ئەندامو شاندو ئیمراڵیی دەم پارتی، سری سورەیا ئۆندەر جە ١٥ و نیسانی بە مەڵامەتو سەکتەو دڵیوە ڕەوانەو خەسەخانەی کریا، هەڵای ئاژەو مەترسیش نە وېیەرنان. سەردای و پەیامەکۍ پاڵپەشتی پەی ئۆندەری بەردەوامێنۍ.

دەمیرتاش: دڵما ئینا چنیت

هامسەرۆکی وەڵینو پارتو دیموکراتیکی گەلا (هەدەپە)ی سەڵاحەدین دەمیرتاش جە زینانو ئەدرنەیۆ پەیامێوەش پەی ئۆندەری کیاست، ئۆندەرش پېسە "پەیامبەرو ئاشتی" نامۍ بەرڎ، واتش: "ڕووبەڕوو هرووژمی ناهەقی و سوکایەتی بیەیۆ، بەڵام بەپاگیریوە سەرو ڕاو ئاشتی بەردەوام بیەی. پۊکەی هەمیشە یاڎ و ڕێز و قیمەتێوە گۊرەت هەن.

ئێژا سری هۊرزۆ سەرو پەیا، ئی ئاشتییە مێنە دی، ئینشااڵلە بە ئەنجامو ڕەنجو ۋێت سەربەرز بی. کاکە سری تۆ جە گرڎ کەسێ زیاتەر لایەقو ئینەینی، نزا و دڵما ئینا لا تۆ، وەشما مسیەی کاکی ئەزیز".

سەرۆک شارەوانی ئیستەنبوڵی بە وەکالەت سەرش ۋنە دا

سەرۆک شارەوانی ئیستەنبوڵی بە وەکالەت نوری ئاسڵان سەردای خەسەخانەیش کەرڎ، جە بارەو ئاژەو ئۆندەریوە پرسیارەش جە ۋەرپەرسا دەم پارتی و دکتۊرەکا کەرڎ.

ئاسڵان ئەرەیاۋناش گرڎ لایۍ پاڵپەشتی ۋێشا پەی ئۆندەری ئەرەیاۋنان و ئینەیچ مایۍ دڵوەشینە.

باخچەلی تەلەفۆنش کەرڎ

سەرۆکو گرڎیی مەهەپەی دەوڵەت باخچەلی دەربارەو ئاژەو سری سورەیا ئۆندەری پەیوەندیش بە پەرلەمانتارەو دەم پارتی پەروین بوڵدانۍ و دکتۊرەکاوە کەرد. باخچەلی جە پەیوەندییەکەشەنە چنی پەروین بوڵدانۍ، هیواو خاسبیەیشۆ پەی ئۆندەری واست. وە جە پەیوەندییەکەشەنە چنی خەسەخانەکەی و دکتۊرەکا زانیاریش دەربارەو ئاژەو تەندرووسی ئۆندەری هۊرگېرت.