەوتۍ، کە دماینشا هەرێموو کورڎسانی بۍ، چونکوم ئەزموونوو پانیشتوو کورڎسانی شەبەقۍ بۍ جە پەیماننامەو لۊزانی، وەلۍ وێما نەتاواما گەشە بە هەرێموو کورڎسانی بدەیمۍ یەکڕیزیی هێز و لایەنە سیاسییەکاو کورڎسانی گەورەتەرین جوابوو قەراربەدەسا و ئیمزاکەراو لۊزانین".

 چارەسەرکەرڎەی دۊزوو کوردی جە قازانجوو تەماموو وەرکەوتوو دلێڕاسەین

 هەرپاسە ئەبوبەکر هەڵەدەنی درێژەو قسەکاشنە واتش: " دەربارەو قەراربەدەساو وەڵاتە جیهانی و هەرێمییەکا ماچمێشا پەنە، کە چارەسەرکەرڎەی کێشە و دۊزوو کوردی چی مەنتێقەنە تەنیا قازانجوو گەلوو کوردینە نییا، بەڵکوم بە قازانجوو تەماموو نەتەوەکاو وەرکەوتوو دلێڕاسەین و گێڵایۊ ئاسایش و ئارامیین پەی مەنتێقەکەی، بە ئەمرە و ئیمزاو واژووی قەراربەدەساو جیهانی کورڎسان دەش کریان و ئا گرڎوو مەرگەساتاشە ملوو کوردیرە ئامێنۍ، پەوکای پێویس کەرۊ  بەشێوە چا قەرزا بداوە بە کوردی چونکوم ئادۍ وەرپەرسێنۍ چەنەش، لاو کەمیوە وەختۍ کە وەڵاتەکێشا پەی کەنداوی عەرەبی وەشۍ کەرڎۍ، تاوێنۍ قەوارێوەیچ پەی کوردی وەش کەرا تا گەلوو کوردی ئا گرڎوو مەرگەسات و جینۊسایدیشە جە چوار پارچەو کورڎسانینە ڕووبەڕوو نەبیێوە".

 غەڵەتەکاو دلۍ وێما چارەسەر کەرمۍ

 ئا سیاسەتمەدارەو پانیشتوو کورڎسانی ڕەخنەش جە کەمتەرخەمیی لایەنەکاو دلۍ گێرت و واتش: "هەر چوار ئەرەگیرەکۍ کورڎسانی جە سیاسەتوو سڕیەیۊ گەلوو کوردی هەر چوار پارچەو کورڎسانینە و جە تەماحەی شۊڤێنیۍ وێشا نەمرڎێنۍ، وەلۍ هەمیشە وچیان حەق مسنیۊ، ئێمەی کورد نزیکۍ بیێنمۍ جە ئازادی یەرۍ پارچاو کورڎسانی ئەگەر غەڵەتەکاو دلۍ وێما چارەسەر کەرمۍ و بلمۍ وێمارە، متاومۍ پەی گرڎوو دنیێش سەلەمنمۍ، کە لایقۍ پاڵپەشتیی ئادیشانمۍ، چەنی جە جەنگوو دژوو داعشینە جیهان هامپەیمانما بۍ، هەرپاسە جە ماڕای سەڎام حوسێنی و نویستەیۊ دەستووروو عێراقینە هەرپاسە وەشکەرڎەی مەنتیقەو دژە فڕاینە پانیشتوو کورڎسانینە بە قەراروو ٦٨٨ کە گلێرگەی میاندەوڵەتی چەنیما بێنۍ،  یانۍ بەشێوەش بەسیانۊ بە وێماوە".

 سەرەڕاو جینۊسایدی و هەوڵۍ سڕیەیۊ، سەبەبوو مەنەیۊ کوردی پەی ئینەیە گێڵۊوە

  ئەبوبەکر هەڵدەنی باسوو وەرگێریکەرڎەی گەلوو کوردیش کەرد دژ بە تەماموو شاڵاوەکاو ئەرەگیرا پەی جینۊسایدی و سڕیەیۊ و نکۊڵیکەرڎەی جە کوردی و واتش: " تاریخ سەلەمناش و بەرکەوت کە هیچ میللەتێوە ئندەو کوردی ئەگەر چەوسییۊوە و جینۊساید کریۊ و ئانەی سەروو کوردیرە ئاما سەروو هەر نەتەوێوە تەریرە ئامۍ ئیساتۍ نامێچش مۊزەخانەنە نەمەنۍ، وەلۍ میلەتوو کوردی وەرگەو گرڎوو جینۊسایدیی و سڕیەیۊکاش گێرت، چونکوم کورد تواناو مەنەیۊش هەنە، کورد ساعیبوو ئا شارستانیەت، کولتوور و کەلەپوورە گەورەینە و زوانێوە دۊڵەمەندش هەن، پەوکای کورد هەر مەنۊوە و مشۊم ئەرەگیراو کورڎسانی ئا ڕاسییە بزانا".

 لایەنە سیاسییەکاو کورڎسان نەتەوەسازی کەرا و واز جە حزبایەتی بارا

 ئا ئەندامەو کۊنگرەی نەتەوەیی کوردی (کەنەکە)، سەبارەت بە گرنگیی یەکڕیزیی کوردی دژ بە ئەرەگیرا و دوژمناش، واتش: "مشۊم هێز و لایەنە سیاسییەکاو کورڎسانی بەرزۍ باوە پەی ئاستوو نەتەوەی و بەیا نەتەوەسازی کەرا و واز جە حزبایەتی، ئایدلۊژیا، کێشە دلێی و حەزە کەسییەکاو وێشا بارا، تا بەرزۍ بیمێوە پەی ئاستوو نەتەوەسازی تا گەلوو کوردی تۊکمە بۊ و وەرانوەرەکێچ ناچارۍ با، کە گۊش جە کوردی گێرا و  ددان بنیا پۊرەشرە و مافەکاشرە، یانۍ یەکڕیزی و تەماموو دلۍ سەروو ئاستوو هەر چوار پارچەو کورڎسانی و سەروو ئاستوو حزبی و لایەنا و خەڵکی جوابێوە پراکتیکیی پەیمانەو لۊزانین، ئی خەباتیچە مشۊم وێما کەرمێش".

 ئازادیی ئۊجەلانی کرێڵوو گێڵایۊ ئاشتیین

 هەرپاسە ئا سیاسەتمەدارە دیارەو پانیشتوو کورڎسانی، باسوو گرنگیی ئازادیی جەستەیی ڕابەروو گەلوو کوردی ڕابەر ئۊجەلان-یش کەرد پەی چەسپنای ئاشتی،  ئەرەیاوناش: "ئا ڕەوشە ئیساتۍ سەرنیشتوو کورڎسانینە گوزەریۊ ڕەوشێوە فرە ناسروشتین پەی گێڵایۊیش پەی چارسەروو ئاشتیی کرێڵوو ئاشتی جە سەرنیشتوو کورڎسانینە بە ئازادیی بەڕێز ئۊجەلانی بۊ ئینەیچ ڕاسیێوەن حەشاش چەنە مەکریۊ"

 جە سیاسەتوو دژایەتیی کوردینە، تورکیا جگە جە ونۍ و یانەوێرانی هیچی تەرش نەچنیەنۊ

ئاخرۊ  ئەبوبەکر هەڵەدەنی سیاسەتمەداری دیاروو پانیشتوو کورڎسانی و ئەنداموو (کەنەکە)، ڕۊشناییش وست سەروو یانەوێرانیی دەوڵەتوو تورکیای بۊنەو بەرڎەوامیی سیاسەتوو نکۊڵیکەرڎەیش جە نەتەوەو کوردی و واتش: "مشۊم دەوڵەتوو تورکیایئانەیە بزانۊ، کە جە سەڎ ساڵی ویەرڎەنە ئا گرڎوو سیاسەتوو نکۊڵیکەرڎەیە جینۊسایدەیە وەراوەروو گەلوو کوردیوە کەرڎەنش هیچیش بەرهەم نارڎەن جگە جە ونمتەی و یانەوێرانی پەی گەلاو تورکیای، پەوکای ددانانیای بە مافەکاو گەلوو کوردیرە و بییەی گەلوو کوردی تورکیانە و پەنەدای مافە دیموکراسییەکاش ئینە چارەسەرا و گێڵایۊ ئاشتی و ئارامیین پەی مەنتێقەکەی".

س.ز