شێخ مورشید خەزنەوی جە شارو دێرکو کانتۆنو جەزیرەینە دەربارەو پێشئامایەکا جە سەرنیشتوو ۋەرکۊتوو سوریاینە وتارەش دا.

نوێنەرۍ پارتە سیاسییەکا و ڕێکوزیاکا و ڕۆشنویرا و گەل بەشدارۍ بێنۍ جە وتارەکێنە جە مېڎانوو ۋەردەمو مېیانو جمېیەرو جوانا شۆڕشگێڵنا گەشمەرڎە باوەڕینە.

شێخ مورشید سڵامش ۋنەو مڎرامانو گەلا سەرنیشتوو ۋەرکۊتوو سوریای و دڵسۆزییشا پەی پرۆژەو دیموکراتیکی کەرد، واتش: "ئارۆیچ سیاسەتو قڕکەردەی و کۆمکوژی و دەسسەرەرەگێرتەی و پاکتاوکەردەی زۋان و کەلتووری کوردی، ئەنجامش نمەبۆ. چونکی گەل ئەرەپڕان، مڎرامان مکەرۆ و بەردەوام مەبۆ جە مڎرامانی".

خەزنەوی واتش: "تاریخ سەرجە نۆ منویسیۆوە، پەنەوازا گەلوو کوردی تاریخو ۋێش بنوویسۆوە. پەنەوازا غەڵەتەکا ۋەڵیناما واوەی نەکەرمێوە. وەنە جە تاریخی هۆرگێرمۍ و بە یۆبیەی ۋێما هەڕەشەکاو سەریما سەڕمێوە".

خەزنەوی ئاماژەش پانەی کەرد دووۍ هێڵۍ سوورێشا هەنۍ، واتش: "نمەبۆ کەس نزیکو ئی هێڵە سوورا بۆوە، یۆشا قەسەدەن، ئەوی تەریچ ئیدارەو ۋێڕاوەبەریا. پەنەوازا دەسکەوتەکاما پارێزنمۍ، ناکۆکییەکاما بنیەیمۍ لاوە و ڕا جە دوژمنی گێرمێنە".

شێخ مورشید جە دما دماینە واتش: "کەس نمەتاوۆ بیەو گەلو کوردی سەڕۆوە. ئی جارە سەرکۆتەی پەی ئێمەن".