ناوەنڎو( ئەرشیف و توێژینەوە و کتېبخانە و ژەنا کورڎ)ی کە ماوەو یەرۍ ساڵا زیاتەرین دەیان ژەنۍ کورڎی هەرمانەش پۍ کەرا، ۋېرەگاو هېزی بە مەراسیمێۋە تایبەت جە هۆڵو تەوارو شارو سلێمانی مژدەو کەرڎەیۊیش دریا پا مەڵامەتۊ مەراسیمێۋە تایبەتشا پۍ ئەنجامدا.

'ناگەهان ئاکارسەل'ە یۊ چا ژەنا بۍ کە جە ماۋەی ۋیەرڎەنە بە شێۋېوە چالاکانە هەرمانەش چا پرۆژەنە کەرڎە، سەرمەشقیش کەرڎ پۍ گرڎو ژەنا ئا ناوەنڎیە پۍ ئانەی بتاۋا ناوەنڎەکەیشا وزانە سەرو پەیا، حەتا ئا ڕووەی نامە بریۍ جە لایەنو دەزگاو میتو تورکیایوە بە شێۋېوە نا ئینسانانە جە چۋارو تشرینو یۋەمو ساڵەو ٢٠٢٢ گەشمەرڎۍ کریا.

 پۊکەی جە مەراسیمەکەنە سەرنج وزیا سەرو دەورو گەشمەرڎە ناگەهانۍ و کەرڎەیۊ ئا ناوەنڎەیشا پێشکەش بە ڕۊحوو گەشمەرڎۍ کەرڎ، پۍ ۋیر ئاورڎەیشۊ سەرنجشا وست سەرو ژیای و کۊشیای و حۊلەکاش پۍ وەشکەرڎەو ئا ناوەنڎەی پۍ ژەنا.

 جە درێژەو هەرمان و چالاکیەکا ئا مەراسیمەینە وتارەی  تایبەتە پێشکەش کریا کە چنەشەنە، سەرنج وزیا سەرو کۊشیای ژەنا جە تاریخەنە و بە گرنگشا زانا کە سەر جە نۊ  ۋنەکۊڵیای  جە دەورو ژەنا کریۊ جە تاریخەنەو پەرڎە سەرو ڕاسیەکا لا بڎریۊ کە  ژەنی دەورېوە گرنگش بیەن و گرڎو ئا زانیاریا ئەرشیۋ کریا.

 جە درێژەو مەراسیمەکەیەنە چنڎین وەرهەمۍ هونەریۍ ژەنا پېشكەش کریۍ.

 قەرارا ئارۊ بە شێۋېوە ڕەسمی ناوەنڎو ( ئەرشیف و توێژینەوە و کتېبخانە و ژەنا کورڎ) ڕووەو هاموڵاتیارە کریۊوە.

هـ . ش