مېیانو ئەرەیاۋنای هێزەکاو سوریای دیموکراتیکی (قەسەدە) ئەرەیاۋناش کە تیمەکۍ ئۆپەراسیۆنی تایبەتی سەر بە هێزەکاشا، جە ١٢ و ئادارینە ئۆپەراسیۆنێوەشا ئەنجامدا، جە ئاکامەنە جوانېوە ئێزدیشا بە نامۍ عوسمان خەیرۆ خودێدایش ڕزگارکەرد. عوسمان جە هرووژمو چەتەکا داعشینە جە ٣ ۍ ئابو ٢٠١٤ جە شەنگالەنە بڕفانیا بۍ.

مېیانەکە ئەرەیاۋناش عوسمان خەڵکو دەگاو وەردیەو هەرێمو شەنگالین. جە ساڵۊو ٢٠٠٦ ینە جە ئەڎۍ بیەن و کاتێ زاوڵە بیەن، چەتەکۍ داعشی جە ٢٠١٤ ەنە ۋێش و بنەیانەکەشا بڕفانان.

بەپاو مېیانەکەی، ڕازەو عوسمانی پێسنەن، ۋێش و براکەش ٣ مانگۍ شارو موسڵینە مەنێبێنۍ، دماتەر جە براکەیش جیاکریانۆ و چەتەکۍ چنی ٦٠ زاوڵا ئێزدی کیاستشا پەی شارو بوکەمالو سوریای. عوسمان ٣ ساڵۍ پەروەردەو شەریعەتیش جە شارو بوکەمالینە دی و نامۍ "ئوسامە ئەل سەنجاری"ش ۋنە نریا. دماتەر بریان پەی بیابانو سوریای و چا ٣ ساڵۍ بەشداری پەروەردەو سەروازیی بیەن و ٤ ساڵۍ پېسە چەکڎاری دلۍ چەتەکا داعشینە مەنەنۆ. چا ئەڵغامێوەش پۊرە تەقانۆ و قاچی ڕاسش زامڎار بیەن.

عوسمان ئەرەیاۋناش جە دما دمایی ساڵۊو ٢٠٢٤ینە، چنی دەیان چەتا داعشی جە شۊنێوەنە جە بیابانو حومسینە مەنەنۆ، ڕوێوە شۊنەمەکێشا جە لایەنو هامپەیمانی مېیاننەتەوەییوە بە سەختی بۊمبواران کریان، جە ئاکامەنە ٢٠ چەتۍ کوشیۍ و ئا ڕزگارش بیەن.

جە دما دمایی قسەکاشەنە، عوسمان خەیرۆ خودێدا دڵوەشی ۋێش بە ڕزگاربیەیش بەربڕی و سوپاسو قەسەدەیش کەرد.