دماو ٢٣ ساڵا جە دەسەڵاتداری، ئاکەپە پەی ئانەی نەورۆز بکریۆ بە پشووی فەرمی، سیاونویسێوە یاساییش پێشکەش بە پەڕلەمانی کەرڎ. ئی هەنگامۍ ئاکەپەی، دماو قسەکا سەرۆککۆمار ئەردۆغانی نریا.
وەڵتەر جە ساڵۊو ٢٠٠٠یوە جە لایەنو دەتەپە، بەدەپە، هەدەپە، جەهەپەی و مەهەپەیۆ بەمەبەسو ئانەی نەورۆز بکریۆ بە پشووی فەرمی چڼین جارۍ سیاونویسی یاسایی پێشكەش بە پەڕلەمانی کریا، بەڵام گرڎ جارۍ جە لایەنو ئاکەپەی دەسەڵاتداریوە ڕەڎکریێوە. بەڵام ئێساڵ ئی پێشنیارە بە شێوێوە جیاواز کە پاڵپەشتی ئاکەپەیش هەن پێشکەش مکریۆ.
دماو ئانەی ئەردۆغان واتش: "ئەر پێشنیارێوە پی جۊرە بۆنە، پەسینوش." پەڕلەمانتارو ئەستەنبوڵو ئاکەپەی، سەرکان بایرام ئەرەیاۋناش، سیاونویسێوە یاساییشا پێشکەش بە پەڕلەمانی کەردەن پەی ئانەی ٢١و ئاداری (جەژنەو نەورۆز)ی بۆ بە پشووی فەرمی.
وەڵتەر جەە سالۊو ٢٠٠٨ینە مەهەپە، جە ساڵۊو ٢٠٠٩ینە جەهەپە و جە مابەینو ساڵەکا ٢٠١٠ و ٢٠٢٣ێنە پێشنیاری هامشێوە جە لایەنو پەڕلەمانتاراوە پێشکەش کریابۍ. بەڵام حیچ کام جە پێشنیارەکا نەوزیۍ بەرنامەو کارو پەڕلەمانیوە و ڕەڎۍ کریێوە.
دماین جار پەڕلەمانتارەو وانو دەم پارتی گولجان کاچمازە، ئێساڵ سیاونویسێوەش پێشکەش بە پەڕلەمانی کەردەبۍ پەی ئانەی ڕۆو نەورۆزی بۆ بە پشووی فەرمی.
