سەرسەعبوو ئارۆی دووەشەممە موحسین مەزڵوم، محەمەد فەرامەرزی، وەفا ئازەربار و پژمان فاتحی جە زینڎانوو قزڵ حیساری جە قەنارە دریۍ.

ماڵپەڕوو ڕسمی دەسەڵاتوو دادوەری ئێرانی (میزان) هەواڵوو جە قەنارەدای ئا چوار زینڎانییە سیاسیەو کوردیش پەشڕاسکەردەنۆ.

دمابەدماو چڕیەو بنەیانەکاشا پۍ ئانەی چەمشا پا چوار زینڎانیە گنۆ، باس جە ئەگەروو جابەجێکەردەی سزاکێشا کریۍ، حەرپۊکەی چالاکا و رێکوزیا میان نەتەوەییەکۍ داکۆکیکەر جە مافەکا مرۆڤی و رێکوزیا سیاسیەکۍ حۊڵەکێشا پۍ فشار وستەی سەروو ئێرانی پەی جابەجێنەکەردەی ئا سزۍ وست گەڕ.

ئا چوار زینڎانیە سیاسیە کە ئەندامۍ کۆمەڵەی بێنۍ جە ٢٣ۍ تەمووزوو ٢٠٢٢ (١و گەلاوێژوو ١٤٠١)ی جە تەرەفوو هێزە ئەمنییەکا ئێرانیوە جە دەگێوە سەر بە ورمێنە گیریۍ و دماو ماوێوە جە تەرەفوو لقوو ٢٦و دادگاو ئاخێزوو ئیسلامی ئێرانیوە  بە سەرۆکایەتی دادوەر ئیمان ئەفشاری بە تۆمەتەو "جەنگ دژوو خوڎا"ی و "سیخوڕی پۍ ئیسرائیلی" سزاو جە قەنارەدایشا سەرەرە سەپیا.

دماو ئانەی تانە چا سزۍ دریا، جە ڕووا ویەردەینە لقوو ٩و دیوانوو باڵاو دادوەری سزاکێش پەشڕاس کەردۆ و دۆسیەکەش روانەو بەشوو جابەجێکەردەی سزاکا جە دادگاو تارانی کەرد.

محەمەڎ فەرامەرزی تەمەن ٢٨ ساڵ و خەڵکوو دێوڵانین، موحسین مەزڵوم تەمەن ٢٧ ساڵ خەڵکو مەهابادین، وەفا ئازەربار ٢٦ ساڵ خەڵکوو بۆکانی و پژمان فاتحی تەمەن ٢٨ ساڵ خەڵکوو کامیارانین جە دماو گێرتەیشا جە ٢٣/٧/ ٢٠٢٢ ێنە تا ئیسە ڕاشا پنە نەدریان دیڎار چنی بنەیانەکاشا ئەنجام بڎا و مافوو هۊرچنیەی پارێزنەریشا ۋنە زەوت کریان و دادگا پارێزنەرێوەش پۍ دیاری کەردێنۍ.

هێزە ئەمنییەکۍ ئێرانی تۆمەتەو هامکاری چنی موسادوو ئیسرائیلیشا وستەن پاڵوو ئا چوار زینڎانییە سیاسیا کوردی و باسشا چانەی کەردەبۍ، کە جە ئەسفەهان و جە وەختوو حۊڵدای پۍ تەقنایۆ کارگێوەنە گیریێنۍ، ئینەیچ جە وەختێنە بەقسۍ بنەیانەکاشا هەرچوارشا جە وەختێنە بە بێ چەک خەریکۍ هەرمانەو رێکوستەی بیێنۍ جە دەگێوۍ ورمێنە گیریێنۍ.

جە سەرەتاو ئێساڵیوە تائیسە ٦٢ کەسۍ جە ئێران و ۋەرکەوتوو کوردسانی جە قەنارە دریێنۍ کە بەشێوەشا چالاکۍ سیاسی و ئایدۊلۆژی  بیێنۍ و جە ئیسەنە تەرسەو جابەجێکەردەو سزاو جە قەنارەدای چن زینڎانیێوە سیاسی تەری ئینا ئارانە.

جە دماو دەسپنەکەردەو سەرهۊردای ژەنۍ، ژیۋای، ئازاڎیی ژمارەو جابەجێکەردەی سزاو جە قەنارەدای جە زینڎانەکا ئێرانینە بە شێوێوە فرە بەرزبیەنۆ و چالاکا ۋەرکەوتوو کوردسانی و ئێرانی باس چانەی کەرا، دەسەڵاڎدارا تارانی بە پەی چەمتەرسنای گلېرگەی و مرکنایرەی ناڕەزایەتیەکا پەنا پۍ جابەجێکەردەو ئا سزۍ بەرا.

ساڵەو ٢٠٢١ لاوکەمیۆ ٣٣٣ کەسۍ جە ئێرانەنە دریێنۍ قەنارە، بەڵام ساڵەو ٢٠٢٢ چنی دەسپنەکەردەو سەرهۊردای ژەنۍ، ژیۋای، ئازاڎیی ژمارەکە پۍ ٥٨٢ حاڵەتا و جە ساڵەو ٢٠٢٣ێچەنە یاوا ٧٤٦ حاڵەتۍ تۆمارکریۍ جابەجێکەردەی سزاو جە قەنارەدای.