پارێزنەراو نویسینگەو یاسایی سەڎەی رازیە ئۆزتورکە، ئیبراهیم بیلمەز، عەمران ئەمەکچی و جەنگیز یورەکلی پۍ ئانەی بتاوا موەکیلەکاشا جە ئیمراڵینە عەبدوڵا ئۆجالان، عومەر خەیری کۆنار، حامیلی یەڵدرم و وەیسی ئاکتاشی بوینا، سەردای داواکارو گرڎیی کۆماریشا جە بورسا و ڕاوەبەرایەتی زینڎانوو ئیمراڵی کەرد و داواکاریشا وست ڕووە.

پەیوەندی ڕابەروو گەلوو کوردی عەبدوڵا ئۆجالانی بە بەریۆ بە تەمامی پڕچیان. جوابوو داواکارییەکا پۍ دیڎاری مەدریاوە، بڕۍ جارۍ دماو چن مانگۍ سزاو دیسپلینی پێسە بەهانۍ ڕاگێرتەی جە دیڎارەکا بە پارێزنەرا ئەرەیاۋیۆ.

بە پاو دماین گوزارشتەو نویسینگەو یاسایی سەڎەی کە ١٧و کانونوو دووەمی ۋەڵاکریاوە:

-جە ٢٧و تەمووزوو ٢٠١١یۆ تەنیا جە بەینوو مانگەکا ئایاری- ئابوو ٢٠١٩ینە پەنج جارۍ دیڎاروو پارێزنەرا ئەنجامدریان، دمایین دیڎار جە ٧و ئابوو ٢٠١٩ینە بیەن.

-جە ساڵەو ٢٠١٤یۆ پەنج جارۍ دیڎاروو بنەیانەکا ئەنجامدریان.

-دمایین دیڎارش چنی براکەیش جە ٣ۍ ئابوو ٢٠٢٠ ینە بیەن.

-جە ئەوەڵ ڕۆو (١٥و شوباتوو ١٩٩٩)یۆ تا ئیسە دووۍ جارۍ (٢٧و نیسانوو ٢٠٢٠ و ٢٥و ئاداروو ٢٠٢١) بە تەلەفون ڕا دریێنە پەیوەندی چنی بنەیانەکەیش ئەنجام بڎۆ.

-دمایین پەیوەندی تەلەفونی جە ٢٥و ئاداروو ٢٠٢١ینە دماو ماوێوە کەمی پڕچیان و چا وەختۆ حیچ زانیاریێوە جە بارەشۆ ۋەردەس نییا.