ئامادەکارییەکێ بەردەوامێنێ پەی ڕاپیمای درێژوو 'ئازادیی پەی ئۆجالان'ی، کە گرد ساڵێوە لاو ڕیکوستەی گەنجاو کوردی و ئەنتەرناسیۆنالیستاوە کریۆ. چا چوارچوەنە قۆڵوو ڕاپیمای ئازادی بە سەرمەشقایەتیی گەنجاو کوردی، جە ٩ شوباتینە شاروو مانهایموو ئەڵمانیاینە دەس پەنە کەرۆ. هەرپاسە ١١و شوباتینە شاروو بازلوو سویسراینە بە سەرمەشقایەتیی ئەنتەرناسیۆنالیستا ڕاپیمای دەس پەنە کەرۆ، قۆڵوو یەرەمیچ  ١٥و شوباتینە  شاروو ستراسبۆرگوو فەڕەنساینە ڕاپیمای کریۆ و دماتەر حەریەرە قۆڵەکێ چا شارەنە ڕاپیماێوە  ناوەندیی کەرا و ١٧ شوباتینە پەی ڕاپیمای وەرفراوانی ناوەندی  شاروو کۆڵنوو ئەڵمانیاینە ئامادێ با.

بارەو ئی چالاکییە هامبەشاوە چالاکەی ئەنتەرناسیۆنالیستە پەی ئاژانسوو هەواڵوو فورات (ANF)ی واتش.

١٥ شوباتینە مشۆم کوردێ و ئەنتەرناسیۆنالیستێ باوە یەک دەنگ و پیلانگێڵنیی میاننەتەوەیی دژوو ڕابەر ئاپۆی شەرمەزار کەرا. داوا کەرمێ گۆشەگیری سەروو ڕابەر ئاپۆی دماییش بێ. ڕاپیمایەکەینە دۆسیێ دەیمێ دەسوو شارەوانییەکاوە و هەرپاسە کارتێ کیانمێ پەی ئیمراڵی.

نۆرا واتش نزیکەو ٢٠٠ چالاکە ئەنتەرناسیۆنالیستا بەشدارێ ڕاپیمایەکەینێ، کە حەریۆما وەڵاتەکاو وێمانە دلێ هەرمانێ و پیشەی جیاوازینە خەبات کەرمێ. درێژەو قسەکاشنە باسش جە هەڵمەتەو 'ئازادیی پەی عەبدوڵا ئۆجالانی، چارەسەروو کێشە سیاسییەکاو کوردی 'کەرد و واتش: "ئێمە تەنیا دۆسێ گەلوو کوردی نیەنمێ، بەڵکوم هامڕێچشانمێ، هامڕا کوردەکێما، ئشناساێوە چینە پەی پەیوەندیی ئێمە و کوردا دروستەرا".

'چا ڕوەنە گرد کەسێوە کۆڵننە ئامادە بۆ'

نۆرا مەرینۆ واتیچش ١٧ شوباتینە حەر یەرە قۆڵێ ڕاپیماکەی بەشدارێ ڕاپیمای ناوەندیی با و واتش"پەی ڕاپیمای١٧شوباتی، حەرنەتەوێوە، حەر عومر و باوەڕدارێوە مشۆم بەشدارێ بیمێ. ئازادیی جەسەیی ڕابەر ئاپۆی ئازادیی ئێمەن. مشۆم سەروو ئی بنەمێوە قەرار بدەیمێ، پەوکای مشۆم چا ڕوەنە گرد کەسێو ئامادە بۆ".