جە حەفتەکا ۋییەردەینە یۆ جە سەرمایەداراو مەریوانی کە وەڵتەر ساحیب و پاساژ یاخود مۆڵوو "خورشید زرێبار"ۍ بۍ جە شارەکەنە، کرۍ مانگانەو دوکانەکاش جە دووۍ ملوێن تمەناوە پەی ١٢ ملوێنا و دماتەریچ پەی ١٨ ملوێن تمەنا زیاڎ کەرد.

یەدوڵا روزچەنگ کوڕەگەورەو بنەیانەو روزچەنگی کە جە سەرمایەدارە ئشناسیاکا مەریوانین و وەڵتەر بە مەڵامەتوو چۆوەگلیایش جە دۆسیێوە چەرمەکەردەیۆ زەڕینە بە قیمەتوو شەس ملیار دۆلارا جە تەرەفوو دادگایۆ داواکریا بۍ، بەڵام بەرەو هەڕێموو کوردسانی و ئەمریکای بڕەمابۍ.

دەوڵەتوو ئێرانی دەسش سەروو پاساژەکەیرە گرتەبۍ، بەڵام باس چانەی مکریۆ جە ماوەکا ۋییەردەینە جە ڕاو بەرتیلۍ فرەیۆ بنەیانەو روزچەنگی سەرجەنۆ پاشاژەکەشا سانانۆ و جە ڕاو جەمۍ جە کەسە جەنگەرانا و کارد شاناوە فشارشا وستەن سەروو دوکانداراو پاساژەکەی، پەی ئانەی کرۍ مانگانەی جە دووۍ ملوێن تمەناوە بکەرا بە ١٨ ملوێن تمەنۍ.

ئینەیچ جە وەختێنە بەپاو یاسای مەکریۆ موڵکێوە کە دەسش سەرەرە گیریان، واوەی جە تەرەفوو  هەمان کەسیوە بسانیۆوە.

کرۍ مانگانەو ١٨ ملوێن تمەنا پەی دوکاندارا کرێوە یەکجار فرەن و تواناو ئا کرێشا نییەنە، حەرپۊکەی دەسشا بە مانگرتەی و ناڕەزایەتی بەربڕیەی کەردەن.

دوکاندارەکۍ ژمارەشا نزیکەو ١٨٠ کەسان و شەکواشا بەرزەکەردێنۆ، بەڵام سەرەڕاو ئا فشارا و حەرپاسە هەڕەشۍ کەسانی جەنگورەشی سەر بە بنەیانەو روزچەنگی دادگا و لایەنە پەیوەندیدارەکۍ ئەرەیاۋنانشا، دەسوەردای چا دۆسیەنە مەکەرا.

بە قسۍ دوکاندارەکا ئارۆ جەنگورەشۍ و کارد شانە بە کرێگرتەکۍ بنەیانەو روزچەنگی بە کاردی و قەمۍ هجوومشا کەردەن سەروو پاساژەکەی و بە زەبروو هێزی وستەنشارە و دوکاندارە نانبڕیاو بێکار کریێکێچ ۋەروودەم و پاساژەکەینە مانیشا گێرتێنە.

دوکاندارەکۍ ئەرەیاۋنانشا، کە تا یەکلایی بیەیۆ دۆسیەکەیشا بە ئەنجام یاوای شەکواکێشا دەس جە مانگرتەی هۊرمەگێرا و شەکواکێشا بەرانە تاران.

بەمەڵامەتوو هەڕەشەکاو بنەیانەو روزچەنگیوە هیچ میدیا و دەزگێوە ئەرەیاۋنای دلێینەی ئاماڎەنەبیەن هەواڵوو مانگرتەی ئا دوکاندارا رووماڵ بکەرۆ.