ڕۊو ٣ ئابوو ٢٠١٤، گلێرگەی ئێزدی ڕووبەڕووۍ ئەمرۍ بیێوە. دەیان هەزار ئێزدیۍ ناچارۍ بیۍ کۊچ کەرا و فرێشا کەمپەکاو پانیشتوو کوردستانینە ئەرەنیشتۍ بیۍ. ماوەو ٩ ساڵان پەدەکە گلێرگەی ئێزدییش چا کەمپانە زینڎانیی کەرڎەن. جە وەختێوەنە یۊ جە سەبەبە سەرەکییەکاو ئەمرەو ساڵەو ٢٠١٤، پەدەکە بۍ.

ھاموەخت چەنی ٩یەمین ساڵڕۊو ئەمرەکۍ، فرەو بنەیانەکاو شەنگالی، کە جە کەمپەکاو پانیشتوو کوردستانینە بێنۍ، قەرارشا دا گێڵاوە پەی زێد و مەنتێقەکاو وێشا، وەلۍ پەدەکە قۊرتێش پەی گێڵایۊشا وەشۍ کەرڎۍ و دەروازە سنوورییەکێش ڕووەو کۊجوو گەنجارە پەی جبەری کەرڎێوە. بە پاو بڕۍ  ئامارە ناڕسمییا، ساڵەو ٢٠١٤ تا ئیساتۍ، ١٠ هەزار ئێزدیۍ، بەتایبەتی شەنگالیۍ، کۊچشا پەی بەروو وەڵاتی کەرڎەن.

دەوڵەتوو تورکی بە هامکاریی پەدەکەی ڕا بە خەڵکوو شەنگالی مدۊ، کە پەی ئەورووپای کۊچ کەرا و ئادێچۍ ڕوانە بەکۊمەڵ کەمپەکاو پانیشتی جیا مازا. ڕۊو ٦ ئابوو ئێساڵی، بڕۍ چا کەمپنشینا هەوڵێشا دێنۍ جە کەناراوەکاو بەینوو تورکیای و یۊنانینە پڕاوە، وەلۍ جەندرمەکاو تورکیای ڕاشا نەدێنۍ پەنە و هەوڵۍ گێرتەیشا دێنۍ. گەنجۍ وێشا نەدان دەسۊ و ورئامێنی.  تا ئیساتۍ چارەنویسوو یۊیشا کە نامێش (خێری نایف ملکۊ)ن، کە خەڵکوو شەنگالین و ساڵەو ١٩٩٠ گلێرگەو دیگوڕینە پەیدا بییەن دیار نییا.

بنەیانەو خێری ئاماژە پەی ئانەیە کەرا، ڕۊڵەکەشا جە بەحروو ئەفرۊسینە بەینوو تورکیای و یۊنانینە دیار نەمەنەن و چا وەختۊن تا ئیساتۍ حیچ زانیاریێوەش بارەوە مەزانا.

س.ز