رابەروو گەلوو کوردی عەبدوڵا ئۆجالان کە ٢٥ ساڵێن جە زینڎانوو دورگەو ئیمراڵینە گۆشەگیر کریان، ماوەو زیاتەر جە ٣ ساڵان بە هیچ جۆرێوە هەواڵش مەزانیۆ. جە پارێزنەرا نوسینگەو یاسایی پاریسی ژان پرۆسپێر ئاستی یاسایی گۆشەگیری ئیمراڵی و مامەڵەو سی پی تیش جە چەمپنەکۊتەیێنە پەی ئاژانسوو هەواڵوو فوراتی (ANF)ی هۊرسەنگنۍ.

' ئیمراڵینە قەرارەکۍ دادگاو مافەکاو مرۆڤوو ئەوروپای پاشێلۍ مکریا'

پارێزەر ژان پرۆسپێر کە یۆ جە بەشدارا کۆنفڕانسەکەو ١١و نیسانی جە پەرلەمانوو ئەوروپاینە بۍ، کە جە بارەو گۆشەگیری ئیمراڵیۆ سازکریا، ئانەش وست ڕووەکە ئامانجی بنەڕەتی مافناسا ئانەنە کە سەرنج وزانۍ سەروو ئاژەو گرڎیی و پاشێلکارییەکا ۋەرا ۋەر بە زینڎانیا سیاسی.

پارێزنەر پرۆسپێر ئانەش وست ڕووە کە هەلومەرجوو عەبدوڵا ئۆجالانی دژوو پەیماننامەو مافەکا مرۆڤوو ئەوروپاین و واتش، "جگە چانەی، سەرەڕاو ۋییەرنای ئا گرڎ وەختیە سی پی تی هەڵای پێشنیازەکۍ ۋێش پەیوەس بە ئیمراڵی پەی رای گرڎیی ئاشکرا نەکەردێنۍ. جە ئاژێوە پاسەنە سەبارەڎ بە ئاژەو زینڎانیکەردەی عەبدوڵا ئۆجالانی هیچ زانیاریێوە ۋەردەس نیا. ئانەیچ پاشێلکاری قەرارەکاو دادگاو مافەکا مرۆڤوو ئەوروپاین جە بارەو ئۆجالانیوە".

'پەی زانای ئاژەو ئیمراڵی گوزارشتەو سی پی تی گرنگەنە'

پارێزنەر پرۆسپێر دەسنیشانش کەرد، کە پەی زانای ئاژەکەی فرە گرنگا کە گوزارشتەو ئی دماییەو سی پی تی ئاشکرا بکریۆ و پی جۆرە بەردەوام بۍ، "پەی ئانەی کاراکتەرەکاو گلېرگەی مەدەنی بزانا ئیمراڵینە چېش ڕووە مڎۆ، پەنەوازما بە گوزارشتەو سی پی تی هەنە. حەرپۊکەی فرە گرنگا کە ئا گوزارشتۍ جە ماوێوەکەمەنە پەی رای گرڎیی ئاشکرا بکریۆ".

'مشۊم ئێمە فشارێوە سازبکەرمۍ'

پارێزنەر پرۆسپێر ئانەش وست ڕووە، کە پەی دمایی ئاردەی بە گۆشەگیرکەردەی عەبدوڵا ئۆجالانی و هاندای رێکوزیا پەیوەندیدارەکا پەی بەیاگۍ یاۋناو ئەرکەکاشا مشۆم جە گرڎ شۊنێنە کۊشیای درێژەش پنە بڎریۆ و واتش، "پەی ئانەی کاربەدەساو تورکی رێز جە قەرارەکا دادگاو مافەکا مرۆڤوو ئەوروپای بگێرا دماتەریچ چەمڎارا سەربەخۆی بتاوا هەلومەرجوو ئیمراڵی جە نزیکۆ کۆنتڕۆڵ بکەرا، مسۆم ئێمە فشار بکەرمۍ. هاموەخت پېسە مافناسا پەی ئانەی سی پی تی گوزارشتەکاش جە بارەو ئاژەو عەبدوڵا ئۆجالانیۆ ئاشکرا بکەرۆ، فشارەکا چڕۍ بکەرمېوە".