پارێزنەرا نوسینگەو یاسایی سەڎەی سەبارەت بە زینڎانوو ئیمراڵی کە ٣٨ مانگېن هیچ هەواڵ و زانیاریێوە جە بارەو رابەروو گەلوو کوردی عەبدوڵا ئۆجالانیۆ هۊرمەگیریۆ و حەرپاسە پرسوو ئازاڎنەکەردەی وەیسی ئاکتاشی کە ئیمراڵینە زینڎانییا و سەرەڕاو تەمامناو ماوەو سزاکێشۆ ڕا بە ئازاڎبیەیش مەڎریۆ، جە بیناو نوسینگەکەیشا جە بەیۆغڵوی ئیستەنبوڵینە کۆنفڕانسێوە رۆنامەوانیشا سازکەرد و ئەرەیاۋنێوەشا ۋەناوە.

پاڕێزنەر رەزان ساریجا ئەرەیاۋناش، ئاژەو "بەدیلگێرتەی" ئیمراڵینە بە قەڎەغە و سزاکاو دیسپلینی سنووردار نەبیەن و پی جۆرە درێژەش بە قسەکاشدا: "مەتاوا چنی پارێزنەرا و بنەیانەکاشا پەیوەندی رووبەڕوو ساز بکەرا، حەرپاسە تەلەفون و نامەیچ قەڎەغەکریان و گۆشەگیریێوە زانیاریی هۊرنەگێرتەی رەهای هەن. ئی ئاژەو ڕاگیریە وەختۍ ئەندامۍ خێزانەکەیشا عەمرەو خوڎای مکەرۆ، جە وەختوو پەتاو کۆرۆنای و جە بومەلەرزەکایچەنە بەردەوام بۍ. جە ٢٥و ئاداروو ٢٠٢١ ینە کە پەیوەندی تەلەفونی پڕچیا و چا ڕووۆ ئێمە هیچ زانیاریێوەما سەروو موەکیلەکاما نییا. چی ئاژەنە ئێمە بە هیچ جۆرێ ئاژەو تەندروستی و هەلومەرجوو موەکیلەکاما کە چنەشەنە راگیریێنۍ، زانیاریما جە بارەشاوە نییا".

ڕا جە ئازاڎکەردەی ئاکتاشی گیریان

جە درێژەنە ساریجا ئانەش وست ڕووە، کە وەیسی ئاکتاش ٣٠ ساڵېن ئینا زینڎانەنە و ئیساتۍ ئینا ئیمراڵیی، ماوەو سزاکێش جە ٢٨و نیسانینە دمایش پنە ئامان، بەڵام ئازاڎ مەکریۆ. ساریجا پی جۆرە بەردەوامبی: "بە پاو ئا جەدوەلۍ وەڵتەر داواکاری گرڎیی کۆماریی بورسانە ئاماڎەش کەردەبۍ، ئشیۍ ئاکتاش جە ٢٨و نیسانینە ئازاڎ کریابیۍ. چی قۆناغێنە بە مەڵامەتوو هەلومەرجوو دژواروو گۆشەگیری ئیمراڵی، ئێمە گەرەکما بۍ جە ڕاو نامېوە هاریکاری یاساییش پنە بیاونمۍ و ڕەئیەو ئاڎیی جە بارەو کاروباروو ئازاڎکەردەیشۆ هۊربگێرمۍ. پا مەڵامەتیچۆ ئێمە جە تاریخی جیاجیانە جە ڕاو پۆستی تۆمارکریایۆ نامەما پەی کیاست. بەڵام هیج جوابێوەما نەدریاوە. بە مەڵامەتوو ئاژەو گۆشەگیرییوە ئێمە مەتاومۍ پەشڕاسش بکەرمېوە کە ئاخۆ نامەکێما یاۋێنۍ یا نا. بەڵام ماوۍ چێوەڵتەر ئێمە پەی ڕاو جاکا سەردای دادگاو جابەجێکەردەی سزا و داواکاری گرڎیما کەرد، پەی ئانەی هاریکاری یاسایی پێشکەش بە موەکیلەکەما بکەرمۍ، داواما کەرد ۋێنێوە پەڕاوەکا سزاکۍ پەی ئێمەی ڕووانە بکریۆ، بەڵام داواکارییەکەما رەڎکریاوە".

'قەرارێوە رەوا و یاسایی نییا'

درێژەو قسەکاشەنە ساریجا ئانەش وست ڕووە، "ۋەروو ئانەی مشۊم موەکیلەکەما ئاکتاش ئازاڎ بکریۆ، پېسە پارێزنەراش جە ٢٨ و ٢٩و نیسانینە پەی پێشوازیکەردەی جە بەڕێز ئاکتاشی یاخوڎ پەی زاناو ئانەی کە چ چېوۍ ۋەروودەم و ئازاڎکەردەیشەنە ڕاگیرا، ئێمە حۊڵەکېما وستۍ گەڕ. داخەم مەشۆ ئیدارە و زینڎانی ئیمراڵی بە زارەکی پنەشا واتیمۍ کە بە مەڵامەتوو قەراروو لوجنەو چەمڎاریوە ئازاڎ کەردەی ئاکتاشی پەی ماوەو ساڵێوە دما وزیان. ئا قەرارە بە شێوێوە ئاشکرا نایاسایی و ناڕەوان. هیچ مەنێوە پەی زەوتکەردەی و ئازاڎیی بەڕێز ئاکتاشی نییا. جە ڕاو ئا هەمواراوە کە دماتەر جە یاساکانە کریێنۍ ئا قەرارە ناڕەوۍ مڎریا. جە لېوەتەرۆ، سەرەڕاو داواکارییەکاو ئێمەیچ، قەراروو هۊرپەسارای ئازاڎکەردەی ئاکتاشیشا رادەسوو ئێمە نەکەرد. هەم داواکارییەکاما و هەم تەعنەکۍ ئێمە پېسە پارێزنەرا، جە تەرەفوو ۋەرپەرسە پەیوەندیدارەکاوە بە هەند هورۍ نەگیریێنۍ و ئانەیچ تاوانێوە کارگێڕییەنە.

ڕاگێرتەی جە ئازاڎکەردەی بەڕێز ئاکتاشی، قبوڵنەکەردەی داواکارییەکا چا بارۆ و پنە نەڎای زانیاری، ئاژەو موەکیلەکاماس کە ٣٨ مانگېن هیچ زانیاریێوەشا جە بارۆ مەزانیۆ، هەستیارتەر کەردەن. جگە جە ڕاگێرتەی جە دیڎاروو پارێزنەرا و بنەیانەکا، داواکاری کەسایەتی و رێکوزیا جیاجیاکایچ، حەرپاسە داواکارییەکۍ پەی میکانیزمەکاو لووایۆ پۊرەیچ ڕاشا ۋنەگیریان، جە وەختوو مەردەو کەسوکاریشانە، جە ئاژەو نەوەشیە دژوارەکانە و کارەساتە سروشتیەکایچەنە ڕا بە دیڎاری نەدریان و داواکارییەکێما پەی هۊرگێرتەو زانیاری بێ جواب مەنێنۍ، ڕاشا نەڎا گوزارشتەکۍ سی پی تی ئاشکرا بکریۆ و سەرەڕاو ئانەی ماوێوە زۆر سەروو قەراروو دادگاو مافەکا مرۆڤوو نەتەوەیۊگێرتەکارە پەی گێرتەی ۋەروو ڕاو جای، ۋییەردەن، بەڵام کار پا قەراریە مەکریۆ، هەرچەنڎە وەختوو ئازاڎکەردەی مەرجداروو بەڕێز ئاکتاشی تەمام بیەن، بەڵام ئازاڎ مەکریۆ، کۆو ئا پرۆسەیچە بە بێ پارێزنەرا بریۆ ڕاوە و گرڎوو ئانیشایچ گومانەکا ئیساتۍ پەشتراس مکەرۆوە.

جوابوو سکاڵا و تانەکا نمەدریۆوە

عومرو موەکیلەکاما لوان و ئا هەلومەرجە دژوارێ ئەرەگیریێنێ، کە کاریگەریی نەرێیی سەرو تەندروسییشا منیۆرە. سەربارو کێشەی تەندروسی درێژخواینی، هەرپاسە پێوەس بە ورکێشیای عومریشا وەختێوەنە پەی ماوێوی فرەی زینداننە ئازیێنیوە، ئانەیچ ڕا پەی کێشەی تەندروسی مکەرۆوە. سەربارو ئا بانگەشا باس چانەیە مکەرا مامەڵە چنی موەکیلەکاما ئەشکەنجە و نائینسانانەن، بەڵام دادگاو بەیاگەیاونای سزێ، کە چەمداریی زیندانەکا و سازکەردەی پەیوەندییەکا چەنی بەری هەرمانەو ئا دادگایەنە، بییەنبە یاگێو کە ڕاستەوخۆ قەرارەکێش ڕا وەردەمو ئەرەبڕیای پەیوەندییەکانە مکەرۆوە. هەرپاسە سکاڵا و تانە و داواکارییەکا پێوەس بە تاوانەکاو وەرپەرساو ئی دۆخەیە جواب نمەدریاوە و هیچ وەنەشا نمەپێچیۆوە.

مشۆم بەرەکاو ئیمراڵی پەی ئازادیی بکریاوە

چوارچوەو نۆرم و بنەما یاساییە جیهانییەکانە و بەها ئینسانییەکانە حەرحەوڵداێوە دژو ئەشکەنجەی هەمان وەختەنە پەی سازکەردەی هەستیاریی دیموکراتیکی و مافەکاو ئینسانی وڵاتەکەیچنە گرنگا. پەوکای پێسەو چەمەڕوانیی ئێمە وەنەو کەسا کە ساعیبێ  وەرپەرسیینێ، ئێمە چاوەڕوانێنمێ کە کاربەدەسێ دەمودەس وەرپەرسییە  تارێخییەکاشا بیاونا یاگێ و دمایی پا دۆخو ئەشکەنجەیە بارا. مشۆم بەرەکاو ئیمراڵی پەی ئازادیی بکریاوە.

*مشۆم بەڕێز ئاکتاش کە سزا ٣٠ ساڵییەکێش تەمامنا و جە ئازادیی وێش بێبەش کریان، دەمودەس ئازاد بکریۆ.

*مشۆم دۆخو گێرتەی موەکیلەکاما ئیمراڵیینە، کە ٣٨ مانگێن هیچ هەواڵێوەشا بارەوە نمەزانیۆدماییش پەنە بێ و موەکیلەکێما بتاوا بنەیانەی و پارێزنەراشا بوینانێ."