"سەلما گورکان"ە یاگەگیرەو سەرۊکو پارتو ڕەنج (ئەمەپە)ی، کە بەشێۋەن جە هامپەیمانیی ڕەنج و ئازاڎیی، جە بارەو ھورچنیاکاۋە پۍ ئاژانسو هەواڵی فورات (ANF)ی قسێش کەرڎۍ.

"سەلما گورکان"ە ئەرەیاۋناش، ئاستو فەقیری خەڵکی، ڕێژەو بێھەرمانی، نا ھومېڎی جوۋانا پۍ ئاینڎەیشا، بەرزبیەیۊ ھورماسای دەرئەنجامو کاولکاری و سیاسەتە ئابوورییەکا دەسەڵاتین و ۋاتش: "گرڎو ئی سیاسەتا تەنیا ڕاسیێۋە نیشانە مڎۊ کە ئاڎیچ سەروسیستەمو تاڵانی و چەوسنایۊ و دۊشتەی بنیاڎ نریان. چنی ئانەیچ، فشارو دەسەڵاتی، قەڎەغەکریێکۍ، دۊسیەو وستەیرەو پارتەکا، نموونە پېسە حەوڵو وستەیرەی هەدەپەی مۋینیۊ، هەڕەشۍ جە دژوو سەرکردەو پارتە ئۊپۊزسیۊنەکا، تەقەکەرڎەی جە باڵەخانەو پارتەکا جە شارەکانە پېسە پارتەکا جەهەپەی و ئیی پارتی، کەش و هەوای سیاسی ئیسەی وزۊنە ۋەرو چەما. جە لایۍ تەرۊ، ئا بابەتۍ، کە هامپەیمانیی جمهوری چنی هامپەیمانە تازەکاش باسش کەرۊ، ھورشانایۊ مافەکا ژەنا، پېسە هامپەیمانی و یاساو ۋەرەنگاربیەیۊ تنوتیژی دژ بە ژەنا. ئېمە چێگەنە ئانەی ۋینمۍ، کە دما کۊتەی  کۊمەڵایەتی بە  ڕێکوزیای کریۊ. ھامۋەخت چنی سیاسەتو ڕانستی و تاڵانی و چەوەسنای و دۊشتەی، سیاسەتۍ دژبە یۊی، فشارو، قەڎەغەکەردەی و تنوتیژی ڕاۋەبەر کریا. پانەیچ ڕۊشن بۊۋە، کە دەسەڵاڎ گەرەکشا ھورچنیاکاو ١٤ و ئایاری بەرۊۋە و پانەیچ ۋڵاتی زیاتەر وزۊنە دلۍ تاریکی.

حەرپاسە پێویسا بە بەقوەتی ئاماژە پانەیچ کەرۊ؛ ئانەی جە ۋەختو بوومەلەرزەکەینە ۋینیا بۍ توانایی دەسەڵاتی نەبۍ، ئانەی ۋینیا ئەنجامو خودو سیاسەتەکا دەسەڵاتی بۍ. ۋەرو ئانەی چەمەڕوانیۍ هەن پۍ چارەسەرکەرڎەو کێشە قووڵەکا خەڵکی و هامپەیمانیی ڕەنج و ئازاڎیچ بە بەرنامەو ۋێش سەرو چارەسەرکەرڎەو کێشەکا، پەنەوازش بە کۊشیای ڕێکوستەی گەلی ڕۊشن و ئاشکران. پۊکەی ئی هامپەیمانییە بیەن بە یاگەگیری پۍ گەلی."

"سەلما گورکان"ە سەبارەڎ بە ھورچنیاو سەرۊکایەتی ۋاتش، "هەڵۋێسو ئێمە ڕۊشنا. ئامانجو ئەساسی ئێمە ئانەن، کە ۋێڕاۋەبەری تەنیا پیای دلېنە بەرمۍ. ئێمە سەرو نامۍ کەسەکا قسێما نەکەرڎە. چارەسەرو کێشەکا ئیسەی ئینا چڕیەو کۊشیا و بەرنامەو هامپەیمانیی ڕەنج و ئازاڎینە. جە ھورچنیاکا سەرۊکایەتینە، تاکتیک بریتییا جە شکسپنەئارڎەو ڕاۋەبەری تاکە پیای. پۍ ۋەڵێۋستەو خەباتی، بە پەی لواو ئێمە ئینە قۊناغێۋی گرنگا. پېسە هامپەیمانییەکەی، هەڵۋێسو ۋێما بە ئاشکرا ۋست ڕوۋە".

ھ.ش