وه‌زاره‌تو نه‌وتەو عێراقی بە شانڎو هەرێمو کورڎسانیش ئەرەیاۋنان، نه‌وتەو هه‌رێمو كورڎسانی ده‌س به‌ کیاستەی کەرۊۋە، ۋەڵېۋینایش کەرڎەن ئا نه‌وتۍ‌ جە تەرەفو كۆمپانیاو سۆمۆیۊ ورەشیۊ و داهاته‌كه‌ش بڎریۊۋە به‌ هه‌رێمی.

ئاژانسو بلومبێرگی ئه‌مریكی جە زوۋانو دوۋۍ سه‌رچەما ئاگاڎاریۋە ۋەڵاشکەرڎەنۊ، شانڎو حكومه‌تو‌ هه‌رێمی كه‌ ڕۊو‌ یه‌كشه‌ممه‌ی سه‌رداو به‌غڎایش كەرڎو چنی ۋەرپەرسا حكومه‌تو‌ ناوه‌نڎی كۆبیېۋە‌،"نەیاۋێنۍ ڕێكکۊتەی پۍ دەسپنەکەرڎەیۊ کیاستەو نه‌وتەو‌ هه‌رێمی".

وه‌زیرو‌ نه‌وتەو‌ عێراقی به‌ شانڎو هه‌رێمیش ئەرەیاۋنان، دماو قەرارەکەو داڎگاو‌ پاریسی، نه‌وتەو‌ هه‌رێمی ئەشۊ به‌ ڕێۋ جایۍ تازۍ هه‌نارده‌ کریۊ.

شانڎه‌كه‌ حه‌ر هه‌مان ڕۊ گێڵېۋە هه‌رێم و ھېزی جارێۋیتەر‌‌ یاۋێۋە به‌غڎا، به‌ پاو دماین زانیاریچ وه‌زاره‌تو نه‌وتەو عێراقی پۍ ئانەی ڕا بڎۊ نه‌وتەو هه‌رێمی ده‌س به‌ کیاستەی کەرۊۋە، ۋەڵېۋەبیەیش کەرڎەن ئا نه‌وتۍ‌ جە تەرەفو كۆمپانیاو سۆمۆیۋە‌ ۋرەشیۊ و داهاته‌كه‌یچش بڎریۊۋە به‌ هه‌رێمی.

حەفتەى ۋیەرڎە داڎگای نێم ده‌وڵه‌تیی‌ پاریسی دما قەرارش جە ‌باره‌و‌ دەعواکۍ حكومه‌تو‌ عێراقیۋە دا، کە بە پاو قەرارەکەی مەبۊ ئیتر توركیا به‌بۍ ڕه‌زامه‌نڎیی به‌غڎای نه‌وتەو هه‌رێمی کیانۊ پۍ بەنڎەرو جەھانی. ڕاسه‌وخۆیچ دماو قەرارەکەی، توركیا کیاستەو نه‌وتەو هه‌رێمیش مرڎنا.

ھ.ش