بە سەرمەشقایەتی دەسوەڵێوستەی ئاشتی پەی کوردسانی پەرلەمانتارا، چالاکا و سەندیکایی و ئەکادیمییەکێچ دلێشانە ژمارێوە فرە جە کەسایەتیەکا نامێوەشا پەی کۆمیتەو ڕاگێرتەی جە ئەشکەنجەی سەر بە ئەنجومەنوو ئەوروپای (سی پی تی) کیانان و داواشا کەردێنە، دەموودەس شاندێوە روانەو ئیمراڵی بکەرا. یۆ چا کەسا نامەکەش ئیمزاکەردەن پرۆفیسۆر جێف مایلین داواش جە سی پی تی کەرد، ئەرکەکاش بە یاگۍ بیاونۆ.

سەرەڕاو ئەنداماو دەسوەڵێوستەی ئاشتی پەی کوردسانی پ. نوام چۆمسکی، جێرمی کۆربین، مایکڵ گانتێر، پ. بیل باورینگ و پ. ماری داڤیسیش نامەکەشا ئیمزاکەرد. نامەکە بە نامونیشان و ' بانگەوازێوە خێرا کە مشۊم دەموودەس جابەجێش بکەردۍ' ئاراسەو سکرتێروو سی پی تی ئالێن میچێلی کریان. جە نامەکەنە ئامان، کە یەرۍ ساڵێن بە حیج جۆرێ زانیاری جەبارەو رابەروو گەلوو کوردی عەبدوڵا ئۆجالانی ۋەردەس نییا. جە نامەکەنە ئامان، "سەرەڕاو ئاژەی جەستەیی ئۆجالانی کە جە ئیساتێنە مەتاویۆ پەشڕاس بکریۆوە کە ئینا چکۆ. تکاتا ۋنە مکەرمۍ کە دەموودەس گندۍ وێتا و هەنگامە بنیەیدۍ. تەنیا پی جۆرە تەرسی و نیگەرانیەکێما مڕەماوە. شمە ساحیب و ئا مافەیندۍ کە سەردای گرڎوو زینڎانەکا لایەنکاو بەشدار جە پەیمانەکەی بکەردۍ، کە تورکیایچ یۆ چا وڵاتانە. تەنیا چێوۍ کە داواتا ۋنە مکەرمۍ ئانەنە کە دەموودەس شاندێوە بکیاندۍ ئیمراڵی پەی چەمپنەکۊتەی و کۆنترۆڵکەردەو تەندروسی بەڕێز ئۆجالانی و ۋەرپرسیاریی ۋێتا جابەجا بکەردۍ و ڕا بڎەیدۍ بنەیانە و پارێزنەرەکېش سەردایش بکەرا، ئێمە پینەی فرە دڵوەشۍ بیمۍ. ئینە پەیوەسا بە ملوێنان کورداوە. ئینەیچ هاندەرۍ بۆ پەی ئانەی تورکیا پەی مەسەلۍ کوردی ڕاو چارەسەری ئاشتیانەی بارۊنە ئاراوە. سوپاسوو وەختەکەیتا مکەرمۍ و هیوڎارێنمۍ ئینەی پېسە داواکاریی ئێمە قبوڵ بکەردۍ."

جە واتەواچا دەسوەڵێوستەی ئاشتی جە کوردسانەنە (Peace in Kuridstan) پ. جێف مایلی سەبارەت بە مژارەکەی قسێش پەی ئەرەم کانسۆی جە مەدیا خەبەرەنە کەردۍ.

'داوا جە سی پی تی مکەرمۍ کە دەموودەس هەنگام بنیۆ و ئەرکەکەی جابەجا بکەرۆ'

مایلی ئانەش وست ڕووە، کە رابەروو گەلوو کوردی عەبدوڵا ئۆجالان دەورێوە فرە گرنگش هەن و واتش، "بەتایبەتی پەی دەسپنەکەردەی پرۆسێوە ئاشتی چەمەڕاکریای و درێژەدای پا پرۆسەیە، ئۆجالان فرە گرنگا. ئێمەیچ پېسە هەڵمەتەو ئاشتی پەی کوردسانی داوا جە سی پی تی مکەرمۍ کە دەموودەس حۊڵەکاش وزۆنە گەڕ و ئەرکوو ۋێش جابەجا بکەرۆ. بەتایبەتی مشۊم جە بارەو ژیۋای ئۆجالانیوە ئاگاڎارما بکەرۊوە. ئێمە گەرەکمانە دمایی بە گۆشەگیرکەردەی ئۆجالانی بۍ و ئانەیچ بۆ بە مایۍ تاوانبارکەردەی گەلوو کوردی و کردەوێوە دڕندانێچ جە دژوو مرۆڤایەتی".