دماو بانگەواز و ئاشتی و گلێرگە و دیموکراتیکو ڕابەر ئاپۆی، مژارو دیموکراتیکبییە و تورکیای جارێوە تەر کەوت ڕۆژەڤۆ، کە ساڵانێوە جە تورکیانە گیریش کەردەن. پەیوەس بە بانگەوازییەکەی سەر و بنەما دیموکراتیزەکەردە و تورکیای پەکەکە قەرار و دمای ئاردەی بە ئەوەکۆشای چەکداریش ئارد. چنی بەردەوامی پرۆسەکەی چەمەڕاییەکێ پەی هەموارکەردەیۆ یاسایی جە تورکیانە زیاتەر بۆنە، بە تایبەتی ئا بابەتێ پەنەوازا سەرەتا فاڕییایش دلێنە کریۆنە 'مافو هیوا' ی و  فاڕییای دەستوورییا.

هامسەرۆکو لقو ئامەدی جەمە و یاساناسا پەی ئازادی (ئۆهەدە) پاریزەر محێدین موگوچ پەیوەس بە پرۆسەکەی ئاماژەش پانەی دا پرۆسەکە تەنیا ڕەهەندێوە سیاسیی نییا، بەڵکوم هامکاتەنە ڕەهەندێوە یاسایایش هەن. موگوچ پەیوەس بە 'مافو هیوا'ی  واتش، بریتییا جە مافو زینانی کریا پەی ژیوای کە دادگاو مافو مرۆڤو ئەورووپای (DMME) بە بنەما گێرۆنە و مافو هیوایش با جۆرە هورسەنگنۆنە.

موگوچ جە بەردەوامینە ئینەش وات: "دۆخو ئێژا ئۆجالانی سیمبوڵێوەن و تایبەتا. بەڵام  مافو هیوای تەنیا بە ئانەیۆ سنوردار نییا. بەڵکوم پەیوەس بە گرڏ و زینان کریایا هەمیشەییا. گرڏ ڕوێ مەنەیۆ جە زینانەنە بەماناو پاشلکەردە و مافو هیوای مێ."

موگوچ ئاماژەش پانەی دا کە جە چوارچێوەو قەرارەکە و دادگاو مافو مرۆڤو ئەوروپای سەر و ئۆزکان ئیکنجی، تاوەکو ئەیلولو ٢٠٢٥ کات دریان بە تورکیای. موگوچ واتش،"ئەر ئا قەرارە جابەجێ نەکریۆ، بابەتەکە تەنیا مافێوە تاکەکەسی نییا، بەڵکوم کاریگەری سەر و پێگەو مییاننەتەوەیی و دلێشەنە ئەندامێتی تورکیای جە ئەنجوومەنو ئەوروپاچ بۆنە. ئەر تورکیا بە پاو  قەرارەکا دادگاو مافو مرۆڤو ئەورووپای هەرمانە مەکەرۆ، ڕەنگە مافو ئەندامێتیش چنە هورگیریۆوە."

موگوچ باسش چانەی کەرد جە تورکیانە کورد تەنیا چێر و نامێ ناسنامە و "تورک"ـنە تاوۆنە بۆنە خاوەن ماف، ئی بارودۆخەش بە 'پاشێلکەردە و یاسا بنەڕەتییەکا' هورسەنگنا و واتش: "چارەسەر دانیا پۆرەی بە یاسێ و دیموکراسی. پەی یاوای بە مافو هیوای، پەنەوازا ریفۆرمێوە گۆرە جە یاساو جابەجێ کەردەی بێ ئاراوە. نەک تەنیا مافو ئێژا ئۆجالانی، بەڵکوم مافو گەلێوە زینانی ئینا چا چوارچێوەنە. تاوەکوو نایەکسانییەکێ جە یاساو جابەجێ کەردەینە لانەبریۆ، ئانە مافو هیوای بەڕاسی پێکنمێنە."