نوسینگەو یاسایی سەدەی جە دژو گۆشەگیری جە ئیمراڵینە جارێوە تەر داواکاریش ئاراسەو کۆمیتەو ڕاگیری جە ئەشکەنجەو ئەنجومەنو ئەوروپای (سی پی تی) کەرد. بە پاو هەواڵێوە عومەر ئیبراهیمئۆغڵۊی جە ئاژانسو مێزۆپۆتامیای، جە داواکارییەکەینە پەی دیداری چنی ڕابەر ئاپۆی و یەرێ زینانیا تەرو ئیمراڵی، ئاماژەش بە رووەدای و داواکارییەکا مانگەکا ئاب، ئەیلول، ئۆکتۆبەری و نۆوەمبەری دریان.

جە داواکارییەکەنە ئەرەیاوییان کە جە ماوەو ٤ مانگانە ٣٤ داواکاریی پارێزنەرا، ١٨ جارێچ داواکاری بنەیانەکا پەی دیداری بەرزکریانۆ، بەڵام جوابشا نەدریانۆ. جە داواکارییەکەنە ئامان، بەینو ٢٥و ئادارو ٢٠٢١ تا ٢٣ی ئۆکتۆبەری حیچ هەواڵێوە جەبارەو زینانیا ئیمراڵی وەردەسەنە نەبییەن و ٢٣ی ئۆکتۆبەری عومەر ئۆجالان جە چوارچێوەو دیدارو بنەیانەکانە سەردای ئیمراڵیش کەرد و ئانە وزیان ڕووە، "جە ٢٣ې ئۆکتۆبەرو ٢٠٢٤یۆ ڕا بە سەرۋنەدای زینانیا دوورگەو ئیمراڵی نەدریان.".

گلێرۆبییەو کۆمیتەو وەزیرانی یاڎ وزیاوە

قسەکاشەنە ئاماژە بە قەرارو 'پاشێلکاری' دریان کە دادگاو مافەکا مرۆڤی ئەوروپانە جەبارەو ڕابەر ئاپۆی جە ١٨و ئادارو ٢٠١٤ بەرش کەردەن و ئانەش ویر ئاردۆ کە ١٠ ساڵێ سەرو قەرارەیە ویەردەن، بەڵام تورکیا هەڵای هەنگامش نەنیان. جە داواکارییەکەنە ئانەیچ ویر وزیانۆ کە کۆمیتەو وەزیرانو ئەنجومەنو ئەوروپای تا ئەیلولو ٢٠٢٥ هەنگامێوە ئەرێنی هۆرمەگێرۆ و ئەمرەش کەردێنە بە سکرتاریەتی کە سیاونویس و قەرارێ نێوەندکاری ئامادە بکەرۆ. چی ئاستەنە دیارنییا کە تورکیا بە پاو یاساو مییانەتەوەیی هەنگامێ گونجیێ سەرو ئا بابەتەیە هۆرگێرۆ یان نا".

جە داواکارییەکەنە ویرش ئاردەنۆ کە سزاو زینانی هەتاهەتایی دژوار جەلایەنو دادگاو مافەکا مرۆڤو ئەوروپاینە پێسەو 'ئەشکەنجە'ی پێناسە کریان و ئانەیچ وزیان ڕووە کە سی پی تی جە پرسو زینانیا ئیمراڵینە مشۆم بە شێوێوە 'هەستیارانە' مامەڵە بکەرۆ. جە داواکارییەکەنە ئانە وزیان ڕووە، کە جە زینانو ئیمراڵینە جە کۆنۆ تا ئیسە هەنگامێ بە ئاراستەو خاسکەردەی دۆخەکەی نەنریان و ئانەیچ وزیا ڕووە، کە سی پی تی راپۆرتەو وێش جە ساڵۊو٢٠٢٢نە  ئاشکراش نەکەدە و ئانەیچ بییەن بە مایۍ ئانەی دۆخو 'ئەشکەنجەدای' بەردەوام بۆنە.

داواکارییەکێ

ئی داواکارییێ وزیێنێ ڕووە:

"هەلومەرجی هەنوکەیی جە ئیمراڵینە جە دما سەردانتا جە ٢٢ۍ ئەیلولو ٢٠٢٢ تا ئیسە ئینا دۆخێ نادیارەنە و ڕۆ بە ڕۆ دژوارتەر بۆنە. جەماوەو دووێ ساڵانە بارودۆخەکە پڕانۆ پەی ئاستێوە تازەی. هەرپۆکەی گەرەکمانە کە شمە سەردای زینانو ئیمراڵی بکەردێوە.

پەی ئانەی هەلومەرجو زینانیا سزادریێ بە پاو شکۆو مرۆڤایەتی بۆ، مشۆم مافو پەیوەندی ئاڎیشا چنی جەهانو بەری بە تایبەتی دیدارشا چنی پارێزنەرا و بنەیانەکاشا مسۆگەر بکریۆ، مافو زانیاری هورگێرتەیشا گەرنتی بکریۆ، دمایی بە سزاو دیسپلینی بێنە و دمای بە قەدەغەو دیداری چنی پارێزنەرا بێنە، پەی ئانەیچ مشۆم هەوڵەکاشا وزا گەڕ.

ئێمە داواکارێنمێ جە شمە پەی دمایی ئاردەی بە ئەشکەنجەی، ناستەی هەلومەرجو مامەڵەی خراپی و نامرۆڤانەی ڕاوجا بگیریۆنە وەر، هەرپۆکەی ڕاوجای هاڵی ١٠/٢ی پەیماننامەکەیتا دەسپنەبکریۆ و ئەرەیاوناش، ئەر سەردای پارێزنەرا و بنەیانەکا جە ماوێوە کوڵەنە ئەنجام نەدریۆ، بە تایبەتی تێبینییەکا سەردای ٢٢ې ئەیلولو ٢٠٢٢، گردوو چەمڎاری و تێبینییە گردییەکا وەڵتەرێ پێوەس بە رژێمو گۆشەگیری جە ئیمراڵی، پەی رای گردینی وەڵاکەردێوە و گوزارشتەو سەرۋنەداکەو ٢٢ۍ ئەیلولو ٢٠٢٢ جە چوارچێوەو پرۆسێس و ڕاوجاکانە ئاشکرا بکریا".