فەرمانڎەیی قەرارگەو ناوەندو پارێزنای گەل (نەپەگە)ی، بەڕێزۊ یاڎوو فەرمانڎە فازیل (ئەحمەد شەکەر)یش کەرڎۊ و ئەرەیاوناش: "بە هەڵوێس، جووڵە و ژیوای وێش لوۍ دلۍ دڵوو خەڵکیوە، ئاپۊییێوە هەقەتین بێ".

جە ئەرەیاوناکەو فەرمانڎەیی قەرارگەی ناوەندی پارێزنای گەل (نەپەگە)ینە ئامان:

هامڕاما گەشمەرڎە فازیل (ئەحمەد شەکەر) دەور و ڕەنجێوە گەورەش لە کۊشیای ئازادیی کورڎسانی و جەنگوو پارێزناینە هەن. ئەوەڵ سەرەوەشی جە بنەیانەی ئازا و ئازیزوو هامڕا فازیلی، گەلەکەیما جە بۊتاننە، گەلی وەڵاتپارێزوو کورڎسانی و گرڎوو ئا هامڕایا مەیڎانەکاو خەباتی و کۊشیای کەرمۍ، ئێمە جە کەسایەتیی هامڕا فازیل-ینە بەڕێزۊ یاڎوو گرڎوو گەشمەرڎەکاما کەرمێوە.

هامڕا فازیل، شۊڕشگێڵن و کۊشەرێوە چەنەئاما، جەنگەوانێوە قارەمان و ئازا و فەرمانڎێوە سەرمەشق بۍ، کە فەزیلەتە بەرزە ئینسانییانەکۍ ئاپۊییبیەیش دلێنە بێنۍ، جە دەگاو گتۍ جە بۊتاننە بناروو کەشوو جودی-ینە، کە وەڵاتپارێزیی کوردی دلێشەنە قووڵا جەئەدۍ بییەن. دەگاو گتۍ ئینا بەینوو سەرنیشتی و پانیشتی و وەرکەوتوو وەڵاتەکەیمانە. هامڕا فازیل جە دەگاو گتۍ دلۍ ژیوگێوە ڕۊشنویری و کولتووریی دۊڵەمەنڎینەگەورە بی. خەڵکوو بۊتانی دایمە پەشتگیرییشا جە مڎرا مانوو کورڎا گرڎوو پارجەکاو کورڎسانینە کەرڎەن، جە مڎرا مانوو کورڎانە جە گرڎوو پارچەکاو کورڎسانینە چالاکانە بەشڎارۍ ئا مڎرا مانی بیێنۍ. گەلوو بۊتانی دایمە ئاواتوو کورڎسانی ئازادیشا دلۍ دڵوو وێشانە بەرز و باڵا کەرڎەنۊ، وەختۍ جمیەری ئاپۊیی مەنتێقەنە گەشیاوە، پەیوەندیێوە قووڵشا جە ناخوو دڵیوە چەنی پەکەکەی مەرزنارە، دەوڵەتوو تورکی پەی ڕاگێریکەرڎەی جە جمیەروو ئازادی، خەیاڵش بۍ دەگاو گتۍ کەرۊ جەرڎەوانۍ و دژوو کۊشیای ئازادی بەکارشا بارۊ، وەلۍ دەگاو گتێی وەڵاتپارێزە داکۊکی و وەرگێرییشا جە وەڵاتپارێزیی خۊیان کەرد. هامڕا فازیل چا ژیوگە و چوارچووە کۊمەڵایەتییەنە دەسش بە کۊشیای کەرد.

هامڕا فازیل بی بە قارەمانێوە گەلی

هامڕا فازیل بەها وەڵاتپارێزییە کۊنەکاو خەڵکوو بۊتانی، سروشتە کۊمەڵایەتییەکەش، کە دلێنە نەبریان، جە کەسایەتیی عەگیدی و یارای گەلینە، بە ئایدۊلۊژیای ئاپۊیی وستش یۊ و بی بە پاڵەوانوو گەلی. هامڕا فازیل جە جەنگەوانیوە دەسش پەنە کەرد و هەنگام بەهەنگام بەکرڎەوە جە پراکتیکوو جەنگینە گەورە بی. وێش گرڎوو ئەزموونەکاش تاقیۍ کەرڎێوە، ئەزموونوو وێش جە چنڎین هامڕایاوە ور گێرت، کە پاڵشنە و شانە بەشانەو وێش جەنگوو ئازدینە گەشمەرڎۍ بیۍ، بی بە فەرمانڎێوە ئارگەکەی، کە بە تایبەتمەنڎییەکاو کەسایەتییە چالاکەکەیش ئشناسیۍ. بی بە سەرمەشق پەی سەدان هامڕایاش و بی بە فەرمانڎەی ئەفسانەیی بۊتانی. ئاڎ ڕۊحی فیدایی ئاپۊییش فاڕا پەی نۊعوو هجوومی قورسی و گورزی فرە گەورە و قورسش جە دوژمنی دا، ورگێرتەی چەکوو سەروو دوژمنیش کەرد بە بنەما و شێوازێوە پەی وێش، ئیرادەو وێش ملوو دوژمنیرە سەلەمنا و ڕاسیی جەنگیش پاسە چەسپنا، کە حیچ کەس نەتاوۊ نکۊڵییش چەنە کەرۊ. فرەو مەنتێقا بۊتان-ینە  ئاستی یووەمینوو وەرپەرسبییەیش گێرت گەرڎەن، پلانسازیی چنڎین چالاکییە سەرکەوتاش متەرە و وێش ئا چالاکیێشە کەرڎۍ، پێسە هامڕا "کەمال پیر"ی وێگیر و وەرگێر بۍ، دایمە وەڵۍ وەڵیوە بۍ، بەشڎاریکەرڎەیش هەرمانە و خەباتنە پەی وێش کەرڎەبێش بە بنەما. پێسە فەرمانڎە عەگید-ی بی بە فەرمانڎەما، کە ئازایانە کووۍ سەروو دوژمنی و بە ڕۊحوو هەقسانایۊ گورزۍ قورسۍ ئۊو دوژمنی دۍ.

پێسە دەروێشەکا بی

ئاڎ کۊشیایش بە "تیکێوە، کەوێوە" هامڕایی هەقوو قەراریش بە جمیەری ئاپۊیی زیاڎ کەرد، کەشەکاو کورڎسانینە پانەیە بەقووڵی ژیوا و بەکرڎەوە ئانەش کەرد. ئاڎ گرڎوو بەهایەکاش پارێزنۍ، سەروو بنەماو ئانەی ئانیشا کەرۊ بە بنەماو کۊشیای، جە سەختتەرین وەختەکانە چەنی هامڕایەکاش بەشش کەرۍ، وەروو ئانەی نرخەکا گەورۍ کەرۊ کۊشیۍ. دایەوخوای ژیوایشنە تەرکیزش سەروو دماتەری و چارەنویسی بۍ، حساب پەی کۊشیای و خەباتێوە دوورودرێژی کەرۍ و پێسە دەروێشەکا بۍ. بە کەسایەتییە نەفسقورس و خاکییەکەیش بە تایبەتمەنڎییە هامبەشکارەکەیش بی بە فەرمانڎێوە، کە وێش جە گرڎوو پێویستییەکاو هامڕاەکاش بە وەرپەرس زانۍ، سەرنجە وزۍ سەروو گرڎ چێوێوە جەنگەوانا چێروو فەرمانڎەیی، وەختۍ خزمەت بە هامڕایەکاش کەرۍ ورە ور گێرۍ، فەرمانڎێوە چانە بۍ، کە گرڎوو هامڕایەکاش وەششا ئسیۍ و قەدرۍ فرەش گێرێنۍ. هامڕا فازیل بە ئەزموونی فرەو ساڵانەو وێش دلۍ کۊشیاینە، پانەی جە ڕابەر ئاپۊ-یۊ فێر بی و چەنەش ور گێرت، خەتەی ئایدۊلۊژییە، ڕێکوستەی و سیاسییەو پەکەکەی یاوانە و جە کەسایەتیی وێشنە کەردش بە ئشناسنامە. بە هەڵوێس، جووڵە و ژیوای وێش لوۍ دلۍ دڵوو ئینسانەکاوە، ئاپۊیێوە هەقەتین بۍ.

هامڕا فازیل یۊ جە فەرمانڎە ئەفسانەییەکاو ئارگەکەی بۍ. سەرمەشقوو گەریلایەتی سەرڎەمی تازەو هەپەگەیچ کەرۍ. فەرمانڎێوەما بۍ، کە تاکتیکی تازەو یاوینەیش جە سەرکەوتەی جەنگینە وست وەڵۍ. زانیاری و هۊشیاریی سەروازی، زانایی جە تاکتیکوو گرڎوو بوارە سەروازییەکانە بە ئارڎەینە کەرۍ بە کرڎار و پراکتیک و پانەیچە بی بە فەرمانڎێوە بێوێنە و بێهامتا. سەروو بنەماو وەڵیکەوتەی هەڵمەتەو ١وو حوزەیرانوو ٢٠٠٤ینە لوا پەی حەفتانین-ی و چاوە پەی بۊتانی، بی بە سەرمەشق و سەرکرڎایەتییش گێرت گەرڎەنش.

 دماتەر ساڵەو ٢٠٠٥ینە لوا دلۍ هەرێموو جۊلەمێرگی و هەڵمەتەکێش یاونا پڕۊسێوە تازە. بەشڎارییش جە چنڎین چالاکییا و جەنگانە کەرد و داستان و کرڎۍ سەرکەوتانێش تۊمارۍ کەرڎۍ.

هامڕا فازیل حەر جە ساڵەو ٢٠٠٧یوە، گرنگییش بە جەنگوو تونێلەکا دا و ڕەنج و کۊشایۍ فرەش پەی ئامادەکاری چا بوارەنە کەرد. ساڵەو ٢٠٠٨ بی بە فەرمانڎە و موهەندیسوو مەڕیای سوپاو تورکی جە زاپ-نە. جە مەڕەو بریندارینە بە پاگێرتەیرێوە فرەوە دژوو هجوومەکاو دوژمنی مرڎاوە و نەک حەر هجووموو ئەرەگیراش پووچەڵ کەرڎۊ، بەڵکوم گورزێوە تاریخیچش جە سوپاو تورکی ئەرگیری یاوانا. جە سەختتەرین مەنتێقەکانە حەرگیز دەسمرڎا نەبۍ و زانۍ چەنی هومێڎ خولقنۊ. ئانەیچ نەک نەک حەر بە واتەی، بەڵکوم بە کرڎەوە پراکتیزەش کەرۍ و کەرێش بە واقیع. هامڕا فازیل  سروشتنە، کەلیمەکێش، چالاکی و پراکتیکنە هەستیاریێوە فرەش پەرە پەنە دا و بی بە نامۍ فەرمانڎێوە و گەریلایەتییێوە، کە سەرکەوتەی خولقنۊ.

جگە ئانەی کە هامڕا فازیل جە ساڵەو ٢٠١١ینە بە سیستموو وەرگێری و پارێزنای هجووموو هێزەکاو ئێرانیش پەی سەروو قەندیلی پووچەڵۍ کەرڎێوە.

فەرمانڎێوە کورڎسانی

هامڕا فازیل فەرمانڎێوە کورڎسانین. وەختۍ چەتە فاشیستەکۍ  دژوو گەلاو سەرنیشتی و وەرکەوتوو سووریای هجوومی کۊکوشیشا کەرد، وەروو ئانەی مڎرا مانوو گەلەکەیما بەقووەتتەر و زیاڎتەر کەرۊ، بەشڎاری چا خەبات و کۊشیاینە کەرۊ و ئەزموونوو دەیان ساڵەو وێش وزۊ خزمەتوو گەلەکەیما وە دەسش بە جمووجووڵی کەرد، بە فیداییانە بەشڎارییش چی کۊشیاینە کەرد. ئاڎ زانۍ، کە پێویسا بۊ بە فەرمانڎێوە، ئەنجام دەس وزۊ و سەرکەوتە بۊ و درێژە بە تۊمارکەرڎەی سەرکەوتەی بدۊ، پەوکای هەرمانەو سەرمەشقبییەی وێش بەخاسی و شیایی کەرۍ،  هەزاران جەنگەوانێش پەروەرڎۍ کەرڎۍ و پانەیچ جوابوو هجوومەکاو سەروو گەلەکەیماش داوە و هجوومەکێش ماڕۍ.

هامڕا فازیل ئا سەرکەوتەیێشە تۊمارۍ کەرڎۍ و بەدەسش ئاورڎۍ، کە جە عومرێوە ئاسایینە بەدەس نمەیا. جە بۊتانۊ تا زاگرۊس، جە قەندیلۊ تا حەفتانین، جە حەرچوار پارچەو کورڎسانینە جە ئاستی باڵانە وەرپەرسبییەیش گێرت گەرڎەن. چنڎین جەنگۍ فەرمانڎانێش کەرڎێنۍ، سەدان جەنگەوانۍ و فەرمانڎێش پەروەرڎۍ کەرڎێنۍ. جە حەر یاگێنە پێویسیی کۊشیایما پەنەش بیۍ، بۍ دووەدڵی و بە پەرۊشیێوە فرەوە چاگە بۍ و هەرمانەکاش پۊڕنۍ.

جە گرڎ یاگۍ  کورڎسانینە کۊشیان و سەرکەوتەیش تۊمار کەرڎەن. هامڕا فازیل-ما پێسە تاواش بۊ بە فەرمانڎێوە کورڎسانی. ئەو ٣٤ ساڵۍ جە عومروو ٥٤ ساڵەو وێش کۊشیاینە بەرد سەر. دلۍ گەلی و هامڕایامانە، شۊنێوە قووڵە و کاریگەرە و ویرۊنەشیێش جیا ئاستێنە، ئێمە پێسە هامرایاو فازیلی، کە شانە بەشانەش و پالشنە جەنگما کەرڎەن، قەرارمدەیمۍ، کە دایمە درێژەپەنەدەرۍ ڕا و رێبازوو هامڕا فازیلی بیمۍ، فەرمانڎەیەتییەکەیش کەرمۍ نموونە و گەریلایەتیی سەرکەوتانەیش کەرمۍ ڕاسیۍ و بەدڵنیاییوە ئامانجەکاش مارمۍ دی".

س.ز