تەمامو بەڵگەکا لوایڕاوەو کۆنگرەو ١٢ـەمینو پەکەکەی جە ژمارە ٥٢١و مانگۊو ئایارو سەرخۆبوونیەنە وەڵۍ کریێوە. هەرپاسە نەرین و سەرنجەکۍ ڕابەر ئاپۆی کە جە زینانو ئیمراڵیوە پەی کۆنگرەو ١٢ـەمینو پەکەکەیش کېیاستێبێنۍ پەی یووەمجاری جە ڕۆنامەو سەرخۆبوونیەنە وەڵاکریاوە. چنی نەرینەکا ڕابەر ئاپۆیچ پەیامی تاریخی، دەقو گرڎیی قسەکەردەی سەرەتاو کۆنگرەی و بینای کۆنگرەکەی، ئە قەرارۍ چنەشەنە هۊرگیریۍ و پەیلواو ئەنداما کۆنگرەیچ وەڵۍ کریێوە.

جە ژمارەو مانگۊو ئایارو ڕۆنامەکەینە چڼین نویستەیۍ تێروتەسەلۍ دەربارەو ژیۋای هەردوو کادرۍ سەرمەشقۍ پەکەکەی گەشمەرڎە عەلی حەیدەر قەیتانی و ڕەزا ئاڵتوونی وەڵۍ کریێنێوە. هەرپاسە دەربارەو گەشمەرڎە پەلین زۆزانۍ (پەلین یڵماز)ۍ کە چن مانگی ۋېیەردە گەشمەرڎەبیەیش ئەرەیاۋېیا، ئۆزان مزگین (غوربەت ئایدن)ە و شۆڕشگێڵنا تورکیای (سێ شتیل) نویستەی وەڵاکریانۆ.

'هیوا و باوەڕیم پەی سەرکۊتەی گۊرەن'

ڕابەر ئاپۆ بە گوزارشتێوە "نەرینێ"وە ٢٠ پەڕەیی و نامێوە چوارخاڵیۆ بەشداری کۆنگرەو ١٢ـەمینو پەکەکەی بی. ڕابەر ئاپۆ جە نەرینێنە ماچۆ: "خودو ئی گلېرۊبیەیشا ڕەنگە نیمەو پرۆسەو چارەسەریی بۆ. جە ئیساتۍ دماتەریچەنە پەنەوازش بە کۊششی جەوهەری و سەنگینی هەن. هیوا و باوەڕیم پەی سەرکۊتەی گۊرەن." ڕابەر ئاپۆ بە نامونیشانێوە حۆت خاڵی باس جە سەردەمی تازەو ئەوەکۊشای مکەرۆ.

نامونیشانەکۍ پی جۊرەنۍ:

١- سروشت و مانا

٢- سروشتی کۆمەڵایەتی و گرفتەکێش

٣- دوالیزمو دۊڵەتی و کۆمۆنیزم دلۍ گلېرگەی تاریخینە

٤- مۆدێرنێتە

 

٥- حەقیقەتو کورد و کوردەسانی

٦- پەکەکە و دمایئاردەی بە کار و کۊششەکاش

٧- نەرینەکۍ سەردەمی تازەی

ڕابەر ئاپۆ کاتێ نەرینو سەردەمی تازەی پێشكەش مکەرۆ، ماچۆ 'مژارو دمایئاردەی پا کار و کۊششا چێرو نامۍ پەکەکەینە مکریا، مژارێوە تازە نیا لاماوە'. دەسنیشانش مکەرۆ پېوەس بە بڕیارەکەو پەکەکەی؛ پرسەکە بە تەنیا دمایئاردەی بە کار و چالاکییەکا کە چېرو نامۍ پەکەکەینە مکریا نییا، بە لایەنە ئەرێنی و نەرێنییەکاشۆ ڕەنگە پەنەواز بکەرۆ چڼین مانگۍ گفتوگۆکەردەی بۆ و دەربارەو مەڵامەتو ئانەی ماچۆ: "ۋەروئانەی بە تەنیا باسو هەیکەلێوە نمەکەرمۍ. باسو فاڕیای ویرکەردەیۆ و بنەڕەتی کەسایەتی مکەرمۍ. عالتەرین وەشبیەیۆ پی جۆرە بۆ. پەی ئانەی پرۆسەکە بەشێوێوە بنیاڎنەرانە بلۊڕاوە و بیاوۆ بە ئامانجو ۋێش، نمەبۆ ئینسان پەلە بکەرۆ."

ۋەرپرسیاری وەشکەردەی چوارچێوەو ئەنەیاوای تیۆری

ڕابەر ئاپۆ پی نەرینەیشە باس جە ئەرک و ۋەرپرسیاریەکا مکەرۆ پېوەس بە پرۆسەکەی: "نەرینو سەردەمی تازەیما سەرو بناغەو نەتەوەیی دیموکراتیک، ئیکۆ-ئابووری و کۆمۆنەلیزمی سەرجەنۆ وەشکەردەیۆ گلېرگەین. پەی ئانەی بناغەو فەلەسەفی ئی بنیاڎنیایە بنریۊرە، لایەنی ئیکۆلۆژیی و کۆمەڵایەتییەکەش بە هێزتەرین بناغەش بۆ، ۋەرپەرسێنمۍ جە وەشکەردەی چوارچێوەو ئەنەیاوای تیۆری و ئاردەینە چەمکی." هەرپاسە ئی ڕا و میکانیزمەی پەی ئینەی گیریۆنە ۋەر پی جۊرە باسش کەرڎەن:

"بێگومان پەیش هەن نیازو لایەنەکا جیاواز بۆ. بەڵام هەنگامە منریۆ، یان بانگەواز کریا و جە ڕوو جەوهەرییوە ئینە ڕاسا... کۊڵەکۍ ئایدۆلۆژی، بەرنامەی پراکتیکی و لایەنی تاکتیکی ستراتیجی ئایندەی وەش مکەرمۍ. گلېرگەی دیموکراتیک بەرنامەی سیاسیی ئی سەردەمەینە. یاوای بە دۊڵەتی نمەکەرۆ بە ئامانجو ۋێش. سیاسەتی دیموکراتیک، سیاسەتو گلېرگەی دیموکراتیکیییا. خودو کۆمۆنەیچ کۆمۆنەو دیموکراتیکین. جیۍ نیەنۍ. جڤاکو کۆمۆنی دیموکراتیکین. پەنەوازا پەی گلېرگەو ڕوانەیچ ئینسان باس جە گلېرگێوە دیموکراتیکی بکەرۆ. سۆسیالیزمی دیموکراتیکیچ بە ماناو گلېرگەییبیەی دیموکراتیکین. پېسە چنی دۊڵەت تاریخش هەن، کۆمۆنەیچ تاریخش هەن... ژیۋای ئازادی گەلا بە کۆمۆنۆ مېنە ئاراوە. ئی گلېرگە کۆمۆنەیییە متاویۆ سەرو شارەوانییەکاوە بەڕێکوستەی بکریۆ. متاویۆ جە ڕوو تیۆری و پراکتیکیوە ئەنجام بڎریۆ. بەڵام ئینە بە هەستیاری و کۊششێوە حەقەتینەی دژە سەرمایەدارییوە متاویۆ پێکبۍ."

یەرۍ کۊڵەکۍ مۆدێرنێتەی

ڕابەر ئاپۆ پوختێوە جە ڕەخنەکەردەی سەرمایەداری و یاگەگیرەکاش پی جۊرە وزۆ ڕووە: "پەی ۋېیەرنای  مۆدێنرێتە و سۆسیالیزمی بنیاڎنریای کە خزمەت پاڎیی مکەرۆ، هەوڵما دا مێتۆدێوە تازە، تیۆریێوە سۆسیالیستی یاگەگیر بارمێنە ئاراوە. ئاڎیچما نامۍ نیا 'مۆدێرنێتەی دیموکراتیک'. جیای دەوڵەت-نەتەوەی پەرەما بە نەتەوەیی دیموکراتیکی دا، جیای سەرمایەداری پەرەما بە کۆمۆنە-کۆمۆنالیستی، جیای پێشەسازی پەرەما بە ئیکۆ-ئابووری دا و شیکاری ئانەیما وەشکەرد. سیستەمو گلېرگەو ئازادی-پارێزیما سەرو پەیوەندییەکا کۆو ئی شیکاریانە، سەرو یەرۍ کۊڵەکا پېسە مۆدێرنێتەی دیموکراتیکی پێناسە کەرد، نویستماوە و دیما جە ئاستێوە گرنگەنە جە گلېرگەنە ڕەنگدایشۊ هەن.

بێ گومان ئی یەرە بوارە سەردێڕی لاوەکیشا هەن. پەی نمونەی بەشێوە گرنگش کۆمۆنالیتی ئازادی ژەنێن. هەرپاسە سیاسەت، ئەخلاق..هتد. متاویۆ باسشا بکریۆئینیشا گرڎی بە ۋەرفراوانی هۊرسەنگنمۍ. پراوپەر ئینا یاگۍ ۋێشەنە ئی سیستەمەیە پېسە مۆدێرنێتەی دیموکراتیکی پێناسە بکریۆ. جە ئاینەنە پێناسەو ڕۆو دماو (قیامەت)ی مکریۆ، چێوەکۍ تەنیا پېوەسۍ نییەنۍ بە جەهانو ئاینیوە، هەرپاسە پېوەس پی جەهانەیچۆ. ئا مەترسیۍ کە کتێبی پیرۆز سەرنجش وستێنۍ سەر، ڕەنگە هەر ئینەبۆ. مۆدێرنێتەو سەرمایەداری قیامەت سەرو مرۆڤایەتیرە سەپنۊنە."

کۆنفیدراڵیزمی هەرێمی

ڕابەر ئاپۆ ئانەش دەسنیشان کەرڎەن ئەر ئامانجەکا سەردەمی تازەی بیاونمۍ بە سەرکۊتەی 'ئانە نەک تەنیا پەی کورد و کوردەسانی، هامکات پەی کۊو هەرێمەکەی سەرکۊتەیۍ گرنگ مارۊنە ئاراوە. سەرکۊتەی چینەینە کاریگەری سەرو سووریا، ئێران و عێراقیچ منیۆرە. کۆمارو تورکیای چانسو ئانەیش بۆ ۋێش هەم تازە بکەرۊوە و بە دیموکراسی تاجدار بۆ و هەمیچ جە هەرێمەکەنە سەرمەشقایەتی بکەرۆ." ڕابەر ئاپۆ هەرپاسە سەرنج وزۊسەرو لایەنگری و دژبەرییەکا پرۆسەکەی:

"متاوو واچو لایەنە دژبەرەکۍ پرۆسەکەی هیچ سەنگ و مەعنێوەشا نییەنە و شکس مارا. بەڵام پەی پێکئاوردەی ئینەیچ ۋەرپەرسی گنۆ ئەستۆو لایەنەکا. سەرەڕاو دەرەنجامو پرۆسەکەی سەرو ئاستو هەرێمی، دەرەنجامی مېیاننەتەوەیچش بۆ. کۆنفیدراڵیزمی هەرێمی پېسە پەنەوازیێوە ڕەهای ۋێش بەروزۆ... بەڵام ئی چارەسەرییە هامکات پەنەوازش بە ئەنتەرناسیۆنالیستیێوە تازەی هەن..."

سۆسیالیزمو گلېرگەی دیموکراتیکی

ڕابەر ئاپۆ پی جۊرە دەس بە نامە تاریخیەکەو ٢٧و نیسانی مکەرۆ:

"هەڤاڵا ئێژای!

دماو ٥٢ ساڵا، مانگۍ و حەفتێوە جە تاریخو ئەوەکۊشایما، بەشێوێوە فەرمی سەردەمێوە تاریخی دماو ۋێما جیا مازمۍ. بە مەعنێوە کۆنکرێتی تەر، گەرەکمانە چا سۆسیالیزمۆ کە ئامانجش دەوڵەت-نەتەوەن، ۋېیەرمۍ بەرەو قۆناغێوە تاریخی و سۆسیالیزمی گلېرگەو دیموکراتیکی. هەرپېسە چنی گرڎ چێوە سەرەتا و دمایش هەن." جە بەردەوامی نامەکەینە دەسبەرداربیەی جە چوار خاڵا بنەڕەتی و مەڵامەتەکاش باس مکەرۆ.

'پەی سەرەتێوە تازەی'

ڕۆنامەو سەرخۆبوونی ئەرەیاۋناش ژمارەو مانگۊو ئایاری دما ژمارەو وەڵاکریایۊیشانە کە ڕۆنامەکە پەی ماوەو ٤٤ ساڵا سەرەمڕە بەردەوام بۍ جە وەڵاکەردەیۆ و وەشانەکاش. سەرخۆبوون جە دما ژمارەشەنە کە بە نامونیشانو 'سوربوویە سەرو مرۆڤایەتی سووربیەن سەرو سۆسیالیزمی' وەڵاکریانۆ، بە نامونیشانو 'پەی سەرەتێوە تازەی' دمایش بە وەشانو ۋێش ئارڎ و دماو ٤٤ ساڵا جە خزمەتی بە ڕۆنامەگەریی ئازادی خواحافیزیش جە ۋەنەرەکاس کەرڎ.