شاندێوە ئەمنی و سەروازیی دەوڵەتوو ئەرەگیرکەروو تورکی دلێ خاکوو هەرێمینە چەنی شاندێوە زێرەڤانیى پەدەکەی و پارێزنایی (پاراستن)ی چێروو نامێ پاسەوانى سنووروو عێراقینە کوێ بیێوە و نەخشە پەی ئەرەگیرکەردەی خاکوو هەرێمی مجارە.
وەزارەتوو وەرگێریی دەوڵەتى ئەرەگیرکەروو تورکی چند ڕسمێوەش وەڵا کەردێوە، کە دلێشانە بەرگنۆ شاندێوە سەروازی دەوڵەتى ئەرەگیرکەروو تورکی بارەگاێوە هێزەکاو زێرەڤانىی پەدەکەینە کوێ بیێنێوە.
هەرچندە وەزارەتوو وەرگێریی دەوڵەتوو تورکی ئاماژەش پانەیە کەردەن، کە چەنی پاسەوانوو سنووروو عێراقی کوێ بیێنێوە، بەڵام ڕسمەکەنە بەرگنۆ، کە تەماموو شاندەکەو هەرێمی هێزەکاو زێرەڤانی و ئەنداماو دەزگاو پارێزناى پەدەکەینێ.
پێسە بەرگنۆ کۆبییەیۆکەی بارەگێوە زێرەڤانىی پەدەکەینە بییەن و ڕسمێوە نەخشەو کوردستانی ژوورەکەنە ورواسیان، بەڵام وەزارەتوو وەرگێریی دەوڵەتوو تورکی ڕسموو نەخشەکەیش تەڵخ کەردەن و قبووڵش نەبییەن نەخشەو کوردستانیچ بەرگنۆ.
ڕسمەکەیچنە بەرگنۆ، کە کارمەنداو زێرەڤانى و ئەنداماو میتی و سەروازە ئەرەگیرکەراو تورکی نەخشێوە مەنتێقە سنورییەکاو هەرێموو کوردستانیشا ئینێ وەروو دەسینە و بەپاو ئا نەخشەیە گەرەکشانە پێوەرو دژوو گەریلاکاو ئازادیی پیلانە گێڵنا.
وەزارەتوو دەوڵەتى ئەرەگیرکەروو تورکی پاسەش وەڵا کەردەنۆ، کە کۆبییەیوەکە چەنی شاندێوە پاسەوانوو سنووروو عێراقی بییەن، بەڵام سەرجەمشا ئەنداماو پەدەکەینێ و نەخشەو پیلانگێڵنی دژوو گەریلاکاو ئازادی و ئەرەگیرکەردەی زیاتەروو خاکوو هەرێمی مجارە.
سەروو کۆبییەیۆکەی و نامەئاردەی پاسەوانوو سنووروو عێراقی، هەڵای لایەنە پەیوەندیدارەکاو حکومەتوو عێراقی هیچ زانیاری و ئەرەیاوناێوەشا وەڵا نەکەردەنۆ، بەڵام گێرا دمایی هێزوو پاسەوانوو سنووروو عێراقی بۆنەو بەکارئاردەی نامێ هێزەکەیشاوە هەڵوێستشا بۆ.
ئی کۆبییەیۆ لایەنوو دەوڵەتى ئەرەگیرکەروو تورکی و پاسەوانوو سنووروو عێراقی پەی درێژەداین بە هجوومە ئەرەگیرکارییەکا، کە دەوڵەتوو تورکی چندین ساڵێن پانیشتوو کوردستانینە کەرۆش.
وەڵتەر وەڵا کریابێوە، کە پیلانگێڵنییوە بەینوو دەوڵەتى ئەرەگیرکەروو تورکی و پەدەکەینە هەن ئارانە، گەرەکشانە حکومەتوو عێراقی ڕاو پاسەوانى سنووریوە چۆوە تلنا، پەی ئانەیچە بە بەڵگەوە جووڵەو پاسەوانى سنووری، کە سەرجەموو ئەفسەر و ئەنداماشا سەر بە پەدەکەینێ ئاشکرا کریا، کە بە هامبەشی چەنی زێرەڤانىی پەدەکەی ڕوانەو سنووروو ناحیەو کانی ماسی و شیلادزێ کریێبێنێ.
هیزیچ یەشار گولەر وەزیروو وەرگێریی دەوڵەتى ئەرەگیرکەروو تورکی ئەرەیاوناش، چا ئۆپەراسیۆنەنە کە قەرارا دماتەرنە کریۆ، چەمەڕوانوو جوابوو حکومەتوو عێراقینێ، کە هامکارییشا کەرۆ، ئەگەر نەکەرۆش جە ڕووەو بارزگانی و ئاوێوە عێراقی سزا مدا.
