ئەرەیاۋېیان کە نوویسەرا کوردی مەولود ئایکۆچ، سامی تان و ڕۆنایی ئۆنەنە بە بەهانۍ پەروەردەو کتێبو 'هینکەر'یوە باڵبەسۍ کریێنۍ. بانگەشەو ئانەی کریان کە کتێبو 'هینکەر'ی بنەماو پەرەوەردەو ئایدیۆلۆژی ڕێکوستەیا.
جە چوارچێوەو ۋنەپەرسایۆکا سەرۆکایەتی داواکارو گرڎیی ئەستەنبوڵی، نوویسەرا کوردی مەولود ئایکۆچ، سامی تان و ڕۆنایی ئۆنەنە بە بەهانۍ ئانەی کتێبو پەروەردەو زۋانو 'هینکەر' یشا جە پەروەردە کەردەی زۋانی کوردینە بەکار ئارڎەن باڵبەسۍ کریێنۍ. ئېژاو باسیا ئا کتێبە جە ساڵۊو ٢٠١٠ بە ڕسمی وەڵا کریانۆ.
ئیفادەو سامی تانی سەرۆکو جەمەو کولتووری و زۋانی کوردی شارو ڕحای جە بەشو ڕاوەبەرایەتی پۆلیسو رحاینە هۊرگیریان.
کتێبو پەروەردەو زۋانی کوردی کە جە ساڵۊو ٢٠١٠ جە لایەنو سامی تانی، مەولود ئایکۆچ، ڕۆنایی ئۆنەنۍ و محەمەد سدیق ڤارلیوە ئاماڎە کریابۍ، جە بارەگاو پۆلیسینە بە مەڵامەتوو بەکارئاوردەیش جە لایەنو سامی تانی بە تۆمەتۊو "ئەندام بیەی جە ڕێکوستەینە" ۋنەپەرسایش ۋنەکریا. سامی تان جە ئیفادەکەشەنە ئەرەیاۋنانش کە ''هینکەر'' پەی خولو تایبەتی پەروەردەو زۋانی بەرهەم ئامان. تەنانەت ۋنەپەرسایۆ سەرو ئا کەسایچە کریان کە وێنەشا دلۍ کتێبەکەی و ئا شۊنۍ کە وێنەکەشا چنە گیریان کریان.
هەرپاسە مژاری سەرج کێشتەر پېوەس بە ۋنەپەرسایۆکا ئانەنە کە کتێبو 'هینکەر'ی سەرو گەشمەرڎێوە هەپەگەی و جە هەڵمەتەو هۊرکوای سەرو یانانە ئېزیانۆ. سەبارەت پېنەیچ بانگەشە کریان کە 'هینکەر' بنەماو پەروەردەو ئایدیۆلۆژی ڕێکوستەیا. بە بەهانۍ ئانەیۆ سامی تان بە بەکارئاوردەی ئی کتێبەیە ۋنەپەرسایۊش ۋنەمکریۆ. بەڵام سامی تان ڕۊشنش کەرڎۆ کە کتێبو هینکەری بەمەبەسو پەروەردەو زۋانی کوردی نویسیان.
دماو تەمام بیەو ڕاوجا ئیدارییەکا جە ڕاوەبەری پۆلیسینە، دەسبەسەر کەردەی سامی تانی پەی ماوەو ڕوۍ تەری درێژکریاوە. قەرارا سەوای سامی تان بڎریۆ بە دادگای.
