سەرۆکو ئەمریکای دۆناڵد ترەمپ دماو سەرۋنەداکەیش پەی سعودیەی، جە فڕۆکەکەشەنە بەرەو قەتەڕ، جوابو پرسیارەو ڕۆنامەنوویساش داوە، ترەمپ ئەرەیاۋناش بە ئەحمەد شەرعیش واتەن: "دماو چارەسەری گرفتە دلېینەییەکا" سوریا بەشدار بۆ جە ڕێککەوتننامەو ئەبراهامینە.

ترەمپ واتش: "ئاڎیچ واتش "خاسا" بەڵام هەڵای هەرمانۍ فرۍ مەنێنۍ کریا".

سەرۆکو ئەمریکای دماو هۊرگېرتەی گەمارۆکا سەرو سوریای، ڕۊی دماین، ڕۊو چوارشەممەی چنی ئەحمەد شەرعی گلېربیۆ و داواش کەرڎ پەیوەندییەکاش چنی ئیسرائیلی ئاسایی بکەرۊوە.

گلېرۊبیەکەی جە لایەنو واشنتنیوە پېسە گلېرۊبیەیۍ کوڵی و نافەرمی ئەرەیاوېیا، چنەشەنە شازادەو یاگەگیرو سعودیەی محەمەد بن سەلمان ئاماڎە بۍ، سەرۆککۆمارو تورکیای ڕەجەب تەیب ئەردۆغان جە ڕاو ئۆنلاینیوە بەشداربۍ، گلېرۊبیەکەی نزیکەو نیم سەعاتاش خواینا.

بەپاو کۆشکۍ چەرمۍ، ترەمپ داواش جە شەرعی کەرڎەن "تیرۆریستە فەڵەستینییەکا" جە سوریانە بەربکەرۆ و "ۋەرپرسیاری" ڕاوەبەردەی ئا زینانا گېرۊنە ئەستۆ کە ئەندامۍ داعشیش ئینۍ چنە.

ئی قەرارە بەتایبەت جە لایەنو سعودیەی و تورکیایۆ داوا کریابۍ.