کانت وەختێ باس و بوونی کەرۆ ماچۆ ئی بوونەوەرێ هەنێ بوونی ڕاستەقینەشا ئانە نیا کە ئێمە وینمێش بوون و ئینیشا پۆژیانەرە، ئا بوونەی کە تراندسدێنتاڵا بوونێ نیا بە ئەزموون یان جە ڕاو تیۆرەکاو کۆمەڵناسی و تەنانەت جە ڕاو ئەنەلایزو عەقڵیچۆ یاویشەنە. ئا بوونە گنۆ پەشتەو ئانیشا گردی ئی بوونە پەی ئانیشا وێش نیشانە مدۆ کە ئینێ دلێ ئاگایێ تەمامینە بە بوون و وێشا، ئانەی هایدگەر ماچۆ پەی یاواینەی جە بوونی ئشۆم دازاینی ورچنمێ (بوون و مرۆی بوون چێگە).

بەهەر حاڵ ئانەی من پێسەو هەورامیێ یاوابوونە هەورامی دایم وێڵ و ئا بوونە تراندسدێنتاڵە و وێشاو بە گێڵای شۆنیشرە ئەگەر نەیاوابۆیچش پەنە هەر گێڵاکەی چێژ بەخش بیەن پەیش. یاگێ ئەرەنیشتەیش و دینداریش و بیناسازی و گۆرانیەکێش شاهیدێ ئانەینە کە چنە عەوداڵا پەی ئا بوونەیشە.

ئا بوونە تەنها وەختێ وێش نیشانە مدۆ کە نازی بوونی ساختەو دلێ بەرژەوەندی و سودی باڵا دەس بدۆ، پەوکای لوێنێ دوورێ کەوتێنێ و یاگە سەختەکێشا ورچنیێنێ تا هەم تاکێ باوەو هەم بازاڕیێچ نەباوە هەورامی گەورەترین هێزێش چانەینە وستەن کار بازاڕی نەبۆوە چون بە بازاڕی بیەیشۆ لێکدژ بۆوە چەنی دلێش و جە بوونیش دوور گنۆوە.

پەوکای هەورامی گوزەرانێ ناڕەحەتش ورچنیەن وەرانوەرو مانیایێ فرەیۆ، بە پێچەوانەوە کە تاوێ بازاڕی بیێ و به هەرمانێ کەمە داهاتێ فرەش بیێ.

هەورامی نە سکێش بیێنە نە تاقەت و مامەڵەی و نە تێکەڵی. تاک و تەرا پا کەشاوە پەی وێش ژیوان. نمونێ فرێنێ چینێ گەرەکم نیا بابەتەکەم فرە درێژە کێشۆ تەنیا یەک نمونە مارووە.

ئەحمەدو حاجی جافەی خوا عەفوەش کەرۆ دەرەو مەڕێ بۆ و دایم ئینا پا کەش و کۆوە، چا کاتەنە حەمەمرای برایچش ئینا نەجەف و مەعمەلێ منیۆرەو خەبەر کیانۆ واچدێ ئەحمەی برایم بێ با کەروش مدیرو مەعمەلەکەی چا چێش کەرۆ نە هەرمانێش هەنەو نە داهاتێش دەس گنۆ.

ئەحمەیچ جوابش پەی کیانۆوە ماچۆ واچدێش پەنە ئەگەر مەعمەلەکەی مارۆ ئی دیمو سەرو دارا ئانە پەیش بەرو ڕاوە

ئینەو دەیان گوزەشتەو چیرۆک دلێ هەورامیەکانە کە ئا کوێشا ورچنیێنێ و مەوەزارە واری چونکە چەنی وەستەیشارە ئاگایشا پانەیچ بیەن کە دلێوە ناڕەحەتێ باو دوورێ گناوە جە تروسکایێوە بوونە تراندسدێنتاڵەکەیشا.

پێسەو مەلا حەسەن و دزلیێ واچۆ:

من هەڵۆی بەرزی لوتکەی داڵانیم

هەرگیز وەک قاڵاو ناکەومە چینە.