ئەندامەو کۆمیتەو ناوەندی پەکەکەی هێلین ئومێدە جە میانو بەشداریش جە بەرنامێوە تایبەتی مەدیا خەبەرینە، هۊرسەنگنایش پەی پێشئامایەکا ئی دماییەو سووریای و هرووژمەکا دۆڵەتو تورکی و چەتەکاش پەی سەرو سەرنیشت و ۋەرکۊتوو سووریای کەرد.

مەڵامەتی بنەڕەتی هۊرشێونایۆ سووریای نەبیەی دیموکراسی بۍ

هێلین ئومێدە ئاماژەش پانەی دا ڕووەدایەکۍ سەرو سووریای کتوپڕ ڕووەشا دا و واتش: "چن لایەن و کەسێوە چەمەڕاو ئانەی نەبێنۍ چێوەکۍ پاسە بە خێرایی ڕووە بڎا. بێگومان هۊرشێونایۆ دۆڵەتو سووریای تەنیا ۋەرو ئی ڕووەدایا نەبۍ. ڕژێمو سووریای ماوەو ١٢ ساڵان جە لایەنو بڕۍ هێزاوە پارێزگاریش ۋنەکریۍ و مەنەبێوە. پێش وەڵۍ گرڎ چێوێنە مشۆم ئینە ۋەرچەم بگیریۆ. ئەر ئا پاڵپەشتیە نەبیۍ ئانە فرە زووتەر هۆرشێویێوە. هامسەنگییەکۍ ناوچەکەی ڕژێمەکەو ئەسەدیشا ئاستەبۍ.

بێگومان هەر هێزێوە کە گەرەکشا کاریگەریش سەرو گلێرگەی بۆ مشۆم چنی گلێرگەکەیش بۆ. ئینە چێوێوەن و تەڤگەرما جەختش سەرو ئینەی کەردەنۆ و چێوەکە تازە نییا.

هێلین ئومێدە باسش چانەی کەرڎ پېسە ئا شرۆڤا کە تەڤگەرشا سەرو دۆڵەتە تنوتیژەکا پېسە تورکیا، عێراق، ئێرانی کەرێش، دەربارەو سووریایچ هەمیشە واتەنشا مشۆم سووریا دیموکراتیک بۆ و واتش: "دیموکراتیک نەبیەی سووریای مەڵامەتی سەرەکی پرسەکا سووریای و دماجار مەڵامەتو وڕنای ڕژێمو سووریای بۍ. چنی ئا فرە پێکئامایا و باوەڕدارییە جیاوازا سووریای نەتاوۍ سیستەمێوە دیموکراتیک بنیاڎ بنیۆ."

'مەنەیۆ بە ۋۍ هۊرواستەی بە هێزی تەریۆ نمەبۆ'

جە بەردەوامی قسەکاشەنە هێلین ئومێدە واتش: "سووریا فرە پێکئامان و خاوەنو دۆڵەمەڼیێوە کۆمەڵایەتییا. بە مەڵامەتو ئانەی نەتاواش هامسەنگی و ئاشتی دلێینەو ۋێش پێکبارۆ، دەرەنجامێوە پی جۊرەشە چنەکۊتۆ.

چی سەردەمەنە بە ۋۍ هۊرواسای بە هێزی تەریۆ، هیچ هێزێوە تواناو ۋۍ ڕاگێرتەی و مەنەیۆیش نییا. تەماشەکەردۍ جە ئیساتێنە جە سووریای تازەنە گفتوگۆ مکریۆ. ئانۍ ئی گفتوگۆیا مکەرا مشۆم ئی حەقەتینیە بزانا. وچیۆ 'گوایە دەسەڵاتداری عەلەوی دمایش پنە ئاما و سوونی یاگێش گێرتۆ. بە نەمەنەی ئەسەدی گرڎو کێشەکا سووریای چارەسەرۍ بیۍ. ئیتر سووریا ئازاد بی'. پێناسەو ئازادی ئاڼنە پێناسێوە سادە و ئاسان نییا. ئازادی چێوۍ نییا بە فاڕیای دەسەڵاتی بێنە ئاراوە. ئازادی چانەی زیاتەر پەنەوازش بە سیستەمێوە دیموکراتیکی هەن کە گەل پێوەرە کولتوورو ژیۋای وەش بکەرا، ۋێشا بیاونا بە نەتەوەی دیموکراتیکی و سەرو ئا بناغەیە کوۍ باوە. ئا گفتوگۆیۍ جە ئیساتێنە ئینۍ ئارانە نییەنۍ چا چوارچێوەنە."

پڕۆسەو دیزاینکەردەیۆ هەرێمەکەی ڕاوەبەرمکریۆ

هێلین ئومێدە ئاماژەش بە ئاژەو ئیسرائیلی کەرڎ و واتش: "ئیسرائیل جە ناوچەکەنە ئینا جوڵێوە هەژمونوازیینە، هەوڵ مڎۆ ۋێش وەشبکەرۆ. ئا هرووژمۍ جە ٧ و تشرینو یووەمو ٢٠٢٣ێوە ئینا ئارانە سەرو ئی بنەمایۍ هۆرسەنگنا. ئانەی ئینا ئارانە، جە حەقەتینەنە چڕیی و متەیرەو هەژموونگەرایی سەرمایەدارین جە ناوچەکەنە چێگە بە دماوە سەرو ئی بنەما هەرێمییە سەرجە نۆ دیزاین مکریۆوە.

کەس نمەتاوۆ نکۆڵی چینەی بکەرۆ. ناتانیاهۆ هۊرئێست و قسێش کەردۍ، نەک ۋەرو ئانەی کە ئاڎ پاسە ماچۆ، ۋێم پاسە ماچوو. ڕووەدایەکۍ ناوچەکەی گرڎ ئاماژەنۍ پەی ئانەی پرۆسەو سەرجەنۆ دیزاینکەردەیۆ ئینا ئارانە. چی سەروبەڼنەنە نامۍ جۆلانی بریۆ. جە ئەوەڵ قسەشەنە ئاماژەش پانەی دا ئاماڎێنۍ چنی ئیسرائیلی چەمپنەکۊتەی و کۆبیەیۆ بکەرا. دژوو ئێرانین. واتش کە جە دژوو گرووپە شیعییەکا ئەرەکۊشۆ. ئینە سەرنج کێشا.

ئا سیستەمەی جە ئیدلبەنە ئەرەمەرزنابێشا، سیستەمو جەنگەرانی و جەنگی بۍ. فرەیشا جە بنەڕەتەنە گێڵێنێوە پەی گرووپو ئەلقاعیدەی، فرەیشا چنی داعشی بێنۍ. پۊکەی جیای ئانەی دژۍ ئیسرائیلی با، ئاژێوە پی جۆرە مۍ وەردەمما.

پۊکەی مشۊم بوینمۍ کە چێوەکۍ پەیوەندییشا ئینا پێوەرە. ڕەنگە تا ئاکاتەی دەسەڵاتو ۋێشا هێقم مکەرا پەیمانی پی جۆرە بڎا بە جەهانی. بەڵام دیسان ئاژەکە پەنەوازیش بە یاواینەی عالی هەن.

جە ڕوو بڕۍ ئایدۆلۆژییوە ئەر قۆناغەکۍ هۆرسەنگیۆ، بەڕاسی جە سووریایی تازەنە ئاژێوە نادیار ئینا ئارانە. ئا چێوەی سەرەتا باسکریا کە کە گرڎو گرووپەکا چەک بنیارە. پەی چێشی بنیاشەرە؟ چێوۍ نیا ئارانە کە بنیاشەرە. ڕوانگێوە پەی ئایندەی نییا. بەڵێ با یەکپارچەیی سووریای پارێزیۆ. بەڵام ئانە چنی پارێزیۆ؟ وەڵتەریچ ئەسەد ئینەش گەرەک نەبۍ. ئا هێڵۍ ئەسەد پارێزگاریش ۋنە کەرۍ سەرو پارچەکەردەی سووریای نەبۍ. پەی ئانەی سووریا پارچە نەبۆ بە پاو ۋێش هەڵوێسش نیشانەدا. گەرەکش بۍ ۋێش بسپارۆ بە هێزی تەری. ۋێش دا دەسو ڕووسیای و ئێرانی. بەڵام نەتاواش ئەنجام بە دەسبارۆ. سەرکۊتە نەبۍ و وڕا.

تا سیستەمێوە بنیاڎ نەنریۆ کەس وەڵاوە بە هێزو ۋێپارێزنی ۋێش نەکەرۆ

جە ئیساتێنە هێزۍ تەرۍ بەرکۊتێنۍ و ماچا، یەکپارچەیی سووریایما مەتڵەبا. تۆ ۋێت مسپاری بە چێشی و ئینەت گەرەکا؟ یەکپارچەیی سووریای سەرو کام پیمەری مەبۆ؟ جە ئیساتێچەنە عەفریننە هێزو ئەرەگیری بیەیش هەن. تا ئیسە هیچ قسێوە چی بارۆ نەکریان. ئایە دمایی بە ئەرەگیری مێنە؟ ئایە خەڵکەکە جە لایەنو کێ-وە پارێزیۆ؟ جە سەریکانێنە دمایی بە ئەرەگیری مۍ؟ کوردەکۍ جە دژو هرووژمە کۆمکوژییەکا داعشی ١٠ هەزارۍ گەشمەرڎێشا دۍ. جە دژو هرووژمە ئەرەگیری و قڕکارییەکا دۆڵەتو تورکی گرڎ ڕوۍ گەشمەرڎۍ مڎا. ئایە دەربارەو ئی پرسا چێش مکریۆ؟ گرنتی حکومەتی تازەی چێش مەبۆ؟ گرنتیێوە پی جۆرە مکریۆ؟ پۍ چی دەسبەردارۍ چەکی با؟ چی بە یەپەژەی و قەسەدەی ماچا چەک بنیەیدێرە. جە سەرەتاو ئی گفتوگۆیاوە بەڕاسی ئینۍ مرۆڤی وزا گومانۆ. نموونێوە ئایە ئاژەو ژەنا چنین بۆ؟ یەپەژە چێش بۆ؟  یەپەژە هێزو پارێزنای ژەنان. هەڵوێسو جۆلانی و گرووپەکەیش جە ۋەرا ۋەرو ژەنانە چێشا؟ بە نیایرەو دووۍ ژەنا پاڵو ۋێشەنە گرەنتی مافەکا ژەنا نمەکریۆ. ئاژەو مەسیحییەکا چنین مەبۆ، ڕەنگە ئارۆنە جە کڵیسانە لاڵیایۆ و پاڕیایۆ کریابۆ. ئایە چنین بزانمۍ ئینە هۆرخەڵەتناین یا نا. چنی گرەنتی ئینیشا مکریۆ؟ چا کاتەنە تا ئەنجوومەنێوە دیموکراتیک نەمەرزیۆرە، تا مافو گروپی، مافو کۆمەڵایەتی، مافی کەسی جە دەستووری بنەڕەتینە دەسنیشان نەکریۆ، هیچ کەسێ دەسبەردارو سەنگەرو ۋێپارێزنای ۋێش نمەبۆ. هیچ کەسێ نمەتاوۆ دمایی بە هێزو ۋێپارێزنی ۋێش بارۆ. ۋەرو ئانەی مەترسی و هەڕەشۍ کۆمکوژی ئینا ئارانە.

جە دەسو ئیسرائیلینە دیزاینکەردەیۍ جەهانی ئینا ئارانە. بڕۍ هێزۍ دەسوەردای مکەرا. گرڎ کەسێ بە پاو بەرژەوەندییەکاش دەسوەردای جە پرۆسەکەنە مکەرۆ. پرۆسەکە بە ئیراڎە و هەڵوێسی یەکلایەنە نمەلۆڕاوە. تەماشەکەردۍ دۆڵەتو تورکی ماچۆ من کەردم. تورکیا ئینا کەشوهەواو جەژنێنە، لوای مزگی ئەمەوی پەی کەردەی نمۍ، چەمپنەکۊتەی تایبەت. بە جەختکەردەیۆ هەوڵ مڎۆ پەیوەندی ئۆرگانی جە ما بەینو ۋێش و هەتەشەینە نیشانە بڎۆ. گەرەکشا ئا ئیدارە تازەی چا ئەرەمەرزیۆ پێوەسش بکەرۆ بە ۋێشۆ.

تورکیا ئێمە مکەرۆ بە بەهانۍ و گرڎ لێوەرە هرووژم مکەرۆ. تا هێزی بە هەتەشەی واچێنۍ تیرۆرست، ئارۆ مکەراش بە ئۆپۆزسیۆن.

پەی لایەنە پەیوەندیدارەکا، پەی ئانیشا مژنەوا، پەی هەتەشەی، پەی جۆلانی یان پەی ئانیشا کە گەرەکشانە سووریێوە یەکپارچە، بەهێز و ئازادا، ئانەی ئێمە گەرەکمانە واچمێش ئانەنە خاوەنداری جە پڕۆژەو نەتەوەی دیموکراتیکی بکەردۍ. ئەر نەتەوەی دیموکراتیک پێکبۍ ئانە گەلا متاوا پێوەرە بژیۋا و پێوەرە بانۍ هێز."

هرووژمەکۍ تورکیای پەی سەرو هێزەکاو ئازادی

هێلین ئومێدە بە ئاماژەدای پانەی کە دۆڵەتو تورکی جە هرووژمەکاش پەی سەرو کوردی، جە جەنگی کۆمکوژینە، تەمامو نیازەکاش ئاشکرۍ بیێنۍ، واتش: "ڕژێمو ئاکەپە-مەهەپەی، بەتایبەتی ئەردۆغان، هەست بە سەرکردایەتیکەردەی ناوچەکەی مکەرۆ. هەر پۊکەی ڕاسەوخۆ نمەواچۆ هرووژم مکەرو سەرو کوردی، من کوردی قبوڵ نمەکەرو. بەڵکم پەکەکەی و ئەرەکۆشاو ئێمە مکەرۆ بە بەهانۍ و هرووژم مکەرۆ سەر و گەلەکەیما و هێزەکاو دیموکراسی و ئازادی. ئینە جەنگێوە ڕەوا نییا، بەڵکم جنگێوەن کە سەرو بنەماو ئاوەزیەتێوە گڵیاوی ملۆڕاوە، نەک بە شێوێوە ڕۊشن و ئاشکرا.

هرووژم مکەرۆ سەرو شۆڕشو ۋەرنیشتی و گەرەکشا ئەر دەرفەتش پەی گونجیا ئۆپەراسیۆنی ئەرەگیری و دەسسەرەرە گێرتەی ئەنجام بڎۆ. هەرێمەکەی و تەنانەت تەمامو خاکو کوردا بە مێڎانێوە پەی فراوانکەردەی نەتەوەپەرەسی تورکی مزانۆ. هەرپاسە جە قسەکاو باغچەلینە بەرکۆت کە گەرەکشا واچۆ؛ 'ئاڎۍ واڵەو-برۍ ئێمەنۍ بەڵام تورکێنۍ و وەڵێنەکۊتێنۍ.' ئی پلانۍ شکسش ئارڎ، بەڵام هەڵای هەوڵو ئانەی مڎا چاوە بەرەو وەڵۍ بلا. بەردەوام گەرەکشان کوردی ڕووبەڕوو خەسارەتی و زەرەری بکەراوە، گەرەکشانە کورد قوربانی بڎۆ. بەردەوام ماچا ئێمە ئینایمۍ ئاژە و پرۆسێوە هەستیارەنە، مشۆم یۆگێرتۍ بیمۍ؛ بەچ جۆرۍ؟ ئەر گرڎ با بە تورکۍ، ئانە یەکڕیزی بەدی مۍ. ئی ڕێبازە هەم جە پانیشتوو کوردەسانی و هەم جە ۋەرنیشتوو کوردەسانی ملۆڕاوە. ئاڎۍ گەرەکشانە جە ڕاو نکۆڵی کەردەیۆ گەلوو کوردی بوزانە چێرو دەسەڵاتو ۋێشاوە."

مەرامو تورکیای ئەرەگیر کەردەین
سەبارەت بە هەڵوێس و ڕێبازو دۆڵەتو تورکی چیولای، هێلین ئومێدە واتش: "دۆڵەتو تورکی جە پرۆسەو ئایندەی و چی پرۆسەیەنە گەرەکشا چێش کەرۆنە؟ ئەرەیاوناش؛ ئا چەتێ کە وەیش کەردێ، NSA و ئا چەتەکێش کە جە کەمپەکا تورکیانە بێنێ، جە مەنتیقە ئەرەگیریەکانە پەروەردە و ڕاهێنانانشا پنەکریان و دژو شۆڕشو وەرنیشتی بەکارشا مارانە. پاڵپەشتی سەروازی زیاتەر کەرۆ. گەرەکشا هەرێمەکەی ئەرەگیر کەرۆنە و پەێوەسو جوگرافیاو وێش کەرۆ. چونکە یاشار گولەر یەکسەر قسێش کەردێ و واتش: "متاومێنە پەشتگیری و پەروەردەشا کەرمێنە. تەنیا داواکاری کەرا و باجۆرە ڕەوایەتیما داپنە. هەرچن هەڵای حکومەتو ئێستای سوریای ڕەوا نییا. هەڵای گرد بە وریاییپ چنی دۆخەکەی جوڵیا بە تایبەت نەتەوە یۆگێرتەکێ. هەرپاسە هێزەکا مەنتیقەکەی ئامادێنێ و بە وریایی مامەڵە کەرانە. بەڵام تورکیا هەوڵمرۆ بە خێرایی پلانەکاش جابەجێکەرۆنە.
هرووژمەکێ پەی سەرو شۆڕشو وەرنیشتی جە لایەن دۆڵەتو ئەرەگییرە تورکی سەرو ئی بنەمی ملۆ ڕاوە. جە منبج، تشرین، جە تەل ڕفعەت بی جۆرە. بە سەرکەوتەی ساختە هەوڵو فریوداو گلێرگەو تورکیای مرا. چالاکی هەواڵگیری و سیخوڕی پەرەش پنەدریان. ئی هەوڵێ بە ماناو جەنگی تایبەتی مەیا."
" تورکیا دەوری فرەش جە وێرانکەردەو سوریاینە بییەن"
هێلین ئومێدە، بە ئاماژەدای پانەی کە هرووژمەکێ دۆڵەتو تورکی بەردەوام بانە، واتش: "بە تایبەتی چەتەکا بەکارمارانە. تورکیا سەرو ئی چەتاوە وەرمێ و خەیاڵێ فرێش هۆرچنیێنێ. پەرەوردە و ڕاهێنانشا پەی ڕوێ پێسەو ئارۆی پێ. سەرەتا جە لیبیانە دەسشا پنەکەرد. جە بوارە جیاوازەکانە هەوڵشا دا. ئیسە گەرەکشانە NSA پێسەو هێزێوە ئەرەگیری بەکاربارانە. گەرەکشنە پێسەو خزمەتکاری و نۆکەری بەکارش بارانە. هەرپاسە گەرەکشانە سەرو ئی بنەمێ پلانەو هەژموونو وێشا جە هەرێمەنە جابەجێکەرا.
دەور دۆڵەتو تورکی چی وێرانکارییەو سوریای فرە گۆرەن. دۆڵەتو تورکی هەر جە سەرەتاوە جە پڕۆسەو ئەرەگیرکەردەو سوریای پلانەنە پێ. جە حەقەتینەنە کریێ دەورێ تەری برمانۆ. ئەگەر تورکیا دیموکراتیک بیێ، ئەگەر پرسو کوردی چارەسەر کەردێ، ئەگەر جە ڕووەو ئایدیۆلۆژییۆ پەشتیش بە هێڵێوە کۆنەپەرستی و فاشیستی نەبەستی، ئەر زیاتەر کریاوە هەمە لایەنە بیێ و ئازادی ژەناش وەرچەم گێرتێ، تورکیا تاوێنە کاریگەری ڕاس و دروس سەرو سوریا دروس کەرۆنە. تاوێ دەورێ جا جۆرە گێڵنۆ. بەڵام وەرو ئانەی ئاوەزیەتو پاوانوازی و ئەرەگیرکەردەی جە مەشکشەنەبییەن، دەورێ نەرێنیش نیارە جە وڕناو سوریای. ئیسە دۆڵەتو تورکی ماچۆ ئاکە وڕیان، من دروسش مکەروە. گەرەکشا جە ڕاو دەسوەردای ئابووری و سەروازیۆ مەنتیقەکەی وزۆنە چێرو ئەرەگیرکەردەو وێشۆ. تورکیا ماچۆ ئیسرائیل بەرزاییەکا جۆلانیش ئەرەگیرکەردەن، ئەگەر ئیسرائیل ئینەیە کەرۆ منیش جە عەفرینەنە هەمان چێو مکەرو و ئی یاگێ پەیوەسو خاکو وێمش مکەرو."
"ئێمە تا ڕادێ بەئامادەکاریۆ لوێنمێ دلێ پرۆسەکەی"
هێلین ئومێدە جە دماین قسەکاشەنە واتش: "بەسایەو ڕابەر ئاپۆی، وەڵتەر پرۆسەکەما هۆرسەنگناو و بی جۆرە دەسما پنەکەرد. ئێمە پەی بارودۆخو جەنگی جەهانی یەرەمی بێ ئامادە نەبێنمێ. ڕابەرایەتیما بە بەرهەمەکاش جە ئیمراڵینە و بە تایبەت جە ڕاو پەنج بەرگو پارێزنامە بەنرخەکاش، چارەسەرش پەی ئی کێشە تاریخیا پێشنیار کەردەن.
پۆکەی ئێمە جە وەراوەرو قەیرانەکا وەرکەوتوو دلێڕاسەی و ململانێکاش، ڕێبازو ڕزگاربییەی جە دۆخەکەی، به شێوێ وەرجەم و ئاماده و لوای دلێ پرۆسەکەینمێ."
هێلین ئومێدە ئەرەیاوناش؛ گرنگترین چێو پەی ئی پرۆسەیە ئانەن کە چارەسەرو نەتەوەو دیموکراتیکی پێسەو ڕێبازو چارەسەری بە زووترین کات جابەجێکریۆنە.
هێلین ئومیدە سەرهۆردای ئەرەکۆشای دیموکراتیکی پەی گلێرگەی فرەگرنگ وینۆنە و واتش: "تەنیا ئینە متاونە گەلەکەما جە کۆمکوژی و جەنگی پارێزنۆ".
هێلین ئومێدە بە ئاماژەدای پانەی کە گەلو کوردی دەورێ سەرمەشقی گێڵنۆ جە ڕزگاربیەی وەرکەوتوو دلێڕاسەی جە ئاژاوەگێڵنی، واتش: "سوپاو تورکی و دۆڵەتو تورکی کە هەوڵو دلێبەردەی شۆڕشو وەرنیشتی مرۆ، گەرەکشا ئی کارەیە لە جە ڕاو گرووپەکا سوپاو نیشتمانی سوریای جابەجێکەرۆنە.
هەرپاسە فرە گرنگا کورد بە یەکڕیزی و یۆگێرتەی نەتەوەیی چنی پرۆسەکەی نزیک بۆوە. هەرپاسە پەنەوازا چنی دۆساما، هێزە دیموکراتیکەکا، سۆسیالیس و ئازادیوازا چی کاتەنە ئەرەکۆشای زیاتەر پەرە پنەدانە."
هێلین ئومێدە سەبارەت بە وەرنیشتی، جەختش جە گرنگی ئامادەکاری پەی جەنگی گەلو شۆڕشگێڵی کەردۆ و واتش: "جەنگو گەلو شۆڕشگێڵی جەنگێوەن گەل ستراتیژو جەنگو وێش بەرۆنەڕاوە و وێش پارێزنۆنە. سەرمەشقەکا خودو گلێرگەینێ، ئارێ سەرمەشقایەتی ئاژەلەی مکەرا، ڕاو و ڕێبازەکا دەسنیشان کەراو و پەرەش پنەمرا. جە جەهانەنە نموونەش بییەن پەی نموونە جە غەززە گەل سەرەڕاو هرووژمە قورسەکا خاکو وێشا جیا ناست و جە هەمان کاتەنە هەڵوێسێ گرنگشا نیشانە دا.
وەرنیشتەنە بە پەشتبەستەی بە ستراتیژو جەنگو گەلو شۆڕشگێڵی، هەر کەسێ جە تەمەنو ٧پەی ٧٠ ساڵا مشۆم وەرەنگارو جەنگی بۆوەو و هەڵوێس نیشانە دۆنە. جە حەقەتینەنە ئا پەیامێ کە دریا بی جۆرەنه. جە چەمپنەکەوتەی گردییەکا وەرنیشتی ئی ئیرادەیە وینمێ. ئینەیچ مشۆم پەرەش پنەدریۆ. بێگومان مشۆم بە هێزۆ وەرگری جە پێگەکاما کەرمێ. مشۆم بەهێزۆ جەنگ کریۆ. پۆکەی ئینایمێ سەردەمێنە کە متاومێنە چارەنووسما بەدەسو وێما دیاری کەرمێنە."