نێرگز محەممەدیە هورگێرەو خەڵاتو نۆبڵو ئاشتی و ژەنە زینانکریێ پەیوەس بە سەپناو سزاو جەقەنارەدای پەخشان عەزیزیێ واتش: "مشۆم هامکارییەکاما بەهێز کەرمێنە و یەک دەنگیما وەرفراوانتەر کەرمێ و جە دژو جەقەنارەدای ئێرانەنە یۆبیێ بیمێ."
نێرگز محەمەدیە باس جە وێڕاگری و، بەهێزی و ورەبەرزی پەخشان عەزیزیێ مکەرۆ.
پەی گلێرۆ کەردەی پەشتیوانی، بەتایبەت جەلایەنو بنەیانەو پەخشان عەزیزیێ ژمارێوە فرە جە چالاکوانا مافو مرۆڤی و، پارێزنەرا و داکۆکیکاراو مافو ژەنا جە سەرانسەرو جەهانینە جە تۆڕو کۆمەڵایەتی ئێکسینە بەشداریشا جە گلێرۆبییەی پەشتیوانی کەرد، دلێشانە نێرگس محەمەدیە براوێ خەڵاتو نۆبڵو ئاشتی چا بێ کە پەی ماوێوە کاتی جە زینانەنە بەرەژیێنە پەیامێوە دەنگیش وەڵا کەردۆ.
جەچوارچێوەو لێکەوتەکانە وەراوەر بە دۆسیەو پەخشان عەزیزیێ نێرگز محەممەدیە جە پەیامێوە دەنگیینە جەختش جە گرنگیی یۆبییەی و یەکڕیزی جە دژایەتیکەردەی جەقەنارەداکا ئێرانی کەرد دلێشانە سزاو جە قەنارەدای ناهەقو پەخشان عەزیزیێش گێردۆ سەرنجش وست سەرو وێڕاگیری و ئازای زینانیا سیاسی، بەتایبەتی ژەنا، کە بەردەوامێنێ جە وەرەنگاربییەیۆو سەرکوتکەردەی زینانو ئێڤینی و چبەرو زینانی.
چا چوارچێوەنە پەیامە دەنگییەکەو نێرگزێ دەنگش داوە و داواش جە گلێرگەو مییاندوڵەتی و وەرگری کارا مافو مرۆڤی کەرد هەوڵەکێشا پەی مڏرناو سزاو جەقەنارەدای پێسەو ئامرازێوە ستەمکەردەی گەورەتەر کەرانە.
پەیامەکەو نێرگز محەممەدیێ
جە پەیامە دەنگییەکەنە نێرگز محەممەدیە سڵامش جە گرڏ لێوە کەرد و ئەرەیاوناش، ئێشەو گلێرێبیێنمێ پەی تاوتوێکەردەو پەخشانێ و پرسو جەقەنارەداکا. سەرەتا بە باسکەردەو پەخشانێ دەس پنەکەرونە و دماتەر ملونو سەرو بابەتو وەرفراوان کەردەو جەقەنارەداکا.
ماچۆنە، پەخشان عەزیزیە جە زینانو ئێڤینی، جە مادەو ٢٠٩و سەر بە ئیتلاعاتی ڕاگیریا. وەرگەو ئەشکەنجەی تنیش گێرت- عەزیەتدای جەسەیی، فشاری دەروونی و مانگێرتەی واوەی جە واردەی. کاتێ ئاخیر جار فاڕیاوە پەی بەشو ژەنا، جەسەش لاواز بی بەڵام ورەش بەرز بێ. چنی یاوایش بە شانازییۆ وێش ئشناسا و واتش، 'من پەخشانەنا، توێژەرەو کۆمەڵایەتینا'. کردار و شێوازو ژیوایش بەڵگەو قسەکاش بێ، بەڕاسی بە گرڏ مانێوە توێژەرەو کۆمەڵایەتی بێ، تەنانەت جە زینانو بەشو ژەنا ئێڤینیشەنە. ڕستێ تایبەت کە جە مەشکمەنە چەسپیانە و یاڏش مەکەرونە ئانێ بێ دماو ژنەویەو سزێکێش چاکاتۆ ناڕەزایەتیمان بەربری. پەخشانە بە دەنگە بەرز و وەشەکەیش هەلهەلەش داوەنەو بەدەنگێوە بەرزو پەڕ جە ووزە بەجۆرێ ئەر کەسێ چا کاتەنە گۆشش چەنەما بیێ، حەجگیز پێشبینی ئانەیە نەکەرێ کە تازە حوکمو جەقەنارەداو وێش ژنەویەن. بە هێزێوە بێهامتای ئەرەیاوناش، 'ئینە گرڏش بەشێوەن جە ژیوای، مڏرامان چنی ژیوای تێکەڵ بییەن و پەی منیش بەردەوامی ژیواین.'
ئا شەوە بەشو ژەنا زینانو ئێڤینی جە ناڕەزایەتییەکانە سەرشا هوردا. دروشمەکێما حەوشێ زینانەکەیشا پەڕکەرد و بە ئاسمانو شەوێنە دەنگش داوە. پاسەوانەکێ چنین جارێ هەوڵو بڵاوەپنەکەردەیما دێنێ و هانما دێنێ گێڵمێ پەی ژوورەکاما، بەڵام ئێمە قەبوڵما نەکەرد. ئا شەوێ، فەرمانو زینانییەکەیما رەتکەردۆ.
تا نیمەو شەوێ زیاتەر جە ٤٠ ژەنا جە حەوشەکێنە مڏرێبێنمی و گۆرانیی مڏرامانی واچێنمێ و حەوشەکینە مەنیمێ و ئامادێ نەبێنمێ بلمێ چبەر کە ئینەیش کردەوێوە نائاسایی سەرپێچیکەردەی بێ- بەڵام شەوێ بێ کە جە یاڏەوەری گرذیمانە ئانێ چا بێنێ مەنۆوەو جە تاریخو بەشو ژەنا زینای ئێڤینینە مەنۆوە.
نێرگز محەمەدیە: پەنەوازا جە دژو جەقەنارەداکا ئێرانی یۆبیێ بیمێ
جە دماینو پەیامەکەینە نێرگز محەممەدیە ماچۆنە: "داوا جە گرڏو ڕێکوزیاکا مافو مرۆڤی و گلێرگەو مییاندەوڵەتی مکەرمێ کە پەشتیوانی ئا کەسا کەرانە کە دژایەتی سزاو جەقەنارەداکا جە ئێرانەنە مکەرانەو فشار وسا سەرو کۆماری ئیسلامی پەی مدرناو قەنارەداکا و مدرناو مافو ژیوای. پۆکەی با هامکارییەکاما بەهێز کەرمێنە و دەنگو یۆی گۆرە کەرمێنە و جە دژو جەقەنارداکا جە ئێرانەنە یۆبیێ بیمێ."
