شەنگالەنە چالاکییەکاو ٨و مارسی دماو بەرنامێوە چڕ و پڕی هێزی بە مەراسیمێوە جەماوەری یاوا بە دمایی. بە سەڎان ژەنی ئێزدیۍ جە باخچەو عەبدوڵا ئۆجالانینە جە دۆڵەو کەرسێنە کوۍ بیێوە، هەم وەعدوو گوڕپنەدای بە کۊشیای ئازاڎیی ژەناشا دا و هەمیچ پەیاموو ئانەیشا ئەرەیاۋنا، کە هەڵمەتەو ئازاڎیی جەسڎەیی رابەروو گەلوو کوردی عەبدوڵا ئۆجالانی بەگوڕتەر کەرا. جە بوارەکا ۋێپارێزنای تا کولتور-هونەر و ئەنجومەنەکاو گەلی، بە سەڎان ژەنۍ کە سەرمەشقایەتی کۊشیای شەنگالی ۋێڕاوەبەری و ئازاڎیی کەرا، جارێوەتەر هێز و جۆش و خرۆش و ۋێشا بە دۆسی و دوژمنی نیشانە دا. حەرپاسە جمیەروو ئازاڎیی ژەنا ئێزدی (تاژێ) چا ڕووەنە هەڵمەتەو "جە دژوو قڕکەردەی ژەنا بە بە دەنگوو ۋێپارێزنای"شا ئەرەیاۋنا.

'ئێمە سەرمەشقایەتی هەڵمەتەو ئازاڎیی کەرمۍ'

جە فەرماندەیی یەژەشەینە هێزا شەنگالیە جە مەراسیمەکەنە پەیاموو یەژەشەیش بە ژەنا ئێزدی و جەهانی ئەرەیاۋنا، ٨و مارسیش پێسە ڕۊو کۊشیای و مدرامانوو ژەنا بەنامۍ کەرد و ئی پەیامەشە دا: "ئانەی مەعناو کۊشیای ئی ڕووەیشە بە جەهانی نیشانەدا رابەر ئاپۆ بۍ. ئێمە سەرەتا جە گەریلاکاو کەشی، جە یەژاستاری، ئا هەڤاڵۍ کە سەنگەرەکانە ۋێڕاگری کەرا، جە یەپەژەی و جمیەروو ئێزدی پیرۆز کەرمۍ. رابەر ئاپۆیچ ماچۆ کە گرڎ ڕووۍ ڕۊو ژەنان، پێویسا گرڎ ڕووۍ بۆ بە ڕۊو ژەنا. ئانەی ئا ڕووەشە ماناڎارکەرد، گۊرەش کەرد، کۊشیای ژەناش پەرەپنەدا رابەر ئاپۆ بۍ. ئارۆ ژەنی متاوا بە ئشناسنامەو ۋێشا، بە بیەو ۋێشا، بە کولتوروو ۋێشا سەرمەشقایەتی گلێرگەی بکەرا. ٨و مارسی جە گرڎوو ئا ژەنا پیرۆز کەرمۍ کە گیانوو ۋێشا پەی ئازاڎیی بەخشا".

هێزا شەنگالیە ویرش ئاوردۆ کە هەڵمەتەو ئازاڎیی جەسڎەیی رابەروو گەلوو کوردی عەبدوڵا ئۆجالانی جە گرڎوو دنیێنە پاش وستەن قۆناغێوە تازۊ و واتش: "ئا هەڵمەتۍ پایۍ منیۆ قۆناغوو دووەمیۆ، ژەنیچ جە گرڎوو قۆناغەکانە بەشداری جە هەڵمەتەکێنە کەرا. پێسە یەژەشەی ئێمە تا دمایی پەی ئازاڎیی جەسڎەیی رابەر ئاپۆی کۊشیەیمۍ".

'٨و ئاداری ڕۊو ئازاڎییا'

ئەندامەو ناوەندوو کولتور و هونەری ستیا نەخشە خەزالەیچ ٨و مارسیش جە گرڎوو ژەنا جەهانی پیرۆز کەرد و واتش، "ماچا ئی ڕووە بۆ بە ڕۊو ئازاڎیی. بەتایبەتی ئی ڕووەیە جە رابەر ئاپۆی پیرۆز کەروو. مشۊم گرڎ ژەنێوە جەهانی بزانۆ مەعناو ئی ڕووەیە چێشا و گرڎ ژەنێوە ئا ڕووەیە پیرۆز کەرۆ".

'وەڵۍ کۊکوشیەکەینە ژەناو ئێزدی ٨و مارسی پیرۆز نەکەرێنۍ'

ئەندامەو دەسەو هەماهەنگی تاژێ ئەرهام ئیسماعیلە جە بارەو ٨و مارسیۆ پی جۆرە سەرنجوو ۋێش وست وەروو باسی: "فرە بە پیرۆزس منیەیمێرە کە ٨و مارسی شەنگالەنە پیرۆز کریۆ. وەڵۍ کۊکوشی ٢٠١٤ ینە ٨ و مارسی شەنگالەنە پیرۆز نەکریۍ، ژەنا ئێزدی کوۍ نەبێنێوە. ئیسە جە سایەو ئەندێشەکا رابەر ئاپۆینە ژەنا ئێزدی ٨و مارسی پیرۆز کەرا. بانگەوازما پۍ ژەناو ئێزدی ئانەنە کە هۊربێزا سەروو پەیا و ستەموو سەروو ۋێشا قبوڵ نەکەرا".