نێرگز محەممەڎییە چالاکەو ئێرانی، کە خەڵاتوو نۊبڵوو ئاشتی-یش پەنە بەخشایبۍ، دماییش پا مانگێرتەیە ئارد، کە ٦وو تشرینوو دووەمینە دەسش پەنە کەرڎەبۍ. محەممەڎییە بۊنەو نەوەشیی دڵیوە فاڕیاوە پەی خەسەخانەی و دماتەر ڕوانەو زیندانی کریاوە.
بنەیانەو نێرگز محەمەڎیۍ چالاکە و زیندانیکریۍ و براوۍ خەڵاتوو نۊبڵوو ئاشتیی ساڵەو ٢٠٢٣، ڕۊو جومعەی هەینی پەیامێوەش وەڵا کەرڎۊ. بە پاو پەیامەکەی، محەمەڎییە دماو ئانەیە بەبۍ سەرپۊش یاونیێنە خەسەخانە، دماییش بە مانگێرتەکەیش ئارڎەن.
بە پاو ئا پەیامەیە، کە تۊڕەو کۊمەڵایەتیی ئینستاگرامینە وەڵا کریانۊ، نێرگز محەمەڎییە واتش: "ڕۊو چوارشەممەی بەبۍ ئانەی سەرەیم پۊژنوورە زیندانۊ فاڕیانۍ پەی خەسەخانەی".
ئا چالاکە سیاسیۍ کە ٥٠ ساڵێنە، زیاتەر جە ویس ساڵان دژوو سەپنای حیجابی سەروو ژەنارە و سزاو قەنارەدایرە کۊشیای کۊشیۊ. تا فاڕاشۊ پەی خەسەخانەی مەرجەشا بۍ، کە سەرپۊش بدۊرە. ئا چالاکۍ مەرجەکەش ڕەت کەرڎۊ و ٦وو ئی مانگێوە دژوو ئا سەپنایە مانیش جە وارڎەی گێرتە.
بە قسۍ بنەیانەکەیش، نێرگز محەمەڎییە نەوەشە بیێنە و ئشیا دەمودەس یاونیۍ خەسەخانە.
نێرگس محەمەڎییە ئینەشە وەڵا کەرڎەنۊ: "دماو ئانەیە فاڕیانۍ پەی خەسەخانەی بۍ ئانەیە سەرپۊش دەورە، گێڵانۍ زیندان و مانگێرتەکەیم ماڕا ".
دەروازەو خەسەخانەکەینە، وەختۍ هامڕۍ و و کەسوکارش چەمەڕوانێش بێنۍ، پەی ماوێوە کوڵی دەستگیرکران و ئەوەکۊڵیایشا چەنی کریا و کامێرەکێشا گێرتۍ.
بە پاو ئا پەیامەیە بنەیانەکەیش وەڵا کەرڎەنۊ نێرگز محەمەڎیۍ واتەن: حکومەت تەرسەو ئانەیش هەنە بە بۍ حیجاب بوینییەو، تا ئا وەختە حیجابی سەپیا لا مشۊ من بەبۍ حیجاب گێڵوو، ئادۍ وەختێوە ژەنێوە بێحیجابە موینا لەرزا.
نێرگز محەممەڎییە ١٣ جارۍ گیریێنە و گرڎیوە ٥ جارۍ حکوم دریێنە، کە کەرۊ ٣١ ساڵۍ زیندانی و ١٥٤ دار قامچیۍ. ساڵەو ٢٠٢١ جارێوە تەر گیریاوە.. نێرگز محەممەڎییە بییە بە یوە جە سەرمەشقەکاو سەرەورڎای "ژەنی، ژیوای، ئازادی" ئێران و وەرکەوتوو کورڎستانینە.
کۊمیتەو نۊبڵی ٦وو تیشرینوو یوەمی خەڵاتوو ئاشتیشا بەخشا بە کۊشیۍ نێرگز محەممەڎیۍ.
نێرگز محەممەڎییە چالاکەو مافوو ژەناو ئێرانی پەیامێوەنە، کە زیندانۊ کیانانش ماچۊ: "سەرکەوتەی ئاسان نییە، وەلۍ بەدڵنیاییوە بەدەس مێ". ئی پەیامە کە کناچەکێش بە فەڕەنسی واناوە، ئەوەڵوو مانگەو گەڵارێزانی پەلیانەی ڕسمیی نۊبڵی وەڵا کەرڎۊ.
