کۆمیتەو ڕاگێرتەی جە ئەشکەنجە و مامەڵەی خراپی (سی پی تی) جە ما بەینو ٧-١١و نیسانی ئەوەکۊڵیایش جە چڼین گێرتەخانا و مېیانو دەسسەرەرەگێرتەی جە تورکیانە کەردەن.

سی پی تی بە مەڵامەتو ڕاو جای و نزیکایەتییەکاش ۋەرا ۋەر بە ئیمراڵی چڼین کەرەتۍ ڕەخنەکریان، سەرەڕاو گرڎو ڕەخنەکایچ جارێوەتەر کۆمیتەکە، گێرتەخانەو ئیمراڵیش نەوست دلۍ بەرنامەو سەردای و ئەوەکۊڵیەکاشۆ.

کۆمیتەو سی پی تی پېوەس بە سەر ۋنەدایەکاش ئەرەیاۋنێوەش وەڵا کەرڎۆ و ئاماژەش پانەی دا مەرامی بنەڕەتی سەرۋنەدایەکاشا چەمڎاریکەردەی ئاژەو ئا کەسانە کە جە ١٩و ئادارو ٢٠٢٥یوە جە چوارچێوەو ۋێنیشانداکانە باڵبەسۍ کریێنۍ.

دلۍ شاندەکەو سی پی تینە کە سەردای گېرتەخانەکاشا کەردەن؛ سەرۆکو سی پی تی ئالان میشێل، نیکۆ هیرشک و چڼ پسپۆرێوە تەر بیەیشا هەن.

جە ئەرەیاۋناکەینە ئاماژە پانەی کریان کە شاندەکە چنی وەزارەتو دادی و چڼین کاربەدەسا وەزارەتو دلېینەی گلێربیەنۆ.

جە ئەرەیاۋناکەو سی پی تینە کە سەرو ماڵپەڕو ئەنتەرنێتیۆ وەڵا کریانۆ، دەسنیشان کریان شاندەکە جگە جە مېیانەکا دەسسەرەرەگێرتەی جە ئەستەنبوڵ، سەردای گێرتەخانەکا مەتریس، گېرتەخانەو ژەنا مەرمەرەی و گېرتەخانەو سینجانو ئەنقەرەیشا کەردەن و ئەوەکۊڵیایشا جە ئاژەو زینانیا کەردەن.

سی پی تی کە ماوێوە فرەن بە مەڵامەتو ئا هەلومەرجە گۆشەگیریەو ئیمراڵی سەرو ڕابەر ئاپۆی ڕەخنە مکریۆ، دماین جار ساڵۊو ٢٠٢٢ سەردای گێرتەخانەو ئیمراڵیش کەردەبۍ. بەڵام تا ئیساتۍ ئەنجامو گوزارشتەو سەر ۋنەدای ئیمراڵیشا پەی ڕای گرڎیی وەڵا نەکەردەنۆ.