سەرۆکی گردینو پارتو ئیسلامی کوردەسانی (پیک) حیکمەت سەربڵند جە بارەو وڕنای رژێمو سوریای و پەرەسانای مەیدانییەکا هۆرسەنگنایش کەرد. حیکمەت سەربڵند باسش چانەیە کەرد دەستەو تەحریری شامی (هەتەشە) حەلەبۆ تا دیمەشق دمایش بە دەسەڵاتو ئەسەدی ئارد و دەستنیشانش کەرد کە حکومەتی تازە ە دیمەشقەنە پێکئامان و ئانەش وست ڕووە کە فاڕییای تازەو سیاسی جە سوریانە تاوۆنە کاریگەری وەرچەم سەرو کوردەکاوە بنیۆرە.

سەربڵند ئاماژەش بە هرووژمو چەتەکا دۆڵەتو تورکی ئەرگیری پەی سەرو وەرنیشتی کەردو  واتش، "هامکات چنی ئا فاڕییایا گروپەکۍ بەنامێ سمۆی رێکوزیێنێ و بە پەشتیوانی دۆڵەتو تورکی جە وەرنیشتوو کوردەسانی جە دژو گەلو کوردی جەنگ مکەرا. ئەر گەلو کوردی یۆگێرتەی نەتەوەیی و ستراتیژی ساز نەکەرۆ، پێسەو جەنگو یوەمی و دووەمو جەهانی دیسان زەرەر مەندێ بیمێ. گەلو کوردی سەربارو ئانەی جە سەدەو ٢١ینە خاوەنو هێزی و سەنگێ گرنگین، بەڵام تائیسە یۆبییەی نەتەوەییش سازنەکەردەن. کورد بە یۆبییەی نەتەوەیی و هەڵوێسێ ستراتیژی متاوۊ ئا هەڕەشا دلێنە بەرا. ئەگەر یۆبیەی ستراتیژی بێ ئاراوە، کورد متاوۆنە جە هەرێمەکا کوردەسانیەنە بانۍ بە خاوەنو قەوارەی".

سەربڵند باسش چانەیەکەرد کە پارێزناو دەسکەوتەکا وەرنیشتی و مسۆگەرکەردەی ئازادی ئا گەلا چا هەرێمەنە مژیوا ئەرکێوە نەتەوەییا و پی جۆرە بەردەوام بی: "مشۆم ئاماڎۍ بیمۍ کە چنی هەر دەوڵەتێوە کە پەشتیوانی جە ماف و ئازادی گەلو کوردی مکەرۆ هامکاری ستراتیجیک بکەرمۍ. دەرفەتێوە تاریخی ئینا وەردەمو گەلو کوردینە. پەی کوردەسانی سەربەخۆی و ئازادی یۊبیەی نەتەوەیی پەنەوازا. ئەرەکۊشای گەلو کوردی پرسێوە نەتەوەییا و مشۊم بە پاو ئانەی جماوە".