هیتیاراو فەڕەنسای وەعدەکاو سەرۆکوەزیرانی گابریەل ئاتال قبووڵ مەکەرا و پەی تەوقدای پاریسی دەسشا بە جموجوڵی کەرد، حکومەتیچ ١٥ هەزار پۆلیسێش وستێ ئامادەییوە. فرەویاگانە چالاکیی وەربەسنیایرەی دەسش پەنە کەرد.
فیدراسیۆنی نیشتمانیی هیتیارا و هیتیارە گەنجاو فەڕەنسای داواشا کەردە، ئارۆ سەعات ١٤:٠٠ دەوروبەروو پاریسینە ڕاو نیایرەی هەشت خاڵاو کۆنتڕۆڵی و وەربەسیوە، تەقەو پایتەختی بدریۆ. ئینەیچ پێسە ناڕەزایەتیێوە دژوو خراپیی دۆخی بژێوییشا و سیاسەتەکاو حکومەتی وەراوەر بە کەرتوو کشتوکاڵی.
١٥ هەزار پۆلیسی وزیێ ئامادەییوە
جراڵد دارمانین وەزیروو دلێ فەڕەنسای واتش، پەی ڕاگێری جە لوایدلێ تراکتۆروو هیتیار پەی دلێ پاریسی و شارەگەورەکا و ڕاگێریی جە تەوقدای بازاڕوو ڕونگیسوو پاریسی و فڕۆکەخانەکا، ڕۆو دووشەممەی ١٥ هەزار پۆلیسی وزیێنێ ئامادەییوە.
واتیچش، کە مەبۆ پۆلیس دەس وزۆ دلێ خاڵەکاو گەمارۆدایۆ، تەنیا هەرمانەشانە کە ئاسایش دابین کەرا و جە چوارچێوەو بنەماکانە جووڵیاوە.
حکومەت وەڵێنیازی تازە پێشکەش کەرۆ
سەرۆکوەزیران گابریەل ئاتال ڕۆو یەکشەممەی هەوڵێش دێ ڕاو چند وەعدێوە هیتیارا قایل کەرۆ و ددانش نیا پانەیرە کە ڕاکارەکاو ڕۆو جمعەی هەینی پەی ڕازیکەردەی هیتیارا، نەتاوانشا دمایی بە نیگەرانیی هیتیارا بارا و جەختش کەردۆ، کە قەرارێ سەرێعێ بەرکەرا.
وەزیروو کشتوکاڵوو فەڕەنسای مارک فینو ڕۆو یەکشەممەی واتش، ئا ڕاکارە تازاو حکومەتی بارەو کشتوکاڵیوە و پەی دەمۆلوای داواکاریی هیتیارا ئامادەش کەردێنێ، ماوەو حەفتێوەنە ئەرەیاونیا.
لە چندین مەنتێقاو فەڕەنساینە هیتیارێ باس کەرا بۆنەو قەرارەکاو حکومەتیوە، تواناو دابینکەردەی بژێوییشا نەمەنێنە و پەوکای دەسشا بە سەرەوردای کەردەن.
حکومەت بە بەشێوە جە داواکارییەکاو هیتیارا قایل بییەن، پێسە دەستبەرداربییەی جە زیادکەردەی باجوو سەروو گازوائیل و قەرەبووکەردەیۆ ئا هیتیارا بۆنەو پەتای ئاژەڵییوە زەرەرشا وەر کەوتەن، وەلێ سەرباروو ئانەیچە تووڕەیی هیتیارا کەم نەبییەنۆ.
جە چند یاگێوە ئا وەڵاتەیچنە هیتیارێ بە تەراکتۆرەکاشا ڕا سەرەکییەکاو هاموشۆیشا بەستێنێ و تەمادارێنێ پاریسیچنە هاموشۆ و دەروازەکاو شارەکەی پەکە وزا.
