شاروو ستراسبۆرگینە بە سەرپەرشتی ئەنجوومەنوو ئەورووپاو دەم پارتی و ناوەنڎوو گلێرگەو دیموکراتی کوردی ستراسبۆرگەنە چالاکیێوە لوواڕاوە. حەرپاسە جەمۍ جە نوێنەراو پەرلەمانوو ئەوروپای بەشداریشا جە چالاکییەکەنە کەرد. یۆ چا گروپا، گروپوو سەوزوو پەرلەمانوو ئەوروپای - فرانچویس ئەلفۆنسی و یۆ جە گرووپ و دۆسا کوردی جە پەرلەمانوو ئەوروپای، پەرلەمانتاروو سویدی مالین بیۆرن جە گروپوو چەپ و پەرلەمانوو ئەوروپای، پەرلەمانتاروو باسکی جە گروپوو سەوزوو جەمەو ئازاڎیی ئەوروپای جۆردی سۆلێ، حەرپاسە پەرلەمانتاروو فەرەنسای ئینسۆمیس ئیمانوێل فێرناندێز، ئەنداموو ئەنجومەنوو پەرلەمانوو ئەوروپای شیار ئۆزسۆی و گروپوو کار و خەباتوو سکرتاریەت و نویسگەکەی بەشدارۍ چالاکییەکەی بێنۍ.

چالاکییەکە جە ناوەنڎوو گلێرگەو دیموکراتیکی کوردی جە ستراسبۆرگ لوواڕاوە، هەلەنا دێرسیم ئەوەڵ کەس بۍ بە نامۍ ڕێکوزیاکەیۆ کە قسێش کەردۍ. هەلەنا دێرسیم، سەرەتا هۊرسەنگنایش پۍ هجوومەکا سەروو کوردسانی و ڕۆژەڤوو گەلوو کوردی کەرد و زانیاریش سەروو هەڵمەتەو ١٠/١٠/  ٢٠٢٣دا  کە پۍ ئازاڎیی ڕابەروو گەلوو کوردی عەبدوڵا ئۆجالانی جە فرەو یاگا جەهانینە دەسشپنەکەرد.

نوێنەروو ئەنجوومەنوو ئەورووپاو دەم پارتی، فایەق یاگزای ئاماژەش پانەی کەرد کە فرەو چێوی هەن کە دۆساو گەلوو کوردی و پەرلەمانتارا ئەورووپای متاوا پۍ ئازاڎیی ڕابەروو گەلوو کوردی عەبدوڵا ئۆجالانی کەراش. یاگزای ڕۊشنش کەردۆ کە سی پی تی جە دمایین سەردایشەنە پۍ تورکیای نەلان ئیمرالی و ئەرەیاۋناش، ئەرەمەرزیێوە سەر بە ئەنجوومەنوو ئەوروپای کە بانگەشەو نوێنەرایەتی دیموکراسی و مافوو مرۆڤی کەرۆ مەلۆ پۍ ئیمرالی، ئانە مژاروو گفتوگۆیا و گەلوو کوردی ئینەی قبوڵ مەکەرا.

فایەق یاگزای ئاشکراش کەرد، ماوەو ٣٠ مانگان حیچ زانیاریێوە جە ڕابەروو گەلوو کوردی عەبدوڵا ئۆجالانیۆ ۋەردەس نییا، حەرپاسە رێکوزیا ئەوروپییەکۍ ئەرکوو ۋێشا جابەجێ نەکەردەن.

جە میانوو چالاکییەکەینە پەرلەمانتارە بەشدارەکۍ جە قسەکاشانە ئەرەیەۋناشا کە ڕابەروو گەلوو کوردی عەبدوڵا ئۆجالان تامەزرۊو چارەسەری دیموکراتیکی پرسوو کوردین. حەرپاسە ئەرەیاۋناشا، پۍ چارەسەری ئاشتیانەی و دیموکراتیکی، پێویسا ئازاڎیی جەسڎەیی عەبدوڵا ئۆجالانی ڕابەروو گەلوو کوردی مسۆگەر کریۊ و ئاماژەشا پانەیچ دا کە پەشتیوانی ج کۊشیای گەلوو کوردسانی کەرا.