هامسەرۆکایەتی ئەنجوومەنو گەلی دیموکراتیکو کامپو پەنابەرا گەشمەرڎە ڕۆستەم جوودی (مەخموور)ی دەربارەو فشارەکا حکومەتو عێراقی سەرو کامپەکەی ئەرەیاۋنێوە نویسیاش وەڵاکەرڎۆ.

جە ئەرەیاوناکەینە دەسنیشان کریان، حکومەتو عێراقی جیای چارەسەرکەردەی گرفتەکاشا، بە پێچەوانۆ پا ڕاو جایا گێرتێنێشەنە ۋەر گرفتۍ کامپەکەیش قوڵتەرۍ کەردێنێوە.

جە بەردەوامی ئەرەیاۋناکەینە دیاری کریان، فشارەکۍ سەروکامپەکەی، چنی گلېرۊبیەی ئی دماییەو بەینو عێراقی و تورکیای زیاتەر بیەن و ئامان: "سەرەڕاو بانگەوازو ڕابەر ئاپۆی پەی ئاشتی و گلېرگەی دیموکراتیکی، دیدارەکۍ بەینو دۊڵەتو تورکی و عێراقی حیچ خزمەتێوە بە چارەسەری سیاسیی نمەکەرۆ. بە پێچەوانۆ پەی ڕازیکەردەی یۊترینی فشارەکاشا سەرو کامپەکەی زیاڎ مکەرا. حەرچڼە کامپەکەما جە ڕوو ئیداری و ئەمنییوە پېوەسا بە حکومەتو عێراقی، بەڵام حکومەتو عێراقی بەحیچ جۊرۍ ئاماڎە نییا گرفتەکا تەندرووسی، پەرەوەرەدە، چېرخانی، ئیداری و یاساییەکا چارەسەر بکەرۆ."

جە بەردەوامی ئەرەیاۋناکەینە ئاماژە پانەیە کریان چڼین کەسۍ کە نەوەشی درێژخایەنی پېسە شێرپەنجەیشا هەن، نمەتاوا دەرمانەکاشا هۊرگېرا و بە ئشناسنامەو ئیساتێشاوە بلا پەی خەسەخانەی.

ئەنجوومەنەکە سەرنجش وست سەرو ئاژەو خۊنکارا زانشتگەی و واتش: "چوارساڵېن ڕا نمەڎریۆ خۊنکارا کەمپەکەی بلا پەی زانشتگەی و بووانا و ئی دەرفەتەشا چنە هۊرگیریانۆ. سەرەڕاو ئانەیچ حکومەتو ئێراقی چڼین جارۍ قەولش دا پرسو خۊنکارا چارەسەر بکەرۆ، بەڵام ئېساڵیچ ۋەنای بە دمایی یاوا و بەرەو زانشتگەی ڕووەو خۊنکارانە نەکریاوە."

جە درێژەو ئەرەیاۋناکەینە ئاماژە پانەی کریان کە گرڎ ساڵێ پەی پەنابەرا جە سەرانسەرو عێراقینە هاومکاری بەش مکریۆ، جە زمسانەنە نەوتە بەشە مکریۆ، سەرەڕاو ئانەیچ بەڵگەی پەنەواز هەن، ساڵانێوەن عێراق هامکاری کەمپەکەی نمەکەرۆ. هەرپاسە ئەرەیاۋېیان کە دەیان پڕۆژۍ ئاوۍ و ڕاو شارەوانی کەمپەکەی هەنۍ کە مشۊم چارەسەر بکریا، بەڵام چڼین جارۍ لوجنەو حکومەتو عێراقی ئامۍ و چارەسەریچشا نەکەرڎۍ.

ئەنجوومەنو گەلی جە دما دماینە ئاماژەش پانەی دا کە عێراق نزیکەو حەفتێوەن ڕا نمەڎۆ کەل و پەلو ئاوەڎان کەردەیۆ و بیناسازی بلۆنە دلۍ کەمپەکەیۆ.