'پۍ ئانەی بە لۆزانی واچمۍ نا، ئێمە ملمۍ لۆزان'
یوکسەل کۆچ، هامسەرۆکو کەجەدەکە-ئە جە چالاکیەکەو وەردەمو بارەگاو نەتەوەیۊگېرتەکانە جە جنێڤ، داواو بەشڎاربیەیش چا ڕاپیماینە کەرڎ کە سەروبەنڎو ساڵڕۊو پەیماننامەو لۆزانینە، ڕۊو ٢٢ۍ تەمووزی جە لۆزان ملۊڕاۋە.
چالاکی ئەرەنیشتەی پەی بەدیئارڎەی ئازاڎیی جەستەیی ڕابەرو گەلوو کورڎی، عەبدوڵا ئۆجالانی، کە جە ٢٥و کانونو دووەمو ٢٠٢١ یۊ حەتا ئیسە گرڎ ڕۋۍ چوارشەممەی ۋەردەمو بارەگاو نەتەوەیۊگېرتەکانە جە جنێڤو سویسرای ملۊڕاۋە، ۋەردەواما.
چالاکیەکەو ئی حەفتەیە بۊنەو ساڵیاڎو ئاخېزوو ١٩و تەمووزو ۋەرنیشتیۊ و پۍ رێزگېرتەی جە یاڎ و گەشمەرڎا ئا بەشەو کورڎسانی بە دەیەقېۋە بێدەنگی دەسشپنەکەرڎ.
سیاسەڎمەدار یوکسەل کۆچ، کە بە نامۍ کۆمیتەو لۆزانیۊ دژ بە پەیماننامەو لۆزانی قسېش کەرڎە، سڵامش پۍ ئاخېزو ۋەرنیشتی کیاست و ۋاتش: مشۊم گرڎ دەنگ ۋەران ۋەر بە گۆشەگیری هۊربڕمۍ.
کۆچ ئاماژەش پانەی کەرڎ، گەریلاکۍ ئازاڎیی کورڎسانی سەرو بنەماو پاڕادیگماو ڕابەرو گەلوو کورڎی، عەبدوڵا ئۆجالانی سیاسەتو قڕکەرڎەیشا پوچ کەرڎةنۊ و سەبارەڎ بە پەیماننامەو لۆزانیچ ۋاتش: "بناغەو کۊکوشی چاڵایی زیلانۍ، ئاگری، کۆچگری، مەهابادی و هەڵەبجەی، چۆڵکەرڎەی دەگایەکا جە ساڵەکا ١٩٩٠ینە، پەیماننامەو لۆزانیا. ئەرەکۊشای ڕابەر ئاپۆی کە چنی چن هەڤاڵۍ ۋېش جە ساڵەکا ١٩٧٠ دەسشپنەکەرڎ، یاۋان بە ملۋېنان کەس. دەوڵەتەکۍ کە دەرەقەتو ئا ئەرەکۊشایە نامۍ، جە ڕاو قورسکەرڎەی گۆشەگیری سەرو ڕابەر ئاپۆی گەرەکشانە ئامانجەکەیشا پېکا. مرڎنای و راگرتەی کۊکوشی جە کورڎسانەنە، جە ڕاو هۊرگېرتەی گۆشەگیری سەرو ڕابەر ئاپۆیۊ بۊ. کورڎ جە گرڎ یاگېنە پۍ ئازاڎیی ڕابەر ئاپۆی ۋېڕاگری کەرۊ. گەلۍ کورڎسانی ئا پەیماننامەیە قبوڵ مەکەرا. حەرپۊکەی ئا ڕاپیمایەی کە ٢٢ۍ ئی مانگۍ جە لۆزان سازکریۊ، فرە گرنگا. کورڎ مشۊم ئا چالاکیە پېسە ئەرکێۋە نەتەوەیی ۋینۊ".
دماو قسەکا یوکسەل کۆچی، خەڵکەکە دروشمېشا ۋاتېۋە و دماتەر پەشتیشا کەرڎە بیناو نەتەوەیۊگېرتەکا و دەسشا بە چالاکی ئەرەنیشتەی کەرڎ.
هـ. ش
