نیلوفەر کۆچە، واتەواچەو پەیوەندییەکا جبەری و ئەندامۊو کۆنسەو ڕاوەبەری کەنەکەی ، سەرو دۆخی تازەو سوریای و یاگێ کوردی قسێش کەردە.

نیلوفەر کۆچە ئەرەیاوناش، وڕناو ڕژێمو ئەسەدی جە سوریانە دمابەدماو هرووژمەکا ئیسرائیلی پەی سەرو حیزبوڵای جە لوبنانە ئاماژێوەبێ پەی ئانەی مرۆڤ چنەش یاوۆنە و ویرش ئاردۆ کە ئەسەد پاڵپەشت بە دەسەڵاتو ڕووسیای و ئێرانی مەنەنۆ. واتێشش، ئێران بە مەڵامەتو هرووژمەکا ئیسرائیلی پەی سەرو لوبنانی لاواز بییەن و ڕووسیا بە بڕێ ئیمتیازاتێ کە  ئۆکرانیانە پنەش دریێنێ بێ کارێگەر کریان، بی جۆرە ئێران و ڕووسیا جە سوریانە بەگردی بێ کاریگەر کریان. دماو لاوازبییەی ئا دووە دەسەڵاتەیە سوریانە ڕژێمەکەو ئەسەدی وڕا. هەرپاسە کریۆ واچمێ جەهانو سەرمایەداری دۆڵەت نەتەوەییەکا کە جە ساڵەکا ١٩٩٠ دماوە سەرش هۆردان. ئیتر قەبوڵ مەکەرا."

'دیزاینو سوریای تا ٢٠و کانونو دووەمی دمایش مێنە'

پەی ئا پرسیارێ کە 'ئایا بارودۆخو ئیسەی جە سوریانە چارەسەری مارۆ یان نا؟' نیلوفەر کۆچە ئەرەیاوناش، دۆناڵد ترامپ، سەرۆکو تازەو ئەمریکای کە ٢٠و نۆوەمبەری دەستبەکار بۆنە واتش: "دیزاینو سوریای تا ئاکاتە تەمام بۆنە، یعنی تا کابینەو ترامپی دەسبەکار بۆنە. نیلوفەر کۆچە سەبارەت بە چارەسەری واتش: "پەی ئێمە چارەسەری دیارا، گەلەکەما جە وەرنیشتەنە ماوەو ١٢ساڵان بەهاێی قورسش دان و ڕاو چارەسەریش نیشانەدان، چاکە چەمکێوە دیموکراتیکی هەمە لایەنە ئەرەمەزیان، سیستەمێوە دروس کریان، کە گردو گەلا سوریای گێرۆوە."

'دۆڵەتو تورکی سەرو ئایندەو مەنتیقەکەی هەڕەشێوە گۆرەن'

نیلوفەر کۆچە ئاماژەش پانەیەدا کە دۆڵەتو تورکی پەی سەرو ئاییندەو مەنتیقەکەی هەڕەشێوە گۆرێنە و واتش: "دۆڵەتو تورکی نیگەرانو دیزاینو تازەو وەرکەوتوو دلێڕاسەین، مەرامەکا ئێرانی، عێراقی، تورکیا و سوریاین. جە عێراق و سوریا، کورد ستاتۆو وێش پەیا کەرد و بەرکەوت کە ئی ستاتۆیە زەرەر بە حیچ کەس و وڵاتێ مەیاونۆ و جە ئاستو مییاننەتەوەیینە پەشتیوانیێ فرە پەی کوردا بەرهەم ئامان، بەمەڵامەتو بارودۆخو ژئۆپۆلەتیکی دۆڵەتو تورکیای، جە وەراوەرو هرووژمەکا پەی سەرو کوردا بێدەنگی کریان، سەرەڕاو ئی هرووژما، مڏرامانو کوردی و گیڵای دماو ئازادیرە بەردەواما و نەمەڕیان، هەرپاسە گەلو وەرنیشتی درێژەش بە مڏرامانو وێشدان".

'چەتەکێ گەرەکشانە بە تەرسی و تۆقنای سەرێگنا'

نیلوفەر کۆچە سەبارەت بە هرووژمەکا دۆڵەتو ئەرەگیرو تورکی و چەتەکێ سوپاو نەتەوەیی سوریای پەی سەرو وەرنیشتی ئەرەیاوناش؛ چەتەکێ گەرەکشانە جە ڕاو تۆقنای و تەرسێوە جەنگەکەنە سەرێ گنا، ئی تاکتیکە تاکتیکو داعشین کە جە ساڵۊو ٢٠١٤ نە بەکارش ئارێنێ. بەردەی ژەنێ، دەسدرێژی، سەرەبڕییەی، گردو ئینیشا هەمان ڕاو و ڕێبازا. گەرەکشانە بە وەڵاکەردەیۆ زانیاریی ناڕاسی و تەرسنای و تۆقنای چا جەنگەنە سەرێ گنا."

'حەقیقەتەکێ فرێنێ کە نیشاندەرۍ ئانەینێ کەس جاڎیشا نمەتەرسۆ'

نیلوفەر کۆچە ئاماژەش پانەیە کەرد، سەرەڕاو هرووژمەکا، گەلا مەنتیقەکەی بەشێوێوە وەرفراوان وەرەوڕو چەتەکا SMO باوە و بە پەیلواو من کورد جەدژو ئی کردەوانە بەقوەتا، حەقیقەتەکێ نیشانەشادا کە جە کردەوە دڕندەکاشا نمەتەرسمێ. وینمێ، جە قورستەرین بارودۆخەنە بەرەو یانەکاشا ڕووەو گرد کەسیرە کەردێوە.

'پەی کوردی بارودۆخێوە مەترسیڎار ئینا ئارانە'

نیلوفەر کۆچە، سەبارەت بە هرووژمەکا دۆڵەتو تورکی پەی سەرو سەرنیشتوو و وەرکەوتوو سوریای و بەتایبەت منبجی ئەرەیاوناش؛ دۆخێوە مەترسیڎار پەی کوردی ئینا ئارانە، پرۆسەکە هامشێوەو پڕۆسەو کۆبانێن و واتش: "پەی ئانەی هەڵوێسێوە کۆمەڵایەتی سەرهۆرنەڎۆ هەوڵو چەواشەکاری مڎریۆنە. بڕێ دۆڵەتێ بە نامێ کوردیۆ قسێ مکەرا مشۆم ئێمە پەشتی بە حیچ دۆڵەتێ نەبینمۍ، جە پڕۆسەو کۆبانێنە فێربییەیمێ ئەر سەرو بنەماو یۆبییەی نەتەوەیی گلێرێ بیمێ، سەرێ گنمێ.

ئێمە چنی گردی ئینایمێ پەیوەندینە، بەڵام تاکە هێزی یەکلاکەرەوە هێزو کۆمەڵایەتی بییەو وێمانە. کێ قسێوە خاسە مکەرۆ، سەرو سەرەی و چەماما، بەڵام ئێمە باوەڕما بە وێما هەن و وێما پارێزنمێ. هامسەنگیە سیاسیەکې دەقە بە دەقە ئینێ فاڕیاینە. دیزاینێوە سەڎ ساڵە دەس پنەکەرۆ، بازرگانیێوە گۆرە ڕووەمڎۆ. پۆکەی جگە جە هێزو کۆمەڵایەتی بییەو وێما مەبۆ متمانە بە کەسی تەری کەرمێ. مەبۆ چەمەڕاو ئانەی بیمێ کەسێ ڕزگارما کەرۆ. ئێمە جە سەدەی ویەردەینە ئی خەڵەتە گۆرەما کەردەن. کورد جە ڕاو گیاناو نامەیۆ پەی بریتانیا و فەرەنسای داواو مافو وێش کەرد، بەڵام کەس دەنگش نەشنەوێ."

'ئەردۆغان گەرەکش بێ کۆبانێنە نما بکەرۆ'

نیلوفەر کۆچە؛ چی دماییەنە جە دژو هەڕەشێ و تەرسێ بانگەوازش ئاراسەو گەلو کوردی و دۆساش کەرد: "ئێمە گەلێوە چامنێنمێ کە سەڎ ساڵێن زامڎارێ کریێنمێ، بەڵام ئانە پەنجا ساڵێن تارێخ واوەی نمەبۆوە. ئێمە فاڕیێنمێ، قەوەتۍ بیێنمێ، وێما ئەشناسان، هێزو وێپارێزنای و بەڕێکوزتەی وێما هەن پۆکەی وەراوەرو هەڕەشا و هرووژمەکا ئەرەگیرا و کۆمکوژیی سەرێ گنمێ، کێ گەرەکشا دمایما پنە بارۆ؟ ئەردۆغان گەرەکشا جە کۆبانێنە نما بکەرۆ، پۆکەی هجوم مکەرۆ سەرو کۆبانێ، پۆکەی مشۆم مڏرامانما بەهێزتەر بکەرمێ و وەرەوڕو ئەرەگیرا مڏرمێ.