سەرۆکو گرڏی جەهەپەی، ئۆزگور ئۆزەل پەرلەمانەنە جە گلێرۆبییەو فراکسیۆنو پارتەکەیشەنە، دەربارەو بانگەوازە تاریخییەکەو ڕابەر ئاپۆی قسێش کەردێ.

ئۆزەل جەبارەو پەرسەو کوردی و پرۆسەکەی واتش: "جە پەرسەو کوردینە پرۆسێوە تازە هەن. تەرسانە نامێوەش پەی بنیانە... پڕۆسێوە ئەنجام مڏانە کە ئانەی گەرەکشا کەراش شاراشۆ. پنەما ماچانە؛ 'چێوێ ڕووەمڏۆنە، پەشتگیریش چنە کەردێ.' ئێمە ماچمێنە؛ 'ڕاس واچێ بیدێ . بەیدێ پەرلەمان، باردێش پەرلەمان، پەرلەمان وستێ هەرمانە. با نوێنەری گەلی دەور گێڵنا'. ئەرەیاویا کە گلێرۆبیێوە بەینو وەزارەتو دادی و دەم پارتی پەی تاوتوێکەردەو هەنگامە یاساییەکا ئەنجام دریۆنە. بێگومان مەبۆنە تەنیا سەرو شانو شاندەکەی و وەزارەتەکا بۆنە. بەڵام ئەر ئی گلێرۆبییەی زەمینێوە پەی پەرلەمانی ڕەخسنۆنە، با ئەنجام دریۆنە. کاتێ ماچمێنە هەموارو یاسایی، پەرلەمانی، یاسا'، پنەما ماچاۆنە 'چی مەواچدێ تورکیایێ بێ تیرۆر'؟. کاتێ ماچمێنە پرسو کوردی بە ڕاو دیموکراتیکی چارەسەر کریۆنە. پنەما ماچانە 'پەرسەو کوردی نییەنە، تەنها پەرسەو تیرۆری هەن'. ئا کەسێ پاسە ماچانە، دماو ئانەی ناچارێ بیێنێ، ئیسە وردە وردە باسو هەموارو یاسێ و فاڕیاو یاساکا مکەرا".

ئۆزەل ئەرەیاوناش، جددیێنێ سەرو هەڵوێسەکاشا پەی مدرناو هەڵسەو ئەڏێا کوردی و تورکی و ناستەو ون متەی.