بە سەرمەشقایەتی فیدراسیۆنوو دیموکراتیکی عەلەوییەکا ئەوروپای (فەدا)، فیدراسیۆنوو جەمەو دیموکراتیکەکا مەرەشی (ماردیف)ی و ژەناو عەلەوی دیموکراتیکی، بە شێوێوە جەماوەری جە براندەنبوەگەر تۆرەنە کوۍ بیێوە، یاڎوو ئا کەساشا کەردۆ کە جە بوومەلەرزەکەو ٦و شوباتوو ٢٠٢٣ۍ مەرەشینە عەمرەو خوڎایشا کەردێبۍ.

سەرەتاو چالاکیەکەی بە مۆم گیسناینەی دەسشپنەکەرد. دماتەر عەلی کۆچەک باسش چانەی کەرد؛ ئانە بوومەلەرزەکە نەبۍ، بەڵکم بازرگان و شارەوانییە چەم ئاوراکۍ بێنۍ، بیۍ بە مەڵامەتوو گیان جە دەسدای ئا ژمارە فرەیە جە مرۆڤا.

حەرپاسە ئاماژە پانەی دریا، ڕژێموو ئاکەپە-مەهەپەی بیۍ بە مەڵامەتوو گیان جە دەسدای مرۆڤا و واتشا: "دماو بومەلەرزەکەی ئاستەنگ پۍ هامکاری قوربانیا وەش کریۍ، شوناس و باوەڕمەنڎیی گەلا هەرێمەکەی ڕوبەڕوو عەقڵیەتوو کۆکوشی دەوڵەتی بیوە. سیاسەتوو کۆکوشی بە ئیسەیچۆ بەردەواما".

پیر جەمال جە نەوەو سینەمیلیۆ‌‌‌غلۆی باسش چانەی کەرد کە بە ئیسەیچۆ جە هەرێمەکا بوومەلەرزەکەینە ڕۆشنا کە کۍ مەڵامەتوو ئی قۆرتانە.