دەسەو ڕاۋەبەری ھورچنیای هامپەیمانی ڕەنج و ئازاڎیی و پارتو چەپی سەوزی جە بەلجیکا، جە شارو برۊکسل و پایتەخت و بەلجیکای و شارو ئەنڤەرسینە گلېرۊبیەیشا چنی گەلی ئەنجامدا.

جە برۊکسل بە بەشڎاری پەرلەمانتاری ۋەڵینو هەدەپەی "تورگوت ئۊکەر" و ئەنڎاما دەسەو ڕاۋەبەری ھورچنیەی پارتو چەپی سەوزی جە بەلجیکا "سەیدی فرات و زەینەب گۊرگۊ"نە، جە ناوەنڎو یۊبیەی سوریانەکا ئۊروپا (ESU)ی گلېرۊبیەیشا چنی گەلی ئەنجامدا.

جە ئەۋەڵۊ "تورگوت ئۊکەر" قسېش کەرڎۍ و ۋاتش: "ئەگەر گرڎما بە دڵ و بە گیان ھەرمانە کەرمۍ بە ئامانجەکاما میاۋمۍ. ئۊکەر ۋاتش، بە تایبەتی ئەرک و ۋەرپرسیاری گنۊنە سەرو شانەو ئا کەسا، کە ئەۋەڵ جارشانە دەنگو ۋێشا بەکار مارانە.

"سەیدی فرات" ۋاتش: "ئێمە چېرو گرڎ خراپێۋەنە خاسێۋە ۋەشکەرمۍ. ئیراڎێۋە جە دژوو خراپەکاری ھەن. ئێمە ئانەما چی نەورۊزەنە ۋینا. ئێمە جە گرڎ یاگێۋەنە پا ڕۊح و ئیراڎۊ ھەرمانە مکەرمۍ."

فرات ئەرەیاۋناش، هامپەیمانیی ڕەنج و ئازاڎیی چۋارچێۋێۋە دیموکراسییا و ۋاتش، "تەنانەڎ ئەگەر جیاوازی و کەموکوڕیچ بۊ، ئانە نیشانۍ بەها تاریخیەکامانە. حارپاسە ئێمەیچ ڕەنجو، هەستو، حۊڵەکېما، ڕۊح و ئیراڎەما بەشێۋەن چانەی."

"زەینەب گۊرگۊ"نە زانیاریش سەبارەڎ بە ھەرمانە گرڎیەکا پێشکەش کەرڎ و داواش جە گرڎ لایۍ کەرڎ بەشڎاری جە ھەرمانەکاشانە کەرا و ئەرکەکاشا جابەجۍ کەرا.

جە گلېرۊبیەکەنە ئەرەیاۋیا، نۋیسینگەو چڕیەو ھورچنیای جە برۊکسل ١٦ و نیسانیەنە کریۊۋە و داوا جە گرڎ لایۍ کریا بەشڎاری بکەرا.

حەرپاسە جە چۋارچێۋەو ھەرمان وکارەکا چڕیەی(بانگەشە) ھورچنیاینە جە شارو ڤێرڤیرسینە سەرداو دوکاندارا و یانا کریا.

ھ.ش