ڕاپیمای گەورەو ئازاڎی کە پەی ئازاڎیی جەستەیی ڕابەروو گەلوو کوردی و چارەسەری دیموکراتیکوو پەرسەو کوردی چوار ڕوێن دەسش پەنە کەردەن، قوڵوو یوەمیش یاوا ئەلکێی شڕنەخی و قوڵوو دووەمیش دماو ئاگری یاوا پانۊس.
قۊڵوو یوەموو ڕاپیممایەکەی وانۊ دەسش پەنە کەرد، ئارۊ جۊلەمێرگۊ درێژەش بە ڕاپیمایەکەی دا و یاوا ئەلکێی شڕنەخی و چا پەرلەمانتاراو دەم پارتی و نوێنەراو ڕێکوزیا مەدەنییەکا خێرامای کەرد.
ڕاپیمەرەکۍ و ئانۍ ئامێبێنۍ خێرامایشا بەروو مەنتێقەکەیوە بە واتەیوە دروشمەکا پێسە"بژیوۊ مدرامانوو زیندانەکا" بەرەو ناوەندوو مەنتێقەکەی ڕاشا پیما و چا جەماوەری خێرامای کەردێ.
جەمۊبییەێوەنە وەردەموو بیناو دەم پارتینە ئەلکێنە پەرلەمانتاروو بازنەو ڕحاو ئا حزبەیە دیلان کونت ئایان واچێوەش پێشکەش کەرد و ئاماژەش کەرد، کە ئامانجوو ڕاپیمایەکەیشا "ئازاڎیی بەڕێز ئۊجالانین. ئی داواکارییە هەڵوێستا دژوو سیاسەتوو پەراوێزوستەی و نکۊڵیکەردەی جە کوردی، کە چندین ساڵێن پەیڕەو کریۊ. هەرپاسە پەی چارەسەروو پەرسەو کوردی مشۊم واوەی بەڕێز ئۊجالانی پێسە بەردەنگ و موخاتەبی قبووڵ کریۊ و سەروو مێزەو دایوسانایۊ کۊبییەیۊش چەنی کریۊ".
دماو دیدارەکا ئەلکێنە بەشداربیۍ ملا دەگاو ڕۊبۊسکی و سەرۍ قەبرەو ٣٤ گەنجا مدا، کە ٢٨ کانوونوو یوەموو ٢٠١١ کۊکوشۍ کریێ.
قۊڵوو دووەمی
قۊڵوو دووەموو "ڕاپیمای گەورەو ئازاڎی" کە لە قەرەسۊ دەسش پەنە کەرد، دماو کەردەیۊسەروو ئاگری یاوۍ پانۊس و چا بە جۊش و خرۊش و بە واتەیوە دروشمەکا "بژیوۊ سەرۊک ئاپۊ" و "بۍ سەرۊکی ژیوا مەبۊ" خێرامایشا وەنە کریا.
ئامادەبیۍ مەراسیموو خێرامای چەنی ڕاپیمەرەکا ورپڕۍ و دماتەر بەرەو بیناو ورچنییەی دەم پارتی ڕاشا پیما و چاگە نەژلا دەمیر پەرلەمانتارەو دەم پارتی قسێش کەردۍ و واتش، " مشۊم زەمینەسازی کریۊ پەی ئازاڎیی جەستەیی بەڕێز ئۊجالانی و پەی دەسەبەرکەردەی ستاتۊی پەی کوردی دەس بە گفتوگۊی کریۊ. داوا کەرمۍ کە دەس بە دایوسانای کریۊ. ڕاپیمایەکەما سەروو ئا بنەمێوە دەسش پەنە کەرد سەروو ئا بنەمێچە بەردەوام بۊ".
دەمیر درێژەو قسەکاشنە ئاماژەش بە سیاسەتەکاو ١٠٠ ساڵی وەڵینوو دەوڵەتی دژوو گەلوو کوردی دا و واتش، مشۊم ئیتر دەوڵەت چانەی بیاوۊنە بە فشار نمەتاوا بێدەنگێما کەرا و گەلوو کوردی گەلێوە وێگیرا و ڕۊ دماو ڕۊی سەرباروو گردوو هجووم و فشارەکا قەوەتتەر بۊ.
دماتەر ڕاپیمەرەکۍ بیناو ورچنیەی دەم پارتیینە چەنی خەڵکی کوۍ بیێوە و بڕۍ جە نویسیایەکاو ڕابەروو گەلوو کوردی عەبدوڵا ئۊجالانی ونیێوە.
دماتەر ڕاپیمەرەکۍ لوۍ وەردەموو زیندانوو پانۊسی و پەشتیوانیی وێشا پەی زیندانییە مانگێرتا بەر وست، کە ٢٧ تشرینوو دووەموو ساڵۍ ویەردێنە پەی ماڕای گۊشەگیریی سەروو ڕابەروو گەلوو کوردی و چارەسەری سیاسی پەی پەرسەو کوردی بە شێوەی نۊرەیی دەسشا بە مانگێرتەی جە واردەی کەردەن.
هاموەخت واچەکاشانە تەکاندا وەردەموو زیندانینە پێشکەش کریێ، داواکارییەکاشا پەی ئازاڎیی جەسەیی ڕابەروو گەلوو کوردی عەبدوڵا ئۊجالانی و چارەسەری سیاسی و دیموکراتیک پەی پەرسەو کوردی ئەوەخوای کریاوە.
چالاکییەکاو ڕۊو چوارەموو قۊڵوو دووەموو ڕاپیمای گەورەو ئازاڎی پانۊسوو ئاگریینە دماییش ئاما و سەوای چاوە دەس پەنە کەراوە.
