دما و بانگەوازو "ئاشتی و گلێرگە و دیموکراتیک"و ڕابەر ئاپۆ کە جە ٢٧و شوباتینە کەردش، پەکەکە ١٢هەمین کۆنگرە و وێش ئەنجام دا و پەی چارەسەرو دیموکراتیکو پەرسە و کوردی قەراری تاریخیش دا. قەرارەکێ کۆنگرەی جە مێڏانو مییاننەتەوەیینە دەنگش داوە.

چا هورسەنگناینە کە جە لایەن و ڕاو گرڏی مییاننەتەوەیی کریا، پێشوازی جە قەرارەکا پەکەکەی کریا؛ ئی هەنگامە تاریخیێ پەی چارەسەرو ئاشتییانەی و دیموکراتیکو پەرسە و کوردی پەنەوازا جە لایەن و دۆڵەتو تورکیایۆ بە شێوێ جددی هورسەنگیۆنە.

پارێزنەری ئشناس و ئیتاڵی ئیزیۆ مێنزیۆنی سەر و ئا پرسا پەی ئاژانسو هەواڵو فوراتی (ANF) قسێش کەردێ.

'مشۆم ئەردۆغان بە وەرپرسیارێتییۆ دەور گێڵنۆنە'

پارێزنەر ئیزیۆ مێنزیۆنی ئاماژەش پانەی دا قەرارەکێ کۆنگرەو پەکەکەی پەی چارەسەرو دیموکراتیکو پەرسەو کوردی فرە ئەرێنیا و مشۆم سەرۆککۆمارو تورکیای ئەردۆغان جە وەراوەرو ئینەینە هەنگامەی ڕوونە بنیۆ و واتش: "وەرو ئانەی جە دۆخێوە پی جۆرە جە مێڏانەلەنە دووە لایەنی هەن؛ لایەنێوە گەلوو کوردی و پەکەکەن؛ واتە پەکەکە کە دمایش با هەرماناشە ئاردێنێ کە بەنامێشۆ کریانە، لایەنەکەی تەریچ حکومەتو تورکیاین. ئاشتی بە دووە لایەنی بە دی مێنە. پەنەوازیش بە دووە لایەنی هەن.

پەیوەیس پی پەرسێوە پەکەکە هەڵوێسو وێش نیشان دان. مشۆن ئامانجو حکومەتو تورکیچ پەشتڕاس کریۆوە. فرە متمانەما نیا کە تورکیا بەرەو ئاشتی ملۆنە. تاوەکو ئیسە لوای وەڵێما چی پڕۆسەنە نەوینان. جە لایەن و گەلوو کوردیۆ چنین ئەرەیاویا وەڵا کریێنێوە. چەمەڕا ئانەی بێنا پێسە و سەرۆککۆمارو گرڏ وڵاتێ گوتارەی شایستە بە پاو ئەرەیاوناکەو کۆنگرەی دۆنە. چەمەڕاو ئانەی بێنا حکومەتو تورکیایچ جە هەمان چوارچێوەنە هەنگامە بنیۆنە."

'ئۆجالان گەرەنتی پڕۆسەکەین، مشۆم ئازاد بۆنە'

جە بەردەوامی قسەکاشەنە ئیزیۆ مێنزیۆنی ئاماژەش پانەیشدا چنی قەرارەکا پەکەکەی هەڵای ڕابەر ئاپۆ بە دیلگیریان، ئینە قبوڵ مەکریۆنە و واتش: "ئێژا ئۆجالان زامنو ئی پڕۆسەینە. مشۆم دەمودەس ئازاد کریۆنە. ئاسایی نییا ٢٦ ساڵێ چێر و گۆشەگیریینە بی. هیواڏارەنا حکومەتو تورکی بە خێرای ئێژا ئۆجالانی ئازاد بکەرۆ. چونکە تەنیا ئاڏ تاوۆنە گرەنتی ئانەی بکەرۆ قەرارەکێ پەکەکەی سەرێ گنانە.

لایەنی تورکی چەمەڕاو چێشیا؟

ئیزیۆ مێنزیۆنی سەرسامی وێش جە دماوستەو  دۆڵەتی بەربڕی و واتش: "واوەیش مکەرووە مشۆم ئێژا ئۆجالان ئازاد کریۆنە. حەر پێسە باخچەلی داواش کەردەن، مشۆم بلۆنە پەرلەمان. وە ئانەی گەرەنتی حەقتەینە و سەفەر و درێژخایەنو ئاشتی و ئاشتەوایی دووەلایەنری بۆنە ئێژا ئۆجالانا. بابەتێوە تەری گرنگ ئازادکەردە و زینانیا سیاسییا. ئی دۆخە نەک جە ماوەو ساڵێوەنە، مشۆم جە ماوەو هەفتێوەنە بە دی بێنە. ئیتر هەڕەشێ و تەرسی نییەنە ئینسانێ زینانیا بازۆوە. تەنها ئۆپۆزسیۆنی حکومەتینێ. مشۆم دەمودەس ئازادێ کریانە. ئەر ئینە ڕووەدۆنە ماناو ئانەی یاونۆنە کە تورکیا بەڕاسی گەرەکشا چنی کوردی ئاشتەوایی بکەرۆ. ئەر ئینر ڕووەنەرۆنە ماناو ئانەی یاونۆنە کە گەرەکشا بە دوژمنی بەشێوە جە وڵاتی مەنۆوە.

مشۆم نیشانەو دڵسۆزی دیاری بکەرۆ

ئەر ئێمە باسو ئاشتی مکەرمێ، چی بە هەزاران ئینسانێ ئینێ زینانەنە. پارێزنەر، ڕۆنامەوان، هامسەرۆکی شارەوانی... پەی نمونەی سەڵاحەدین دەمیرتاش چی هەڵای ئینا زینانەنە؟ ئەر ئاشتیما گەرەکا، چ مانێوەش هەنە مەنەیۆ ئی ئینسانا جە زینانەنە؟ پەی نمونەی نەک تەنیا دەمیرتاش و بڕێ کەسایەتی تەرێ. ئەر ئیتر پەکەکە نەبۆنە، ئی پێکئاما ئانەی 'هەڕەشێوە نەبۆنە". ئاکاتە مەنەیۆ زینانیا مانێوەش نییەنە.

حەر پۆکەی دۆڵەتو تورکی سەرەتا مشۆم دەموودەس دووێ هەنگامێ ڕۆشنێ بنیۆنە. مشۆم ئێژا ئۆجالان و گرڏ و ئانیشا بانگەشەو پەیوەندیشا بە پەکەکەی هەن ئازادێ کریانە. ئەر ئی دووە هەنگامێ بنریا، ئینە ماناو دڵسۆزی تورکیای مێ کە گەرەکشا هەنگامە پەی ئاشتی بنیۆنە، پێسەو پەکەکەی جە کۆنگرەو وێشەنە ئەرەیاوناش..."

'مشۆم ئەوروپا هەڵوێس فاڕۆنە'

جە دماین و قسەکاشەنە ئیزیۆ مێنزیۆنی ئاماژەش پانەی دا ئەوروپا و ئەمریکا مشۆم ئیتر هەڵوێسشا جە وەراوەرو پەکەکەی فاڕانە و واتش: "مشۆم ئەرەمەزیێکێ ئەوروپای هەڵوێسشا جە وەراوەرو پەکەکەی یان پەکەکەو وەڵینی فاڕانە. وەرو  ئانەی ئی ڕێکوزیا دمایش مێ، بۆنە حەقیقەتێوە ویەردە."