پەرلەمانتارو ڕحاو دەم پارتی عومەر ئۆجالان سیاونویسو ئەوەکۊڵیایێش پێشکەش بە پەرلەمانی کەرد بە ئامانجو ئەوەکۊڵیای جە تۆمەتەکا قسۍ قیناویۍ، بەرکەردەی کۆمەڵایەتی، پاشێلکەردەی مافو مرۆڤی و جیاکەردەیۆ ئەرەمەرزیای دژو کورد و عەلەوی جە ژاپۆنەنە.
جە سیاونویسو گوزارشتەکێنە بە دیاریکریایی ئاماژە پانەی کریان کە پەنابەرا کوردی و عەلەوی جە شارەکا وارابی و کاوەگوچی سەر بە پارێزگاو سەیتامەی جە ڕاو دیجیتاڵ میدیایۆ کریانە ئامانج و ڕووبەڕوو هەڕەشۍ سنورداشکەردەیۆ باوە و دووچارو کردەوەی میزاجییانەو هێزە ئەمنییەکا باوە.
عومەر ئۆجالان پەرلەمانتارو ڕحاو دەم پارتی ئەرەیاۋناش، تورکیا ۋەرپرسیاری پارېزنای مافە کولتوورییەکا و ئازادی ئایینی هاموڵاتیاش جە جبەرو وڵاتینە ئینا ئەستۆنە. جە پێشنیازەکەنە ئاماژە بە پەیماننامە مېیاننەتەوەییەکا کریان کە تورکیا بەشدارا چنەشا و ئاماژە پانەی کریان کە قسۍ ڕەقۍ و جیاکەردەیۆ تاوانەی دژ بە مرۆڤایەتییەنە
جە سیاونویسەکەنە بە کوڵی ئی داواکاریۍ وزیێنۍ ڕووە:
*پەنەوازا باڵیۆزخانەو ژاپۆنی جە ئەنقەرەنە بەیاننامېوە فەرمی بەربکەرۆ.
*پەنەوازا تورکیا پېوەس پی مژاریۆ هەرمانەی زیاتەرە بکەرۆ چنی باڵیوزخانەو تۆکیۊی و کۆنسوڵخانەی.
*پەنەوازا ئی مژارە بەشێوۍ دیبلۆماسی جە ما بەینو هەردووە وڵاتینە تاوتوێ کریۆ.
*پەنەوازا شاندێوە پەرلەمانی بلۊ پەی ژاپۆنی و ئەوەکۊڵیای جە ڕووەدایەکەی بکەرۆ.
جە سیاونویسو ئەوەکۊڵیاکەینە ئامان: "پەنەوازا بە وردی شۊنیرەلوای پەی گرڎ قسۍ قیناوی و جیاکەردەیۆ و ئەگەرو پاشێلکاری ۋەرا ۋەر بە هاموڵاتیا کوردی و عەلەوی جە ژاپۆنەنە بکریۆ، هەرپاسە دەسپنەکەردەی ئەوەکۊڵیای پەرلەمانی بە ئامانجو واوەی هۊرسەنگنای تواناو پارېزنای کۆمارو تورکیای پەی هاموڵاتیا ئەرەنیشتۍ جبەرو وڵاتی و لوقایۆپۊرە بە هەڵوێسە دیپلۆماسیەکەیشەرە".
