سه‌رۆكو هه‌رێمی و یاگەگیرەکېش و دۋۍ قسۍ حسابیۍ
" دیندار زێباری ماچۊ تەنیا زینڎانۍ سیاسیچ نیا هه‌رێمەنە، چەولایچۊ داغ و ئه‌ر كه ته‌نیا تاوانەشا ئانېنە ۋیرو ڕای سیاسیشا جیاوازا نزیكه‌و دۋۍ مانگان مانیشا جە ۋارڎەی گېرتېنە به بەهانۍ كوشتەی میتێۋە".
١
چی ئاژە ناجۆرو شێۋیا و بەینو پارتی و یه‌كێتی جە لایۍ و هه‌رێم به‌گرڎی جە لایۍ تەرۊ سه‌رۆكو هه‌رێمی و یاگەگیرەکېش ئینۍ چکۊو چاره‌سه‌ری قۊرتەکانە ، ئایه حه‌ر به ڕاسی ئا یەرە براده‌ره حیچ دەورېشا مەنەن، پارتەکۍ ۋېچشا به قسېشا کەرا، حیچ حسابێۋە پۍ قسۍ و قەرارەکاشا ئه‌گه‌ر بۊشا کریۊ، ئاگاشا چا گرڎ ماڕای یۊترینی و سوكایه‌تی کەرڎەیە به یۊترینی هەن .
٢
دیندار زێباری ماچۊ تەنیا زینڎانۍ سیاسیچ نیا هه‌رێمەنە، چەولایچۊ داغ و ئه‌ر كه ته‌نیا تاوانەشا ئانېنە ۋیرو ڕای سیاسیشا جیاوازا نزیكه‌و دۋۍ مانگان مانیشا جە ۋارڎەی گېرتېنە به بەهانۍ كوشتەی میتێۋە و ۋەرو خاتەرەو توركیای گیریېنۍ، ئه‌ی كۍ ئا گرڎ توركا گېرۊ كه ڕۋانە كورڎۍ کوشا ، سه‌رۆكو هه‌رێمی و یاگەگیرەکېش متاۋا چېش کەرا .
٣
هامسه‌رەو شێخ ئه‌دهه‌م بارزانی جە نوقتۍ وشکناینە ڕاگیرە کریۊ، شڕ و شیتاڵش فڕەمڎا ئا دەوروبەرە ، دماو سەعاتۍ دۋۍ سەعاتا ئینجا ئیزنیش مڎا، وەلۍ مۆبایله‌كاشا گلمڎاوە و چنەشا مسانا، شێخ ئه‌دهه‌م مامۊزاو مه‌سعود بارزانین، هەڕە سەرەو خه‌ڵكی بۍ پەشت و په‌نایرە، به دینداری واچدۍ مەڵامەتو ڕاگېرتەو ژەنېۋە جە مەنتیقەکەو ۋېشەنە چېشا سه‌رۆكو هه‌رێمی و یاگەگیرەکېش چی نتقشا جە ۋېشا بڕیەن .
٤
ماۋېۋە چېۋەڵتەر ڕا جە خانمەو یۋەمو عیراقی گیریا تا بلۊ پۍ ۋەرنیشتی و به‌شڎاری جە كۆنفراسێۋە تایبه‌ت به لۆزانینە کەرۊ، خانمەو یۋەمو عیراقی کناچۍ برایم ئه‌حمه‌دی نۋیسه‌ری و ڕۆماننۋیسی و سیاسیا، ئا پیا کە تا ئیسەیچ قەبرەکېچەنە وازش چنە نمارا، پوڵه‌كیېۋە ۋەرکەوتی ماۋېۋە چېۋەڵتەر كتێبێوەش سەر نۋیستەبۍ به نامونیشانو" خیانه‌ت جە برایم ئه‌حمه‌دیۊ پۍ شانازۍ كناچېش " ئه‌رێۍ خەڵکینە سه‌رۆكو هه‌رێمی و یاگەگیرەکېش كه‌ی ئی جۆره تۆمه‌ت و نۋیستەیا به تاوانەی گۊرۍ و ۋەشکەرڎەی دوۋە به‌ره‌یی جە قەڵەم مڎا و حەدېۋەش پۍ منیارە، چن شه‌رما به قەرارو توركەکا سنووری ده‌سكردو بەینو پانیشتی و ۋەرنیشتی قفڵکریۊ .
٥
وه‌زاره‌تو پێشمه‌رگەی ئینا لېوارو هۊرشېۋنایۊینە، وه‌زیر مودېۋە فرەن وه‌زاره‌ته‌كه‌ش جیائاستەن و ئیمزاكېش مەنېنە، سه‌رۆكو هه‌رێمی و حه‌ردۋە یاگەگیرەکەش كه مشۊم چی جۆره قۊرتانە قسۍ یه‌كلاكه‌ره‌وۍ و چاره‌سه‌ریشا بۊ كه‌چی رێز جە ئیمزاكېچشا مەگیریۊ و قەرارەکېشا وزیانە ته‌نه‌كه‌و شېخەڵیۊ و قسېچشا نیەنە .
هـ . ش
