جە نیشتەیرەی شەوەی وەڵینەو پەرلەمانینە، بۊنەو ئانەیۊ کە بە دەنگی بەرز ناڕەزایەتییشا بەر وست، سەرۊکایەتیی پەرلەمانوو عێراقی، پەرلەمانتارە سەربەوێکێش جە هۊڵوو پەرلەمانینە کەرڎۍ بەرۊ.

بە پاو ئەرەیاونای پەرلەمانی، یاسای تازۍ ورچنییەی پەسەنڎە کریێنە. چوارچووەو هەماهەنگی کە هامپەیمانیی بەینوو ئا حیزبانە، کە بە لایەنگیرۍ ئێرانی نریارە، فرەتەرینۍ پەرلەمانینۍ و محەمەد شیاع سوودانییچ سەر پا هامپەیمانێتینە.

دما بەدماو وێنیشاندایە جەماوەرییەکەو ساڵەو ٢٠١٩ی جە دژوو حوکمەتی، یاساو ورچنیەی تازۍ کریێبێوە. وەلێم پی تازەکەرڎەیۊشە جارێوە تەر عێراق گێڵۊوە پەی یاساو ورچنیەی ساڵەو ٢٠١٨ی.

جە وێنیشاندایەکاو ساڵەو ٢٠١٩ینە، چالاکەکۍ داکۊکیشا جە سیستمێوە ورچنیەی کەرد، کە ڕاش پەی بەرشییەی پەرلەمانتارە سەربەوێیا وەش کەرد و تاواشا ئا داواکارییەیشا چەسپنا.

پێسە جە ورچنیەی ساڵەو ٢٠٢١ینە نزیکەو ٧٠ پەرلەمانتارا سەربەوۍ، تاوابێسا بلا پەرلەمانۊ. پەرلەمانوو عێراقی  ٣٢٩ کورسیێن.

یاسای تازۍ پەسەنڎکریۍ جە ورچنیەی چێولاینە هەرمانەش پەنە کریۊ. وادەو ورچنیەی گرڎینی هەڵای دیاری نەکریان، وەلێم جگە جە پارێزگاکاو هەرێموو کورڎسانی، ورچنیەی سەربەوۍ (پارێزگاکا) جە ششوو تشرینی دووەمینە کریا. ورچنیەی پەرلەمانوو کورڎسانی، قەرارا جە ١٨و تشرینی دووەمینە ئێساڵ ورچنیەی پەرلەمانوو کورڎستانیچ کریۊ.

بە پاو یاسۍ وەڵینۍ ٨٣ بازنۍ ورچنیەی بێنۍ، وەلۍ یاسا تازەکێنە عێراق سەروو ١٨ بازناو ورچنیەیرە بەش کریۊ.

شیکەرەوۍ سیاسی "سەجاد ژیاد" سەروو هەژماروو وێشۊ باسش چانەیە کەرڎەن، کە یاسای تازۍ ورچنیەی ڕا  بە حیزبە گەورەکا مدۊ، بەئاسانی کورسیۍ بەدەس بارا. ژیاد نویستەنیچش: "حیزبە وچکلۍ و سەربەوێکۍ جە هەڵمەتەو و پڕۊسەو ورچنیەینە ڕووبەڕووۍ قۊرتا و ئاستەنگا باوە، وەروو ئانەی نەک سەروو ئاستی خۊجێیی بەڵکوم سەروو ئاستوو پارێزگاینە ملەملانۍ کەرا". بە پاو قسەکاو ئا شیکەرەوە سیاسییەیە ئەگەر پارتە گەورەکۍ بە پاو پێویسیچ دەنگۍ نارا، متاوا کورسیۍ مسۊگەرۍ کەرا.

پەرلەمانتاری سەربەوۍ "عەلا رکابی" قسێش پەی ئاژانسوو هەواڵووو "فرانسە"ی کەرڎێنۍ و واتەنش: "چێولای کاندیدۍ حیزبە وچکلەکا و سەربەوێکا حیچ هومێدێشا پەی ئارڎەی کورسیی پەرلەمانی نەمەنەن".

س.ز